APOCALIPSIS 2 - Nuevo Testamento en Quichua Cañar 1996

Efeso pueblopi cac tandanacushca criccunaman huillashcamanta

1Efeso pueblopi cac tandanacushca criccunata ricuc angelman cashna nishpa quillcai: Chai canchis lucerocunata alli maquipi charicuc, shinallatac chai canchis curi candelerocunapac chaupipi puricucmi, cashna nini:

2Ñucaca cancuna imata ruhuacushcataca tucuimi yachani. Cancuna mana shaicushpa imata ruhuashcatapish, mana p'iñarishpa c'atirashcatapish, millaicunata mana ricunachishcatapish, shinallatac ‘Jesusmanta huillaccunami canchic’ nishpa llullashpa puriccunata taripashcatapish yachanimi.

3Ñucata c'aticushcamanta llaquicunata apashpapish, mana p'iñarishpa, mana shaicushpa c'aticushcatapish yachanimi.

4Shina cacpipish cancunapica shuctami mana allita ricuni. Cancunaca punta c'uyaita charishca shinaca, ña mana charinguichicchu.

5Chaimanta cancuna maimanta mana allita ruhuanata callarircanguichic, chaita yuyarishpa Diosman llaquirishpa cutirichic. Callaripi ima shina cashca shinallatac caichic. Cancuna llaquirishpa Diosman mana cutiricpica, cancunapacman utca shamushpami, cancunapac candelerota maipi tiyacushcamanta anchuchisha.

6Ashtahuanpish Nicolaitacuna*f** ima ruhuashcata p'iñashpaca, allillatami ruhuanguichic. Chaicunataca ñucapish p'iñanillatacmi.

7Maijanpish rinrita chariccunaca, Diospac Espíritu tandanacushca criccunaman ima nicushcataca uyachun. Maijanpish millaita mishaccunamanca Diospac llactapi cac causaita cuc yuramantami carasha.

Esmirna pueblopi cac tandanacushca criccunaman huillashcamanta

8Shinallatac Esmirna pueblopi cac tandanacushca criccunata ricuc angelmanpish cashna nishpa quillcai: Huañushca cashpapish causaric, shinallatac callarichicpish, tucuchicpish cacca cashnami nini:

9Cancuna ima shina llaquicunata apacushcatapish, cancuna huaccha cashcatapish yachanimi. Shina cashpapish cancunaca chayuccunami canguichic. ‘Israelcunami*f** canchic’ niccuna cancunata mana alli nishpa, rimac cashcatapish yachanimi. Chaicunaca mana israeltacchu, ashtahuanpish Satanaspacta*f** ruhuangapac tandanacuccunami.

10Cancunataca llaquicuna japigricunmi. Shina cacpipish ama manchanguichicchu. Chashnaca ‘¿crishpa c'atinchu, imami?’ nishpami, maijan cancunataca diabloca carcelpi churachinga. Chaipica chunga punzhatami llaquita apanguichic. Shina cacpipish huañungacaman ñucata c'atinguichiclla. Chashna c'aticpimi, huiñai causaita ricuchic coronata cusha.

11Maijanpish rinrita chariccunaca, Diospac Espíritu tandanacushca criccunaman ima nicushcataca uyachun. Millaita mishaccunaca q'uipa huañuipica ima llaquita mana apangachu.

Pérgamo pueblopi cac tandanacushca criccunaman huillashcamanta

12Shinallatac Pérgamo pueblopi cac tandanacushca criccunata ricuc angelmanpish cashna nishpa quillcai: Ishcai filoyuc puntasapa espadata charicucca cashnami nini:

13Cancuna Satanás*f** maipi mandacucpi causacushcataca yachanimi. Shina cashpapish ñucata c'atinataca mana saquishcanguichicchu. Satanás maipi mandacucpi ñucamanta allita huillac Antipasta huañuchicpipish, ñucata crinataca mana saquishcanguichicchu.

