APOCALIPSIS 16 - Nuevo Testamento en Quichua Cañar 1996

Llaquichic canchis copacunamanta

1Chai q'uipaca Diosman mañana huasi ucumantaca canchis angelman sinchita rimashpaca:

—¡Richic, Taita Dios p'iñarishpa cachashca canchis copacunapi tiyac llaquichinata allpapi t'alligrichic!— nishcatami uyarcani.

2Shina nicpi shuc niqui ángel rishpaca, pai charicushca copatami allpapi t'allirca. Chashna t'allicpica, manchana animalpac unanchita charicucta, shinallatac paiman ricchata alli niccunataca millai sisu ung:uimi japirca.

3Ishcai niqui ángel rishpaca, pai charicushca copataca mama cucha yacupimi t'allirca. Chashna t'allicpica, huañushca runapac yahuar shinami chai yacuca yahuar tucurca. Chashna tucucpica, tucui chai yacupi causac animalcunami huañurca.

4Quimsa niqui ángel rishpaca, tucyac yacupi shinallatac callpac yacupimi pai charicushca copataca t'allirca. Shina t'allicpica, chai yacuca yahuarmi tucurca.

5Chai q'uipaca yacucunata mandac ángel rimashpaca:

—¡Jucha illac Dioslla!

Canllatacmi cangui,

canllatacmi carcangui.

Chashna llaquita cachashpaca,

allitami ruhuashcangui.

6Paicunami cambaclla caccunatapish,

canmanta huillaccunatapish

yahuarta jichashpa huañuchircacuna.

Paicunaca chashna

chasquina cashcamantami,

canpish chashnallatac

paicunamanca yahuarta ubiachishcangui— nishcatami uyarcani.

7Shinallatac altar ucumanta rimashpaca:

—¡Tucui imatapish ruhuac Mandac Dioslla! Canca imatapish llaquichina cashcatatac ricushpami taripangui— nishcatami uyarcani.

8Chuscu niqui angelca intipimi pai charicushca copataca t'allirca. Chashna t'allishpaca, inti ashtahuan rupacyashpa gentecunata rupachichunmi t'allirca.

9Chashna ruhuacpica, tucui gentecunami ruparcacuna. Shina cacpipish Taita Diosman cutirishpa, paita alli ninataca mana munarcacunachu, ashtahuanpish chai llaquicunatapish anchuchiclla Diostaca c'amishpami rimarcacuna.

10Pichca niqui angelca manchana animal mandashpa tiyarinapimi pai charicushca copataca t'allirca. Shina t'allicpica, pai mandanaca amsa purayashcami tucurca. Shina tucucpica, nanaihuanmi gentecunaca c'alluta canirircacuna.

11Ashtahuanpish millaita ruhuanataca manatac saquircacunachu. Sisu ung:uihuanpish, nanaihuanpish cashpami, jahua pacha Taita Diostaca c'amishpa rimarcacuna.

12Sucta niqui angelca Eufrates jatun yacupimi pai charicushca copataca t'allirca. Chashna t'allicpica, inti llucshic ladomanta jatun mandaccuna shamushpa chimbachunmi, chai yacuca chaquirca.

13Dragonpac shimimantapish, manchana animalpac shimimantapish, llullac huillacpac shimimantapish sapoman riccha quimsa mana alli espiritucuna llucshicuctami ricurcani.

14Chaicunaca pi mana ruhuaipacta ruhuashpa ricuchic, supaipac millai espiritumi carca. Chaicunaca tucui cai pachapi tiyac jatun mandaccunapacman rishpami, tucui imatapish ruhuac Diospac jatun macanacuna punzhapi macanacungapac tandachigricurca.

15Chaipica:

—Uyaichic, ñucaca cancuna mana yuyashca horaspimi shuhua shamuc shina shamusha. Maijanpish riccharishca shina, churanata churarishca chapacucmanca, ¡mai cushicuimi canga! Chashna churarishca mana lluchulla cashpami, mana pinganachinga— nishcatami uyarcani.

16Chai millai espiritucunaca hebreo*f** rimaipi Armagedón nishca pambapimi tucui mandaccunata tandachirca.

17Canchis niqui angelca huairapimi pai charicushca copataca t'allirca. Chashna t'allicpica, jahua pachapi cac Diosman mañana huasipi cac mandashpa tiyarinamanta sinchita rimashpaca: “Ñami tucui tucuchishca” nishcami uyarirca.

18Chashna nicpica urcu tulun nishcapish, rimashcacunapish uyarircami. Relampa achic nishcapish ricurircami. Shinallatac gentecuna cai pachapi tiyashca punzhamanta pacha jaicapi chucchushcatami, allpaca chucchurca.

19Chashna tucucpica, jatun Babilonia puebloca quimsapimi chaupirirca. Shinallatac cai pachapi tiyac tucui pueblocunapish t'uñirircami. Chai jatun Babilonia pueblotaca jayac vinota ubiachic shina p'iñaihuan llaquichingapacmi, Taita Diosca yuyarirca.

20Yacu chaupipi tiyac tucui llactacunapish, shinallatac urcucunapish tucuimi chingarirca.

21Shinallatac jahua pachamantaca shuc quintal shina llashac runducunami tucui gentecunapac jahuapi urmarca. Shina urmashpa yallimana llaquichicpimi, gentecunaca Taita Diosta c'amishpa rimarcacuna.