1 CORINTIOS 15 - Nuevo Testamento en Quichua Cañar 1996

Jesucristo causarishcamanta

1C'uyashca criccuna, cunanca ñuca huillashca alli huillaita yuyarichunmi munani. Cai alli huillaita chasquishpami, mana saquishpa c'atiracunguichic.

2Shinallatac ñuca huillashca shina alli huillaita c'atirashpaca, cai alli huillaimantami quishpiringuichic. Mana chai shina c'atishpaca, cancuna crishcaca yangami canga.

3Tucuimanta yallica, ñuca ima shina chasquishca shinallatacmi, cancunamanpish yachachircani. Dios quillcachishcapi nishca shinallatacmi, Cristoca ñucanchic juchacunata perdonangapac huañurca.

4Dios quillcachishcapi nishca shinami, enterrashca cashpapish, quimsa punzhapica causarirca.

5Chashna causarishpaca, Cefasmanracmi*f** ricurirca. Chai q'uipaca chunga ishcai yachacuccunamanmi ricurirca.

6Chai q'uipaca pichca pasac yalli criccunamanmi ricurirca. Chaita ricuccunapuramantaca achcacunami causacuncunarac. Cutin maijancunaca ña huañushcacunami.

7Chai q'uipaca Santiagomanmi ricurirca. Shinallatac chai q'uipaca tucui pai acllashca huillaccunamanmi ricurirca.

8Shinallatac ña tucuiman ricurishca q'uipaca, manarac huacharina punzhapi huacharishca huahua shina cac ñucamanmi ricurirca.

9Chaica ñucami, tucui Jesús acllashca huillaccunamanta yalli yangalla cani. Shinallatac Diospaclla cac tandanacushca criccunata mana ricunachishpa llaquichishcamantaca, mana Jesús acllashca huillac nishcapish cana canichu.

10Shina cacpipish Dios c'uyashcallamantami, chashna cashca cashpapish, cunanca cashna cani. Pai ñucata c'uyashcaca mana yangachu cashca. Chaica tucui paicunata atishpami, ñucaca Diospacta ruhuacuni. Shina cashpapish mana ñucachu ruhuashcani, ashtahuanpish Taita Dios c'uyashcallamantami ayudashpa ruhuachishca.

11Chashnaca ñuca cashpa, paicuna cashpapish chaillatatacmari huillarcanchic. Chai huillashcatami cancunaca crircanguichic.

Huañushcacuna causarina cashcamanta

12Huañushcacunapuramanta Cristo causarishcata ñucanchic huillacushca jahua, ¿ima shinatac cancunapuramanta maijancunaca “huañushcacunaca mana causaringachu” ninguichicyari?

13Huañushcacuna mana causarina cacpica, Cristopish mana causarinmanchu carca.

14Cristo mana causarishca cacpica, ñucanchic huillashcapish, cancuna crishcapish yangami canman.

15“Taita Diosmi Cristota causachirca” nishpa huillacucpipish, Cristo mana causarishca cacpica, Taita Diosmanta llullashpa huillaccunami canchicman. Huañushcacuna mana causarina cacpica, Cristopish mana causarinmanchu carca.

16Huañushcacunata Taita Dios mana causachina cacpica, Cristotapish mana causachinmanchu carca.

17Cristota mana causachishca cacpica, cancuna crishcaca yangallami canman, shinallatac juchallapitacmi causacunguichicman.

18Chashna cacpica Cristota crishpa, ña huañushcacunapish huiñaita chingarishcami canman.

19Cai causaipaclla Cristopi shunguta churashca cashpaca, tucui gentecunamanta yalli llaquinayaipacmi canchicman.

20Ashtahuanpish Cristotaca Taita Diosca huañushcacunapuramanta causachircatacmi. Paimi cric huañushcacuna causarina cashcata ricuchishpa, punta causaricca can.

21Shuc runapac juchallamantami huañuica cai pachapi tiyai callarirca. Chashnallatac huañushcacunapuramanta causarinapish shuc runallamantami tiyai callarirca.