14Shina cacpipish cancuna mana allita ruhuacushcataca taucacunatami ricuni. Chaipica Balaam yachachishcacunata c'atishpa mana saquinata munaccunatami charinguichic. Paimi israelcunataca*f** chai ruhuashcalla dioscunaman cushca micunata micuchunlla, huacllirichunlla, juchapi urmachichunlla nishpa, Balactaca yachachishca carca.

15Shinallatac chaipica Nicolaitacunapac*f** yachachishcata mana saquinata munaccunatami maijancunataca charicunguichic.

16Shina cashcamanta Taita Diosman llaquirishpa cutirichic. Chaita cancuna mana ruhuacpica, utca cancunapacman shamushpami, ñuca shimimanta llucshicuc espadahuan chaicunahuanca macanacusha.

17Maijanpish rinrita chariccunaca, Diospac Espíritu tandanacushca criccunaman ima nicushcataca uyachun. Maijanpish millaita mishaccunamanca pacashca tiyacuc maná shuti tandatami carasha. Shinallatac yuraclla rumitami cusha. Chaipica mushuc shutita quillcashcami canga. Chaitaca pipish mana ricsingachu, ashtahuanpish chaita chasquicllami ricsinga.

Tiatira pueblopi cac tandanacushca criccunaman huillashcamanta

18Shinallatac Tiatira pueblopi cac tandanacushca criccunata ricuc angelmanpish cashna nishpa quillcai: Ñahui murucunapish nina jagan nicuc shina, shinallatac chaquicunapish bronceta shinata charic Diospac Churimi cashna nini:

19Ñucaca cancuna imata ruhuacushcataca tucuimi yachani. Cancuna c'uyacushcatapish, cancuna crishcatapish, cancuna mana p'iñarishpa imalla allicunata ruhuacushcatapish, shinallatac callaripi ruhuacushcata atishpa cunan ashtahuan ruhuacushcatapish yachanimi.

20Shina cacpipish shuc mana allitami cancunapica ricuni. Chai Jezabel huarmi yachachichunmi saquinguichic. Paica ‘Diosmanta yachachicuni’ nishpapish, paipac yachachishcacunahuanmi ruhuashcalla dioscunaman cushca micunacunata micuchun nishpa, shinallatac huacllirichun nishpami ñucapacta ruhuaccunataca pandachicun.

21Pai huacllirinata saquishpa, Diosman llaquirishpa cutirichun nishpami, tauca punzhacunata saquircani. Shina cacpipish Diosman mana cutirishpami, millaita ruhuanatapish mana saquirca.

22Shina Diosman mana llaquirishpa cutiricpica, paiman ung:uita cachacpimi unaicaman ungushca canga. Chai huarmihuan huaclliriccunatapish llaquichishcami canga.

23Shinallatac paipac huahuacunatapish huañuchishami. Chashna ruhuacpimi tucui tandanacushca criccunaca paicunapac yuyaitapish, shungutapish ñuca yachac cashcataca yachac chayangacuna. Cancuna imata ruhuacushcata c'atishpami, japina cashcataca cusha.

24Tiatira pueblopi causac criccunamanta maijancunaca pai yachachishcata mana c'aticunguichicchu. Shinallatac cancunaca Satanaspac*f** jatunta yachanami nishcatapish mana yachacunata munashcanguichicchu. Chaimanta cancunataca ima ashtahuan ruhuanataca mana mandanichu.

25Shina cancuna crishpa c'aticushcataca, ñuca shamungacaman ama saquinguichicchu.

26Maijanpish tucuringacaman ñuca nishcata cazushpa millaita mishaccunamanca, llactacunata mandanatami cusha.

27Ima shinami ñuca Taita ñucaman mandanata curca, shinallatacmi paicunamanpish cusha. Shina cucpica fierro varahuan mandashpami, allpa mangata shina ñutuchinga.

28Shinallatac pacaringapac llucshic lucerotapish paicunamanca cushami.

29Maijanpish rinrita chariccunaca, Diospac Espíritu tandanacushca criccunaman ima nicushcataca uyachun.