APOCALIPSIS 12 - Nuevo Testamento en Quichua Cañar 1996

Huarmimantapish, dragón animalmantapish

1Jahua cielopica shuc jatun mancharinami ricurirca. Chaipica shuc huarmimi intihuan pillushca shina churarishca carca. Quillaca paipac chaqui ucupimi carca. Paica umapica chunga ishcai lucerocunayuc corona apashcami carca.

2Chai huarmica huicsayucmi carca. Chashna huicsayuc cashpami sajuarina punzha chayacpica, nanaihuan llaquita apashpa caparirca.

3Chai q'uipaca cutinllatacmi jahua cielopica shuc jatun mancharina ricurirca. Shuc jatun puca dragón nishca manchana animalmi canchis umayuc, chunga gachuyuc ricurirca. Umacunapica coronacuna apashcami carca.

4Chupahuanca quimsapi chaupishcamanta shuc parte lucerocunatami jahua cielomanta cai pachaman aisashpa shitarca. Chai dragonca huarmi ña sajuarinca huahuata micungapacmi, chai huarmipac ñaupapi shayarirca.

5Chai huarmica shuc c'ari huahuatami sajuarirca. Chai huahuami tucui cai pachapi causaccunataca fierro varahuan mandanga. Ashtahuanpish chai huahuaca mandashpa tiyarinapi tiyacuc Diospac ñaupamanmi apashca carca.

6Shinallatac chai huarmica shitashca pambamanmi miticushpa rirca. Chaipimi Taita Diosca huaranga ishcai pasac sucta chunga punzhacaman caracpi, micushpa causachun ch'icanyachishcami carca.

7Chai q'uipaca shuc macanacuimi jahua pachapi tiyarca. Chaipica mandac ángel Miguelmi paipac angelcunata tandachishpa dragonhuan macanacurca. Shinallatac dragonpish paipac angelcunata tandachishpami macanacurca.

8Shina cashpapish paicunaca mana misharcachu. Shina mana mishashcamantami jahua pachapica ña mana ashtahuan causanata charircacuna.

9Chaimantami jatun dragontaca jahua pachamanta llucchishpa shitarcacuna. Chai dragonmi ñaupa rucu culebraca can. Paillatacmi diablo nishcapish, Satanás*f** nishcapish can. Paica tucui cai pachapi causaccunata llullashpa, mana allita ruhuachicmi. Chaimantami paipac angelcunandic cai pachaman llucchishpa shitarcacuna.

10Shina tucushca q'uipaca jahua pachamanta sinchita caparishpaca:

—Cunan punzhami quishpirinapish,

Taita Diospac imata ruhuanapish,

Taita Dios mandanapish,

pai cachashca Quishpichic Cristo

mandanapish chayamun.

Tutapish, punzhapish

Diospac ñaupapi ñucanchic shina

criccunata juchanchishpa llaquichictaca

ñami caimanta llucchishpa shitashca.

11Paicunaca Pactalla Oveja*f** huañushpa

yahuarta jichashcamantapish,

alli huillaita huillashcamantapish

chai llaquichictaca mishashcami.

Shinallatac huañuna cacpipish,

mana manchashpami c'atircacuna.

12¡Jahua pachapi causaccunaca

cushicuichic!

Ashtahuanpish allpa pachapi, shinallatac

mama cucha yacupi causaccunaca,

¡aij, imachari tucunguichic!

Ashalla punzhacuna

tiyana cashcata yachashpami,

diabloca yallita p'iñarishpa

jahua pachamanta

cancunapacman shamushca— nictami uyarcani.

13Cai pachaman shitashca cashcata yachac chayashpami, dragonca chai c'ari huahuata charic huarmita huañuchisha nishpa c'ati callarirca.

14Ashtahuanpish chai huarmimanca culebramanta caruyashpa, shitashca pambapi pai causagrichunmi, condorpac ishcai alasta volashpa richun curcacuna. Chaipi quimsa huata chaupita micushpa causachunpish curcacunami.

15Chai culebraca callpacuc yacu tucushpa chai huarmita apachunmi, paipac shimimanta yacuta shitarca.

16Ashtahuanpish huarmita ama yacu apachunmi, allpaca pascarishpa chai culebra shitashca yacutaca ucuyachirca.

17Chashna tucucpimi dragonca chai huarmihuan yallita p'iñarishpa, chai huarmipac huahua huahuacunahuan macanacungapac rirca. Chaicunaca Dios mandashcacunata pactachiccunapish, shinallatac Jesusmanta huillashcata uyashpa alli c'aticcunapish canmi.

18Chai dragonca mama cucha yacu patapimi shayacurca.