22Ima shinami Adanpac huahuacuna cashcamantaca tucui gentecuna huañuna can, chashnallatacmi Cristota crishcamantaca tucui paita criccuna paimanta causaita charinga.

23Ima shina cana cashca shinami, tucuipac ñaupaca Cristorac causarirca. Chai q'uipaca Cristo cutimucpimi, tucui paipac caccunaca causaringa.

24Cristo tucui mandaccunatapish, jatun mandaccunatapish, poderta charic mandaccunatapish chingachishpa, pai mandacushcata Taita Diosman cucpimi, cai pachaca tucuringa.

25Cristoca paita p'iñaccunata paipac chaqui sarunapi Taita Dios churangacamanmi, paillatac mandacungalla.

26Tucuripi tucuchina cashca, p'iñac huañuitapish Diosca tucuchingami.

27Diosca Cristopac chaqui sarunapimi chaicunataca tucuita churashca. Chashna tucuita churashpapish, tucuita churac Taita Diosca paipish Cristopac ñaupapi cumurishca canataca, mana nisha ninchu.

28Tucui mashna Cristohuan shuc shinalla tucushpa, paipac ñaupapi cumurishca q'uipaca, Cristollatacmi Diospac Churi cashpapish, tucuita cumurichic Diospac ñaupapi cumuringa. Chai shinami Taita Diosca tucui imatapish paillatac mandanga.

29Shina cana cacpica, ¿imapactac huañushcacunapac shutipi bautizarincunayari? Huañushcacuna mana causarina cacpica, ¿imapactac paicunamantaca bautizarincunayari?

30Shinallatac ñucanchicca, ¿ima nishpatac tutapish punzhapish huañuchina manchailla canchic?

31C'uyashca criccuna, ñucaca tucui punzhacunami huañunalla cani. Cancuna chashna Apunchic Jesucristota criccuna cashcamantami, mai cushicushpa chashnaca nicuni.

32Ñucaca Efeso pueblopica, p'iña animalcunahuan macanacuc shinami sinchita macanacurcani. Shina macanacushcapish, cai pacha munaicunallamanta macanacushca cacpica, ¿imapactac valinman? Huañushcacuna mana causarina cacpica, maijancuna nishca shinaca: “¡Cunanca micushunchic, ubiashunchic, cayaca ña huañushunmi!” nimanmi.

33Pandachichunca ama saquinguichicchu. Maijancuna nishca shinaca: “Mana alli gentecunahuan tandarishpami, cancunapac alli causaitaca saquinguichic” ninmi.

34Cancunaca alli yuyaiman tigrarichic, ama juchata ruhuaichicchu. Cancunapuramanta maijancunaca manarac Diosta ricsinguichicchu. Caicunataca cancuna pingaita charichunmi nini.

Huañushcacuna ima shina causarina cashcamanta

35Maijancunaca: “¿Huañushcacunaca ima shinashi causaringa? ¿Chaicunaca ima laya cuerpohuanshi ricuringa?” ningacunachari.

36¡Chashna niccunaca yuyai illaccunami! Ima muyuta tarpucpipish, chai muyuca ismunmi. Chashna ismucpimi, cutin shuc huiñan.

37Imata tarpushpapish, ña huiñashcataca mana tarpunchu, ashtahuanpish trigota cashpa, ima shuc muyucunata cashpapish muyullatami tarpun.

38Chai q'uipaca Taita Diosmi pai ima shina huiñachisha nishca shina huiñachin. Paillatacmi tucui muyucunata ima shina huiñana cashca shina huiñachin.

39Ima cuerpo cashpapish, mana tucui chai shinallatacchu. Maijancunaca gentecuna laya, maijancunaca animalcuna laya, maijancunaca volashpa puric alasyuc animalcuna laya, shinallatac maijancunaca yacupi tiyac animalcuna laya cuerpotami charin.

40Shinallatacmi jahua cielo ima achicyachicpish, cai allpa pachapi ima tiyacpish, shuctac shuctac laya tiyan. Jahua cielopi ima tiyashcaca chaipi sumac cashcatami ricuchin. Cai allpa pachapi ima tiyashcaca caipi sumac cashcatami ricuchin.

