GÁLATAS 3 - Nuevo Testamento en Quichua Cañar 1996

“¿Mandashcacunata pactachinachu, mana cashpacaJesusta crinachu alli canga?” nishcamanta

1Galacia llactapi causac criccuna, ¡cancunaca yuyai illaccunami canguichic! ¿Pitac cancunataca umashpa crichircayari? Tucui cancunapac ricuipi ñuca huillashpaca, Jesucristo ña chacatashca cashcatami huillarcani.

2Caillatami huillachun munani: ¿Cancunaca Moisés mandashcacunata pactachishpachu, mana cashpaca ñucanchic huillashcata uyashpa crishpachu Diospac Espiritutaca chasquircanguichic?

3Cancunaca yuyai illaccuna cashpami, Diospac Espirituhuan causanata callarishca jahua, gentecunapac munashca shinata pactachinata munanguichic.

4¿Cancuna ima tucushcacunaca yangallachu canga? ¡Chaicunaca manatac yangallachu can!

5Cancunaca mana Moisés mandashcacunata pactachishcamantachu, ashtahuanpish ñucanchic huillashcata uyashpa crishcamantami Taita Dios paipac Espirituta cushpa, cancunapurapica pi mana ruhuaipaccunata ruhuachicun. ¿Chaitaca manachu yachanguichic?

6Ñaupa taita Abrahamca Taita Diostami crirca. Chaimantami Taita Diosca paihuan alli tucuchun chasquirca.

7Chaimantami maijanpish criccunalla Abrahampac huahuacunatacca can. Chaitaca cancunaca yachanami canguichic.

8Taita Diosca mana israelcuna*f** cacpipish cricpica, paihuan alli tucuchun chasquishami nishcamantami, Dios quillcachishcapica Abrahamman cai alli huillaita huillashpaca: “Canmantami tucui cai pachapi causaccunaman allicunata cusha” nishca.

9Abraham crishcamantami Taita Diosca allicunata curca. Chaimantami maijanpish cricmanca Abrahamman cushca shinallatac allicunata cunga.

10Dios quillcachishcapica: “Mandashcacunata mana tucui allita pactachictaca, llaquichingapac ch'icanyachishcami canga” ninmi. Chaimantami maijanpish Moisés mandashcacunata pactachishpalla Taita Dioshuan alli tucusha nictaca, llaquichingapac ch'icanyachishca canga.

11Shinallatac Dios quillcachishcapica: “Taita Dioshuan alli tucushcacunaca crishcallamantami causanga” ninmi. Chashna cacpica, maijanpish Moisés mandashcacunata pactachishpalla Taita Dioshuan mana alli tucuc cashcataca ricunallami.

12Moisés mandashcacunata pactachinaca mana crina shinachu, ashtahuanpish Dios quillcachishcapica: “Maijanpish mandashcacunata pactachicca, pai pactachishcamantaca causangami” ninmi.

13Shina cacpimi Moisés mandashcacunata ñucanchic mana pactachishpa, llaquiman rinalla cacpipish, Cristoca ñucanchicpac randi cruzpi llaquita apashpa quishpichirca. Dios quillcachishcapica: “Maijanpish cruzpi chacatashca huañucca, Dios llaquichishcami huañun” ninmi.

14Taita Abrahamman Taita Dios allicunata cusha nishcata Jesucristomanta mana israelcunapish chasquichun, shinallatac Dios cusha nishca Espirituta ñucanchic crishcamanta chasquichunmi, chashnaca tucurca.

Moisés mandashcacunamantapish, Dios cusha nishcamantapish

15C'uyashca criccuna, gentecuna ima shina causacushca shinami entendinallata parlagrini: Gentecunapurallapish imata ari nishpaca, shuc quillcatami ruhuachin. Chashna ruhuacpica pipish mana p'aquipac, shinallatac maita mana yallichipacmi can.

16Chashna cacpica Taita Diosca pai cusha nishcataca taita Abrahammanpish, paipac huahuacunamanpish cusha nishca. Dios quillcachishcapica mana mirarishca achca huahuacunamanchu Diosca cusha nishca, ashtahuanpish Abrahamtaca: “Cambac huahua huahuacunapuramanta shucllamanmi cusha” nishcami. Chaica Cristomi can.

17Shina cacpica cashnami nini: Taita Diosca Abrahamman cusha nishcataca “pactachishatacmi” nishcami. Chaimantami chuscu pasac quimsa chunga huata q'uipa Moisesman mandashcacunata cushpapish, Taita Diosca pai ari nishcataca mana chingachishpa, pai cusha nishcatapish mana yangallapi churashca.

18Mandashcacunata pactachishpalla Dios cusha nishcata japina cacpica, mana Dios cusha nishcamantachu canman. Ashtahuanpish Taita Diosca Abrahamman cushallami nishcamantami, pai cusha nishcataca curca.

19Shina cacpica, ¿imapactac Moisés mandashcacunaca alli canga? Chai mandashcacunaca Dios ari nishca q'uipami, taita Abrahampac aillupuramanta maijanman pai cusha nishca shamungacaman, maijanpish mana allita ruhuacushcata ricuchingapac carca. Chai mandashcacunataca angelcunami Moisesman curca. Cutin gentecunamanca paimi yachachirca.

20Ashtahuanpish Taita Dios paillatac cusha nishpaca, mana pi shucta huillachishcachu. Taita Diosca paillami chaitaca ruhuashca.

Moisés mandashcacuna imapac alli cashcamanta

21Shina cacpica, ¿Moisés mandashcacunaca Dios cusha nishcata chingachingapacchu canga? ¡Mana chashna yuyanachu canchic! Moisés mandashcacunata pactachishpa causanalla cacpica, maijanpish chai mandashcacunata pactachishpaca, Taita Dioshuan alli tucunmanllami.

22Ashtahuanpish Dios quillcachishcapi nishca shinaca, maijanpish Jesucristota crishcallamanta Dios cusha nishcata japichunmi, juchaca tucui gentecunata huatashca shina charicun.

23Jesucristota crina manarac tiyacpica, chai crinamanta huillangacamanmi Moisés mandashcacunaca ñucanchicta huatashca shina charicurca.

24Chai mandashcacunaca Jesucristota crishcamanta ñucanchic Taita Dioshuan alli tucuchunmi, Cristo shamungacaman huahuacunata shuc servic cuidac shina charicurca.

25Shina cacpimi crina punzhacuna chayamucpica, chai mandashcacunaca ña mana charicun.

26Tucui cancunami Jesucristota crishcamantaca, Diospac huahuacuna canguichic.

27Bautizarishpaca, Cristohuanmi shuc shinalla tucurcanguichic. Shina tucushpaca, shuctac churanata churarishca shinami Cristohuanca shuctac laya tucushcanguichic.

28Jesucristohuan shuc shinalla tucushcamantaca, tucui mashnami shuc shinalla canguichic. Shina cacpica israel*f** cashpapish, mana israel*f** cashpapish, servic cashpapish, mana servic cashpapish, c'ari cashpapish, huarmi cashpapish mana ima canchu.

29Ña Cristopac cashpaca, Taita Abrahampac huahua huahuacunami tucushcanguichic. Shina cashpaca, Taita Dios ñaupaman cusha nishcata japiccunapish canguichicmi.