GÁLATAS 1 - Nuevo Testamento en Quichua Cañar 1996

Galacia llactapi causac criccunaman Pablo quillcashcamanta

1Ñucaca mana gentecunalla acllashcapac huillachun cachashcachu cani, ashtahuanpish Taita Diospish, shinallatac pai causachishca Jesucristopish huillachun cachashca Pablomi cani.

2Tucui caipi cac criccunahuan tucushpami, Galacia llactapi causac tandanacushca criccunaman quillcashpa cachani.

3Ñucanchic Taita Diospish, Apunchic Jesucristopish mai c'uyashpa, cancunamanca sumac causaita cushca cachun ninimi.

4Jesucristoca ñucanchic juchacunamanta huañushpami, cai pacha millai gentecuna shina ama causachun ñucanchicta quishpichishpa, ñucanchic Taita Dios munashcata pactachirca.

5¡Chaimanta Taita Diosca huiñaita alli nishca cachun! Chashna cachun.

Quishpirinamanta alli huillaica shucllami tiyan

6Jesucristo mai c'uyashcamantami, Taita Diosca cancunataca acllarca. Chaimantami cancuna shuctac yachachishcata c'atishpa, Taita Diosmanta utca caruyacushcata yachashpaca mancharini.

7Quishpirina alli huillaimanta ashtahuan shuctac alli huillaica mana tiyanchu. Ashtahuanpish cancunataca pandachingaraicullami, maijancunaca Cristomanta alli huillaitaca shuctac layaman yachachishun nincuna.

8Shina cacpica ñucanchic cancunaman huillashca alli huillaita shuctac layaman huillactaca ñuca cacpipish, jahua pachamanta shamuc ángel cacpipish Taita Dios llaquichishca cachun.

9Ñaupaman nishca shinallatacmi cutin nini: ¡Maijanpish quishpirinamanta huillashpa, cancuna ña uyashcamanta shuctac layaman huillactaca Taita Dios llaquichishca cachun!

10Chashna nishpaca gentecunalla alli nichunca mana munanichu, ashtahuanpish Dios alli nishca canatami munani. Gentecunalla ñucata alli nichun nishpaca, ña mana Cristopacta ruhuacchu caiman.

Pablo ima shina Jesusmanta huillai callarishcamanta

11C'uyashca criccuna, caitami yachachun munani: Quishpirinamanta ñuca huillashca alli huillaica mana gentecunapac yuyaillamantachu can.

12Caitaca mana gentecunamantachu chasquircani, shinallatac mana pimanta yachacurcanichu, ashtahuanpish Jesucristomi ñucamanca ricsichirca.

13Ñuca ñaupaman israelcuna*f** yachachishcata c'aticushpaca, Diospaclla tandanacushca criccunata yallita llaquichishpa, ima shinapish tucuchina yuyaihuan puricushcataca cancunallatac uyashcanguichicmi.

14Ñucaca ñaupa taitacuna yachachishcata allita huacaichic cashpami, israelcuna yachachishcata c'aticushpaca, ñucahuan huiñai israelcunata atishpa ashtahuan alli cazuc carcani.

15Shina cacpipish ñuca manarac huacharicpimi, Taita Diosca ñucata mai c'uyashpa, ch'icanyachishpa acllarca. Chashna acllashpaca, pai munashca pachami

16mana israelcunamanpish*f** paimanta huillachun paipac Churitaca ñucaman ricsichirca. Shina ricsichicpimi, pimanpish mana tapurcani.

17Shinallatac Jesús acllashca punta huillaccunata Jerusalén pueblopi ricungapacllapish mana rircanichu, ashtahuanpish utcashpami Arabia llactaman rircani. Chaimantaca Damasco pueblomanmi cutimurcani.

18Quimsa huata q'uipami Pedrota ricungapac Jerusalén pueblomanca rircani. Chaipica chunga pichca punzhatami paihuan carcani.

19Chaipica Jesús acllashca caishuc huillaccunataca pitapish mana ricurcanichu, ashtahuanpish Apunchic Jesuspac huauqui Jacobollatami ricurcani.

20Taita Dios ricucucpimi, mana llullashpa caicunataca quillcani.

21Chai q'uipaca Siria llactaman, Cilicia llactamanmi rircani.

22Chai punzhacunapica Cristota cric, Judea llactapi causac tandanacushca criccunaca ñucataca mana ñahui ñahui ricsircacunachu,

23ashtahuanpish ñucataca: “Ñaupamanca ñucanchicta llaquichishpa tucuchisha nicca, cunanca Jesucristota crinamantami paipish huillacun” nicllatami uyarcacuna.

24Chaimantami ñucamantaca Taita Diosta “allimari cangui” nircacuna.