41Inti achicyachishcaca quilla achicyachishcamanta, lucero achicyachishcamantapish shuctac layamanmi achicyachin. Shinallatac lucerocunapuramantapish shucca shuctac layaman, shucca shuctac layamanmi achicyachin.

42Chai shinallatacmi huañushcacuna ima laya causarinapish canga. Ismuclla aichahuan huañushcaca enterrarishpapish mana ismuclla aichahuanmi causaringa.

43Millana cuerpota enterrashcaca sumacyachishcami causaringa. Irquiyashca cuerpota enterrashcaca alli sinchi cuerpohuanmi causaringa.

44Cai pachapaclla cuerpohuan enterrashcaca Diospaclla cangapacmi causaringa. Cai pachapaclla cac cuerpo tiyashpaca, Diospaclla cac cuerpopish tiyanami can.

45Dios quillcachishcapica: “Taita Diosca punta Adantaca causaiyuctami ruhuarca” ninmi. Cutin q'uipa Adantaca causaita cuc Espirituyuctami Taita Diosca ruhuarca.

46Shina cacpipish causaita cuc Espirituyucca mana punta shamushcachu, ashtahuanpish aichayuc tulluyucracmi puntaca shamushca. Chai q'uipami causaita cuc Espirituyucca shamushca.

47Puntaman Taita Dios ruhuashca Adanca allpallamantami carca. Chaipac q'uipa Adanmi, jahua pachamanta shamushca carca.

48Cai pachapi causaccunaca, allpamanta ruhuashca runa shinami. Shinallatac jahua pachamanta caccunaca, jahua pachamanta shamushca Runa shinami.

49Ima shinami allpamanta ruhuashca runaman riccha canchic, chai shinallatacmi jahua pachamanta shamushca Runa shinapish cashun.

50C'uyashca criccuna, caitami nisha nini: Aichayuc, tulluyuc caccunaca Dios maipi mandacucmanca mana yaicungacunachu. Imapish ismucllaca mana ismuclla llactamanca mana yaicungachu.

51Shina cashpapish manarac piman Dios yachachishcatami ricsichisha nini. Mana tucuichu huañushun. Shina cashpapish tucuimi shuctacyachishca cashun.

52Chashnaca ñahuita quimllai shinallapimi, tucuri trompeta tocashpa uyaricpica, ñucanchicca shuctacyachishca cashun. Shinallatac huañushcacunaca mana cutin huañungapacmi causachishca canga. Shinallatac ñucanchicca shuctacyachishcami cashun.

53Ñucanchic ismuclla cuerpoca mana ismuclla cuerpomi tucunga. Shinallatac ñucanchic huañunalla cuerpoca mana huañuna cuerpomi tucunga.

54Ñucanchic ismuclla cuerpo mana ismuclla cuerpo tucucpi, shinallatac ñucanchic huañunalla cuerpo mana huañuna cuerpo tucucpica, Dios quillcachishcapi nishcami pactanga. Chaipica: “Tucui millaita mishacmi huañuitaca chingachishca.

55Huañuica ña mana mishangachu. Cunanca mana ashtahuan nanachishpa, huañuchinata pudingachu” ninmi.

56Gentecuna juchallishcamantami, huañuica nanachishpa charicun. Mandashcacuna jucha tiyashcata ricuchicushcamantami, juchaca mandac tucushca.

57Ashtahuanpish ñucanchic Apunchic Jesucristomanta Taita Dios mishana cashcata ñucanchicman cushcamantaca, pagui nicunallami canchic.

58Shina cashcamanta ñuca c'uyashca criccuna, pi ama urmachichunca Apunchic Jesusta tucui shunguhuan crishpa c'atiraichic. Apunchic Jesuspac ruhuaitaca punzhanta ashtahuan ashtahuan ruhuacuichiclla. Apunchic Jesushuan shuc shinalla tucushcamantaca, cancuna imata ruhuashcapish mana yanga cashcataca cancunallatac yachanguichicmi.