2 TIMOTEO 1 - Nuevo Testamento en Quichua Cañar 1996

Pablo “allillachu cangui” nishcamanta

1Ñucaca Taita Dios munashcamanta, Apunchic Jesucristo acllashca huillac Pablomi cani. Apunchic Jesucristohuan shuc shinalla tucushcamanta, pai cushami nishca causaita huillacmi cani.

2Ñuca c'uyashca huahua shina Timoteo, ñucanchic Taita Diospish, Apunchic Jesucristopish canta c'uyashpa, llaquishpa sumac causaita canman cushca cachun nishpami caita quillcani.

Jesucristomanta huillana cashcamanta

3Ñaupa taitacuna ruhuashca shinallatac, ñucapish tucui shunguhuan Diospacta ruhuashpa, tutapish, punzhapish paiman mañacushpaca, canta yuyarishpami pagui nicunilla.

4Ñucaca can huacashcataca yuyaricunillami. Shina cashcamanta cantaca ñahui ñahui ricushpa cushicunatami munani.

5Can mana nic tucushpa, alli cric cashcataca yachanimi. Cambac aila Loidapish, cambac mama Eunicepish chashnallatacmi cric carca. Canpish chashnallatac cric cashcataca yachanimi.

6Shina cashcamanta cambac uma jahuapi ñuca maquita churacpi, Taita Dios ima ruhuana cashcata cushcataca, nina huañugricucta causachic shina cutin causachichunmi nini.

7Taita Diosca manchana yuyaita cuc espiritutaca mana cushcachu, ashtahuanpish imatapish ruhuai pudic, c'uyaita cuc, shinallatac quiquinllatac jarcarina yuyaita cuc Espiritutami ñucanchicmanca cushca.

8Chashna cashcamanta ñucanchic Apunchic Jesucristomanta huillanatapish, huillacushcamanta ñuca prezu tiyacushcamantapish ama pinganguichu, ashtahuanpish alli huillaita huillacushcamanta llaquita apana cacpica, Taita Dios imatapish ruhuaclla cashcahuan ñuca shina llaquita apanguilla.

9Taita Diosmi paipaclla causachun nishpami, ñucanchictaca quishpichishpa c'ayarca. Mana ñucanchic ima allita ruhuashcamantachu quishpichirca, ashtahuanpish Taita Dios c'uyashcallamantami, Jesucristohuan ñucanchic shuc shinalla tucucpi quishpichirca. Cai pacha manarac tiyacpimi, ñucanchictaca Taita Diosca c'uyashpa, chashnaca ruhuasha nishca.

10Chashnami Quishpichic Jesucristota cai pachaman cachashpa, Taita Diosca c'uyac cashcata ricuchirca. Pai quishpirinamanta huillashpa, huañuita chingachirca, shinallatac mana chingarina causaitapish apamurca.

11Taita Diosmi cai alli huillaita huillanata ñucaman mingarca. Shinallatac huillac cachunpish, yachachic cachunpish ñucataca cacharca.

12Chashna huillac cashcamantami tucui cai llaquicunataca apacuni. Shina cacpipish ñuca pita crishcataca yachanimi. Shinallatac ñucaman mingashcataca, shamuc punzhacaman huacaichina cashcatapish allimi yachani. Chashna cashcamanta manatac pinganichu.

13Canca ñuca ima shina alli yachachishca shinallatac, Jesushuan shuc shinalla cashcamantaca paita crishpa, paita c'uyashpa causachun ninimi.

14Ñucanchicpi causacuc Diospac Espíritu ayudacushcamantaca, Dios mingashca sumac yachanacunataca alli huacaichingui ninimi.

15Asia llactamanta caccunaca tucui mashna ñucataca shitashpa rishcataca, canllatac yachanguimi. Paicunapurapica Figelo runapish, Hermógenes runapish carcami.

16Apunchic Jesusca Onesiforotapish, tucui paipac huasi ucupi causaccunatapish mai llaquichun ninimi. Paimi ñuca prezu cacpica, tauca cutin mana pingashpa ñucata ricuc shamushpa cushichic carca.

17Roma llactaman chayashpaca, mana samarishpami taringacaman ñucataca mashcarca.

18Chashna cashcamanta Apunchic Jesusllatac tucuita taripana punzhapica, mai llaquishca cachunmi nini. Efeso pueblopi ima shina allicunata ruhuashpa cushichishcataca, canllatacmi alli yachangui.