ROMANOS 4 - Nuevo Testamento en Quichua Cañar 1996

Taita Abraham crishpalla Taita Dioshuan alli tucushcamanta

1Shina cacpica, ñucanchic ñaupa taita Abrahammantaca, ¿imatatac nishun? ¿Paica imatatac japishca canga?

2Taita Abraham pai imata ruhuashcamanta Taita Dios paihuan alli tucuchun chasquishca cacpica, jatun tucuipacmi carca. Shina cacpipish, Taita Diospac ñaupapica mana jatun tucuipacchu carca.

3Dios quillcachishcapica: “Abrahamca Taita Diosta crircami. Chashna crishcamantami Taita Diosca paihuan alli tucuchun chasquirca” ninmi.

4Maijan imata ruhuashcamanta japina cashcata japishpapish mana yanga japinchu, ashtahuanpish pai imata ruhuashcamantami japin.

5Shina cacpipish juchacunata perdonashpa, paihuan alli tucuchun chasquiclla Taita Diosta cricpica, paiman ima allita mana ruhuashca cacpipish, crishcallamantami paihuan alli tucuchun chasquin.

6Mandac Davidpish Taita Diosman ima allita mana ruhuashca cacpipish, paihuan alli tucuchun chasquicpi, cushicushcataca ñami huillashca.

7Davidca:

“Millaita ruhuashca cacpipish,

Dios perdonashpa,

juchata anchuchishcacunamanca

¡mai cushicuimi!

8Juchata mana yuyarishpa

Dios chasquishcacunamanca

¡mai cushicuimi can!” nishcami.

9Shina cacpica, ¿circuncisionta*f** ruhuashcacunallachu chai cushicuitaca chasquinga? Mana cashpaca, ¿circuncisionta mana ruhuashcacunapish manachu chasquinga? “Abrahamtaca crishcallamantami Taita Dios paihuan alli tucuchun chasquirca” nishpaca, ñami nishcani.

10¿Abrahamtaca manarac circuncisionta ruhuacpichu chasquirca? Mana cashpaca, ¿circuncisionta ruhuashca q'uipachu chasquirca? Chaica manarac circuncisionta ruhuacpimi, Taita Diosca chasquirca.

11Abrahamtaca crishcallamantami Taita Diosca paihuan alli tucuchun chasquirca. Ashtahuanpish Dios chasquishcata ricuchingapacmi, q'uipata circuncisionta ruhuarca. Chashnami Abrahamca mana circuncisionta ruhuashca cashpapish, tucui criccunapac taita shina tucurca. Taita Diosca paicunatapish crishcallamantami paihuan alli tucuchun chasquirca.

12Abrahamca circuncisionta ruhuashcacunapacpish taitami. Mana circuncisionta paicuna ruhuashcallamantachu, ashtahuanpish Abraham manarac circuncisionta ruhuashpa, pai crishpa ima shina causacushcata yuyarishpa c'aticushcamantami paicunapac taita.

Crishpalla Dios cusha nishcata japina cashcamanta

13Taita Diosca Abrahammanpish, paipac huahua huahuapuramanpish cai pachataca cusha nircami. Abrahammanca mana Moisés mandashcacunata pactachishcallamantachu cusha nirca, ashtahuanpish crishcamanta Taita Dios paihuan alli tucuchun chasquishpami cusha nirca.

14Mandashcacunata pactachishpalla Dios cusha nishcata chasquina cacpica, crinapish, Dios cushami nishcapish yangallami canman.

15Mandashcacunata yachashpa mana pactachicpica, Diosca llaquichingami. Mandashcacunata mana yachashpa mana pactachicpica, mana juchanchishcachu canga.

16Abraham crishcamantami, paipac huahua huahuacunamanca Taita Dios cusha nishca pai c'uyashcallamanta cushca cachun, chashnaca nishca. Dios cushami nishcaca mana mandashcacunata cazuccunallamanchu, ashtahuanpish Abraham shina tucui criccunamanpish canmi. Chashna cacpimi, Abrahamca tucui ñucanchicpac taita shina tucushca.

17Dios quillcachishcapica: “Tauca llactacunapi causaccunapac taitami cangui” ninmi. Abraham crishca Diosllatac chashna nicpimi, chashnaca tucun. Paimi huañushcacunatapish causachic, shinallatac ima mana tiyashcacunata ruhuac Diosca can.

18Taita Diosca Abrahamtaca: “Cambac huahua huahuacunaca achcami tucunga” nishcami. Abrahamca maita mana huahuata charipac cashpapish, crishpa shuyacushcamantami, chai nishca shinallatac tauca llactacunapi causaccunapac taita tucurca.

19Abrahamca pasac huata shinatami charirca. Shinallatac paipish, paipac huarmi Sarapish ña yuyac cashcamanta mana huahuata charishpa, huañunalla cashcatami yacharca. Shina cashpapish, huahuata charinata crinataca mana saquircachu.

20Chashna cashpami Taita Dios cushami nicpica, mana caita chaita yuyashpa, ashtahuanpish Taita Diosta “allimari cangui” nishpa, ashtahuan crishpa japina yuyailla carca.

21“Diosca imatapish ruhuaclla cashcamanta, pai cusha nishcata cungallami” nishpami Abrahamca shuyacurca.

22Abraham chashna crishcamantami Taita Diosca paihuan alli tucuchun chasquirca.

23Dios quillcachishcapica: “Paihuan alli tucuchun chasquirca” nishpaca, mana Abrahamllamantachu nin,

24ashtahuanpish ñucanchicmantapish ninmi. Ñucanchic Apunchic Jesusta huañushcacunapuramanta causachic Taita Diosta crishcamantami, paihuan alli tucuchun ñucanchictapish chasquin.

25Apunchic Jesusca ñucanchic juchacunamantami japi tucushpa huañurca. Ñucanchic paihuan alli tucuchunmi, Taita Diosca Jesustaca huañushcacunapuramanta causachirca.