APOCALIPSIS 11 - Nuevo Testamento en Quichua Cañar 1996

Diosmanta ishcai huillaccunamanta

1Chai q'uipaca shuc medina carrizo vara shinata ñucaman cucpimi, cashna nishcataca uyarcani:

—Jatari, Diosman mañana huasitapish, altartapish medi. Shinallatac chaipi Taita Diosman mashna mañaccunatapish yupai.

2Ashtahuanpish Diosman mañana huasi canzha pambataca ama medinguichu. Chaica Diosta mana ricsiccunaman cushcami. Paicunami chuscu chunga ishcai quillata Diospaclla cac pueblotaca ima shinapish llaquichinga.

3Chai punzhacunapica huaranga ishcai pasac sucta chunga punzhacunacaman ñucamanta huillachunmi, yana churanata churarishca ishcai huillaccunata cachasha— nirca.

4Chai ishcai huillaccunaca cai pachata mandac Taita Diospac ñaupapi shayacuc ishcai olivo yuracuna, shinallatac ishcai candelerocunami can.

5Chaicunaca maijanpish paicunata llaquichisha nicpica, shimimanta ninata llucchishpami rupachinga. Chashna rupachicpimi, maijanpish llaquichisha nicca huañunga.

6Chai ishcai huillaccunaca paicuna Diosmanta huillacui punzhacuna ama tamiachun jarcac canatapish charincunami. Shinallatac yacucunata yahuarman tigrachic canatapish, allpa pachapi ima tiyashcatapish tucui laya llaquicunahuan paicuna munashca shina llaquichic canatapish charincunami.

7Ña paicuna tucui huillashca q'uipaca, manchaipac animalmi ucu pacha jutcumanta llucshishpa paicunahuan macanacunga. Chashna macanacushpaca, paicunata atishpami huañuchinga.

8Chashna huañuchicpica, jatun pueblo ucupi tiyac callecunapimi paicunapac cuerpoca siricunga. Chai pueblollapitacmi paicunata Mandac Apunchic Jesustaca chacatashpa huañuchircacuna. Chashna jatun pueblo nishpaca, Sodoma pueblota, shinallatac Egipto llactatami chimbapurashpa nisha nin.

9Chai huañushcacunataca tucui aillucunamanta, tucui laya rimaita rimaccunamanta, tucui laya gentecunamanta, shinallatac tucui llactacunamantapish quimsa punzha chaupicaman siricuctami ricungacuna. Chashna ricushpapish, enterrachunca mana saquingacunachu.

10Diosmanta huillac chai ishcaicunaca cai pachapi causaccunataca yallitami llaquichishca carca. Chaimantami cai pachapi causaccuna chai ishcai huañushcata ricushpaca, yallitami cushicungacuna. Chashna cushicushpami, caishuc chaishuc imatapish caranacunga.

11Ashtahuanpish quimsa punzha chaupi tucucpica, causaita cuc espirituta Dios cachacpimi, paicunaca causarishpa jatarircacuna. Shinallatac chaita ricuccunaca yallitami mancharircacuna.

12Chai ishcai huillaccunaca: “¡Caiman huichicuichic!” nishpa, jahua pachamanta sinchita caparishcatami uyarca. Shina nicpica, paicunata p'iñaccuna ricucucpimi p'uyupi huichicurcacuna.

13Chai pachallatac yallita allpa chucchucpimi, chai pueblopi cac huasicunamantaca chungamanta shuc urmarca. Chashna urmacpica, canchis huaranga gentecunami huañurca. Mana huañushca gentecunaca manchaillahuantacmi jahua pacha Taita Diostaca “allimari cangui” nircacuna.

14Ishcai niqui llaquica tucurinmi. Shina cacpipish quimsa niqui llaquica ñallami chayamugrin.

Canchis niqui cornetapi tocashcamanta

15Canchis niqui angelmi paipac cornetapi sinchita tocarca. Chashna sinchita tocacpimi, jahua pachapi caccunaca:

—Tucui cai allpa pachapi

cac llactacunaca,

ñucanchic Taita Diospac,

shinallatac pai cachashca

Quishpichic Cristopac

mandanami tucushca.

Paimi huiñai huiñaita mandanga— nishpa, sinchita caparishcatami uyarcani.

16Shina caparicpimi Diospac ñaupapi cac, paicunapac tiyarinapi tiyacuc ishcai chunga chuscu yuyaccuna pambacaman cumurishpa, Taita Diosta alli nircacuna.

17Paicunaca cashnami nircacuna:

—¡Tucui imatapish ruhuac

Mandac Dioslla!

Cantaca pagui ninchicmi.

Canllatacmi cangui,

canllatacmi carcangui.

Tucui ima ruhuanatapish

canllatacmi charingui.

Shinallatac chaihuanmi

tucui mandanatapish callarishcangui.

18Tucui llactacunapi

causaccunami p'iñarishca.

Shina cacpipish can p'iñarishpa

llaquichina punzhami chayamushca.

Chai punzhaca

huañushcacunata taripana punzhami.

Chai punzhapica

cambacta ruhuac

canmanta huillaccunaman,

cambaclla caccunaman,

cambac shutita alli niccunaman,

jatunman cashpa, uchillaman cashpa

japina cashcataca cungui.

Shinallatac cai pachapi

llaquichiccunata tucuchina

punzhami chayamushca— nircacuna.

19Shina cacpica jahua pachapi tiyac Diosman mañana huasimi pascarirca. Chaipica Dioshuan ari ninacushcata huacaichina cajonmi ricurirca. Chashna ricuricpica urcucuna tulun nishcapish, rimashcacunapish uyarircami. Relampa achic nishcapish ricurircami. Allpapish chucchurcami, shinallatac ima mundo rundupish urmarcami.