ROMANOS 7 - Nuevo Testamento en Quichua Cañar 1996

Cazaranahuan chimbapurashpa yachachishcamanta

1C'uyashca criccuna, Moisés mandashcacunataca cancunallatac yachanguichicmi. Chai mandashcacunaca shuc runa causacucllapimi, imatapish mandac cashcataca yachanguichic.

2Cusayuc huarmica cazarashca cashcamanta mandashcapi nishca shinami cusapaclla cana can. Shina cacpipish cusa huañucpica, mandashcapi nishca shinami mana cusapac saquirin.

3Chaimanta shuc huarmi cusa causacucpirac shuctac c'arihuan chayarinacushpaca, huacllirinmi. Ashtahuanpish cusa huañucpica, mandashcapi nishca shinaca mana cusapacchu can. Shina cashpaca, shuctac c'arihuan cazarashpapish, mana huacllirinchu.

4C'uyashca criccuna, chai shinallatacmi Cristo huañushcamantaca mandashcacunata ama ruhuangapac Cristohuan pacta huañushca shina canguichic. Cunanca Taita Diospacta allita ruhuangapacmi, huañushcacunapuramanta causaric Jesucristopaclla canguichic.

5Cai pacha jucha munashcata ruhuashpa mana allicunata ruhuacucpica, mandashcacunaca ñucanchic yuyaipi yaicushpa, mana allita ruhuachishpami huañuiman aparca.

6Mandashcacunaca huatashca shinami charicurca. Shina cacpipish cunanca mandashcacunata ama ruhuangapac cacharirishpa, huañushca shinami tucushcanchic. Chashna Dios cacharichicpimi, ñaupa quillcashca mandashca causanamanta llucchishpa, Diospac Espíritu mushuc yuyaita cucpi, Diosta servishpa causacunchic.

Quiquinpi tiyac juchamanta

7Shina cacpica, ¿imatatac nishun? ¿Moisés mandashcacunaca juchami nishunchu? ¡Mana chashnachu yuyana canchic! Shina cacpipish, mandashcacuna mana tiyacpica, ñucaca imami jucha cashcataca mana yachaimanchu carcani. Mandashcacunapi “shucpac charishcata ama munangui” mana nicucpica, shucpac charishcata munanaca jucha cashcataca mana yachaimanchu carcani.

8Juchaca mandashcacuna tiyashcamantami ñuca yuyaipi yaicushpa, mana allicunata ruhuachi callarirca. Mandashcacuna mana tiyacpica, juchaca huañushca shinami canman.

9Mandashcacuna ima nicushcata mana yachashpami puntaca causarcani. Shina cacpipish mandashcacunata ña yachacpica, juchaca ashtahuan mana alli yuyaita cucpimi,

10ñucaca huañushca shina tucurcani. Shinami chai mandashcacunaca causaita cunapac randica, ñucataca huañuiman aparca.

11Mandashcacuna tiyashcamantami juchaca ñuca yuyaipi yaicushpa, mana allita ruhuachishpa pandachirca. Juchaca chai mandashcacunahuanmi, ñucataca huañushca shinata ruhuarca.

12Mandashcacunaca Taita Dios cushcami. Mandashcacunapi ima nicushcapish Diosmanta shamushca cashpami, cashcata ruhuangapacpish, tucui imapacpish alli can.

13Mandashcacuna shina alli cashpaca, ¿huañuiman apangachu? ¡Chaica mana chashnachu! Chai mandashcacunaca “juchata ruhuana manatac alli” nishpa ricuchicpipish, juchaca mandashcacunallahuantacmi ñucataca huañushca shinata ruhuarca. Chai mandashcacunallatac ñucata huañushca shinata ruhuashpami, juchaca yallita mana alli cashcataca ricuchin.

14Mandashcacunaca Diosmanta cashcatami yachanchic. Shina cashpapish, ñuca cai pachapi causacushcamantaca, juchata ruhuangapacca huatashca shinami cani.

15Ñucaca ñuca munashcataca mana ruhuanichu, ashtahuanpish mana ñuca munashcataracmi ruhuani. Chashna cashcamantami ñuca ruhuashcacunataca mana entendini.

16Shina cacpipish, chai mana ruhuasha nicushcata ruhuashpaca, mandashcacuna alli cashcatami yuyani.

17Shinaca ña mana ñucachu juchata ruhuacuni, ashtahuanpish ñucapi cac juchami chaitaca ruhuachicun.

18Cai pacha juchayuc runa cashcamantaca, ñucapi ima alli ruhuana yuyai mana tiyashcatami yachani. Ima allita ruhuasha nishpapish, mana ruhuai pudinichu.

19Allita ruhuasha nicushcataca mana ruhuanichu, ashtahuanpish mana ruhuasha nicushca chai mana allitaracmi ruhuani.

20Shina cacpica, cunanca mana ruhuasha nicushcata ruhuashpaca, mana ñucachu ruhuani, ashtahuanpish ñucapi cac juchami chaitaca ruhuachicun.

21Ñuca ima allita ruhuasha nicushpapish, ñucapi tiyac juchaca mana allicunallata ruhuachic cashcatami yachani.

22Ñuca shungupica Dios mandashcacunahuanca yallitami cushicuni.

23Shina cacpipish, ñucapi tiyac munaimi ima allita ruhuasha nicucpipish, ñuca allita ruhuana yuyaicunata jarcan. Chashna cashcamantami ñucapi tiyac munaicunaca juchapi huatashca shina charicun.

24¡Aij, ñucalla! Ñucapi tiyac huañunaman apac juchamantaca, ¿pitac anchuchingayari?

25Taita Diosllami ñucanchic Apunchic Jesucristomanta chai huañuimantaca anchuchinga. Chaimantami paitaca pagui nini. Ñuca yuyaihuanca Dios mandashcacunata pactachinatacmi yuyani. Shina cacpipish ñuca munaihuanca, jucha mandashcatami ruhuacuni.