ROMANOS 6 - Nuevo Testamento en Quichua Cañar 1996

Cristopac causacushpaca, ña mana juchata ruhuana cashcamanta

1Shina cacpica, ¿imatatac nishun? Taita Dios ashtahuan c'uyac cashcata ricuchichunca, ¿ashtahuan juchata ruhuashpa c'atishunllachu?

2¡Mana chashnachu cana can! Juchata ña mana ruhuangapacmi, ñucanchicca huañushca shina canchic. Shina cacpica, ¿ima shinatac juchata ruhuashpa c'atishunyari?

3Ñucanchic bautizarishpaca, tucuimi Jesucristohuan shuc shinalla tucushpa, paihuan huañungapac bautizarircanchic. ¿Chaitaca manachu yachanguichic?

4Taita Dios ima shinami paipac sumaimana imatapish ruhuaclla cashcahuan Cristota huañushcacunapuramanta causachirca, chai shinallatac ñucanchicpish mushuc causaita causangapac bautizarishpaca, Cristo huañushca shina huañungapac, shinallatac pai enterrarishca shina enterraringapac bautizarircanchic.

5Ima shinami Cristohuan huañungapac shuc shinalla tucurcanchic, chai shinallatacmi Taita Dios causachicpica, Cristo causarishca shina causarishun.

6Ñaupa ñucanchic ima shina causashcaca, Cristohuan chacatarishca shina cashcataca yachanchicmi. Chashnaca ñucanchicpi tiyac juchacuna ama mandashpa c'atichunmi, chai juchacunataca chingachishpa, Cristohuan chacatarishca shina canchic.

7Maijanpish huañushpaca, ña mana jucha mandashcachu causacun.

8Ñucanchic Cristohuan huañushca cashpaca, paillahuantac causana cashcatami crinchic.

9Cristo huañushcacunapuramanta causarishcatapish, ña mana huañuna cashcatapish yachanchicmi. Huañuica paitaca ña imata mana ruhuangachu.

10Tucuipac juchacunata chingachingapacmi, Cristoca shuc cutinlla huañurca. Ña causarishpaca, Taita Diospacllami causacun.

11Chashnallatac cancunapish juchata ruhuangapacca, huañushca shinami cana canguichic. Shina cashpapish Diospacta ruhuangapacca causacuc shinami, Cristohuan shuc shinalla cana canguichic.

12Shina cacpica, cancunapac huañunalla cuerpopi tiyac juchacuna mandashpa millaita ruhuachichunca, ama saquinguichicchu.

13Imapish mana allicunata cancunapac cuerpo ruhuachunca, mana saquinachu canguichic. Chaipac randica ña mana juchata ruhuangapac huañushpa, ña causarishca shina cancunapac cuerpotaca Diospacllata ruhuachun paillaman cuichic.

14Cancunaca mana Moisés mandashcacunata pactachishpa causana cashcapichu causacunguichic, ashtahuanpish Taita Diospac c'uyaimantami causacunguichic. Chaimanta juchaca cancunataca ña mana mandanachu can.

Cashcata ruhuaccuna cashcamanta

15Shina cacpica, ¿imatatac nishun? “Ñucanchicca mana mandashcacunata pactachishpa causana cashcapichu causacunchic, ashtahuanpish Taita Diospac c'uyaimantami causacunchic” nishpaca, ¿juchata ruhuashpa c'aticushunllachu? ¡Chaica mana chashnachu cana can!

16Shuc amota servingapac yaicushpaca, cazungapacmi yaicuna. Chaitaca cancunallatac yachanguichicmi. Shina cashpaca, chai amota serviccunami canguichic. Chai shinallatacmi jucha mandashcata ruhuacushpaca, huañuiman apac juchata servic shina juchata ruhuacunguichic. Ashtahuanpish Taita Diosta cazushpaca, paihuan alli tucuchun chasquishcacunami canguichic.

17Cancunaca utcapi jucha mandashca causacushpapish, cunanca Diosmanta ima shina yachacushcacunata tucui shunguhuanmi cazushcanguichic. Chaimantami Diostaca pagui nini.

18Jucha mandashca causacushcamanta ña cacharishca cashpaca, allita ruhuangapacmi Diosta serviccuna tucushca canguichic.

19Chashnaca cancunapac yuyaicuna mana entendinalla cacpimi, gentecuna entendinalla shinata rimani. Ima shinami utcaman cancunapac cuerpota imapish millanayaita, mana allita ruhuachun saquircanguichic, chai shinallatac cunanpish cancunapac cuerpotaca Diospaclla tucushpa, allita ruhuashpa servic cachun saquichic.

20Cancunaca jucha mandashca causacushpami, Diospacta allita ruhuanataca mana ruhuarcanguichic.

21Ashtahuanpish cunan pinganayachic juchacunata ñaupaman ruhuashcamantaca, ¿ima allitatac japircanguichic? ¿Chaicunaca manachu huañuiman apan?

22Ashtahuanpish cancunaca jucha mandashca causacushcamanta Taita Dios cacharichicpica, paita serviccunami tucushcanguichic. Chashna tucushpaca, Taita Diospaclla ch'icanyarishpa causashpa, huiñai causaita chasquishpami allita japircanguichic.

23Juchata ruhuashpa causacushcamantaca, huañuitami japina can. Ashtahuanpish ñucanchic Apunchic Jesucristohuan shuc shinalla caccunamanca, Taita Dios mai c'uyashpa, huiñai causaitaca yangami cun.