GÁLATAS 4 - Nuevo Testamento en Quichua Cañar 1996

1Shinallatac caitapish nisha ninimi: Shuc taitapac huahuaca taitapac tucui charishca paipac cacpipish, huahuarac cashpaca shuc servic shinallami.

2Taita ima punzhamanta “chai charishcata ricungui” nishcacamanmi, shuccuna chai huahuataca yachachishpa mandancuna.

3Chai shinami ñaupamanca ñucanchicpish huahuacuna shina cashpaca, cai pachapi imapish manchanacunallata cazushpa, huatashca shina causacurcanchic.

4Shina cacpipish cachana punzha pactacpimi, Taita Diosca shuc huarmimanta huacharichun paipac Churitaca cacharca. Paica Moisés mandashcacunataca tucuitami cazushpa causarca.

5Paica Moisés mandashcacunata ñucanchic pactachishpa huatashca shina causacushcamanta cacharichishpa, Taita Diospac huahuacuna tucuchunmi shamurca.

6Shinallatac ñucanchic ña paipac huahuacuna cashcata ricuchingapacmi, Taita Diosca paipac Churipac Espirituta ñucanchic shunguman cacharca. Chai Espiritumi: “Ñuca Taitalla” nishpa mañachun ñucanchictaca yuyachicun.

7Shina cacpica cancunapish ña mana huatashca shina serviccunachu canguichic, ashtahuanpish Diospac huahuacunami canguichic. Shinallatac paipac huahuacuna cashcamantami, Dios munashcamanta pai cusha nishcata japiccuna canguichic.

Huatashca shina causanamanca ama tigrachun nishpa,Pablo rimashcamanta

8Cancunaca Taita Diosta ñaupaman mana ricsishcamantami, manapish dioscunata cazushpa huatashca shina carcanguichic.

9Cunanca Taita Diosta ricsiccunami canguichic, ashtahuancarin Taita Diosmi cancunata ricsin. ¿Shina cashca jahuachu cutinllatac imapish mana valic, yangalla manchanacunallata cazushpa, huatashca shina causashun ninguichic?

10Cancunaca acllashca punzhacunatapish, quillacunatapish, cushicuna punzhacunatapish, shinallatac huatacunatapish yupashpa huacaichiccunami canguichic.

11Ñucaca ñuca cancunaman ima yachachishcapish yangalla cana cashcatami manchani.

12C'uyashca criccuna, ñucaca cancuna shinami tucurcani. Chaimanta tucui cancunapish ñuca shina tucuchunmi mañani. Cancuna ñucaman ima mana allita ruhuashcataca mana yuyanichu.

13Callaripi alli huillaita cancunaman huillacushpaca, ungushca cashpami huillarcani. Chaitaca cancunallatac yachanguichicmi.

14Ñuca ungushca cashcamanta mana chasquipac cacpipish, mana millarcanguichicchu, mana p'iñarcanguichicchu. Chaipac randica Diospac angelta chasquic shina, shinallatac Jesucristota chasquic shinami ñucataca chasquircanguichic.

15¿Utcaman cushi cashcataca ñachu cungarircanguichic? Utcamanca ima shina ñahuita llucchishpa ñucaman cunalla cacpica, llucchishpa cunguichicmanmi carcanguichic. Cancuna chashna cashcataca ñucallatacmi alli yachani.

16¿Cancunaman cashcata huillashcamantachu ñucataca p'iñanguichic?

17Chai gentecunaca cancunatami paicunapura tucuchun yallita munancuna. Shina cacpipish paicunapac yuyaica mana allichu. Paicunaca cancuna ñucanchicmanta raquirishpa, paicuna yachachishcata uyachunmi munancuna.

18Shuccuna alli yuyaicunahuan cacpica, paicunapura tucunaca allimi. Chashnaca mana ñuca cancunahuan cacllapichu alli can, ashtahuanpish tucui punzhacunami chashna ruhuana can.

19C'uyashca huahuacuna, cutinllatacmi shuc huarmi sajuarina nanaihuan llaquita apacuc shina, cancunamanta llaquita apacuni. Chashnami cancuna Cristo causashca shina causangacaman llaquita apacushalla.

20Cancunamanta imata yuyanataca mana yachanichu. Chaimanta cunantac cancunapacman rishpa, ñuca imallata yuyacushcataca cancunaman ñahui ñahui rimana yuyaimi cani.

Agar huarmi, Sara huarmi ima shina causashcata yachachishcamanta

21“Moisés mandashcacunata cazushpa causanaca allimi” niccunamanca caitami nisha nini: ¿Manachu cancunaca Moisés mandashcacuna imata nicushcataca yachanguichic?

22Chaipica Taita Abrahamca ishcai churicunatami charirca ninmi. Shuctaca paipac servic huarmihuan, shuctaca mana servic paipac quiquin huarmihuanmi charirca ninmi.

23Chai servic huarmihuan charishca huahuaca maijanpish huahua tiyac shinallami tiyarca, ashtahuanpish mana servic paipac quiquin huarmihuan charishca huahuaca, Dios cusha nishcamantami tiyarca.

24Caica shuc alli yuyarinatami yuyachin: Ishcai huarmicunaca ishcai ari ninacushcatami ricuchin. Agar huarmica Sinaí urcupi cushca ari ninacushcatami ricuchin. Maijanpish chaipac caccunaca servingapacmi huacharin.

25Chai Agar huarmica Arabia llactapi tiyac Sinaí urcutami nisha nin. Shinallatac Agar huarmica Jerusalenpi causaccunapish, tucui israelcunapish*f** cunan punzha ima shina servishpa causacushcatapish ricuchinmi.

26Ashtahuanpish jahua pachapi tiyac Jerusalenca mana servic shinachu. Ñucanchicca paipac huahuacunami canchic.

27Chaimantami Dios quillcachishcapica:

“¡Mana huicsayuc tucuc,

mana huahuata charic huarmi cushicui!

¡Sajuarina nanaita mana charic huarmi

cushicushpa asiyari!

Cusayuc huarmita atishpami,

shitashca cac huarmica

ashtahuan huahuacunata charinga” ninmi.

28C'uyashca criccuna, ima shinami Dios cusha nishcamanta taita Abrahamman Isacta curca, cancunapish chai shinallatacmi Diospac huahuacuna canguichic.

29Chashna cacpica maijanpish huahuacuna tiyac shina tiyashca huahuaca, Diospac Espiritumanta tiyashca huahuataca mana ricunachishpa p'iñarca. Chashnallatacmi cunanpish tucun.

30Ashtahuanpish Dios quillcachishcapica, ¿imatatac nin? Chaipica: “Servic huarmipac huahuaca, mana servic quiquin huarmipac huahuahuan japina cashcataca mana pacta pacta japingachu. Chaimanta servic huarmita paipac huahuandic llucchishpa cachangui” ninmi.

31Shina cashcamanta c'uyashca criccuna, ñucanchicca servic huarmipac huahuacuna shinaca mana canchic, ashtahuanpish mana servic quiquin huarmipac huahuacuna shina canchic.