HEBREOS 7 - Nuevo Testamento en Quichua Cañar 1996

Jesusca Melquisedec shinallatac cura cashcamanta

1Melquisedecca Jatun Diospac curapish, Salem llactata mandacpish carcami. Taita Abraham jatun mandaccunahuan macanacushpa, mishashpa shamucpi Melquisedec tupangapac llucshishpaca, Taita Dios allicunata cuchun nircami.

2Chaimantami Abrahamca macanacuipi mishashpa japishcacunataca, chungamanta shucta Melquisedec curaman curca. Tucuimanta yallica, Melquisedec shutica: “Cashcata ruhuac jatun mandac” nisha ninmi. Shinallatac Salem llactata mandac nishpapish: “Sumac causaita cuc mandac” nisha ninmi.

3Melquisedecpac taita mamamantapish, paipac aillucunamantapish mana ima yacharinchu. Shinallatac pai huacharishcamantapish, huañushcamantapish pi mana parlanchu. Chashna cashcamanta Taita Diospac Churi shinallatacmi, paica huiñai causaicaman Diospacta ruhuac cura can.

4Chashna cashcamanta cunanca Melquisedectaca, mai jatun cashcatami ricunchic. Ñucanchic quiquin taita Abraham mandaccunahuan macanacushpa mishashpaca, chungamanta shuctami Melquisedecmanca curca.

5Moisés mandashcapish nishca shinaca, Levipac huahua huahuapurallami curacuna cana carca. Shinallatac paicunallami, israelcuna*f** chungamanta shucta cushcata japiccuna carca. Paicunapish, tucui israelcunapish Abrahampac huahua huahuacuna cashca jahuapish, chashnami ruhuac carcacuna.

6Ashtahuanpish Melquisedecca mana Levipac huahua huahuapura cashpapish, Dios cushami nishcacunata chasquic Abrahammanta chungamanta shuctami chasquirca. Chashnami, Melquisedecca Abrahamman Taita Dios allicunata cuchun nishpa mañarca.

7Maijanpish allicunata chasquicca, allicunata cuchun mañacmantaca mana yallichu. Chaitaca pipish mana chashnachu nishpaca, mana ningachu.

8Cai pachapi chungamanta shucta chasquiccunaca huañunalla runacunami, ashtahuanpish Melquisedecmanta nishpaca, mana huañushca shinatami Dios quillcachishcaca huillan.

9Levipac huahua huahuacunapuramanta cunan chungamanta shucta japic curacunaca, Abraham Melquisedecman cushca shinami paicunapish cuncuna.

10Chashna nishpaca, Melquisedec Abrahamta tupangapac llucshicpica, Levipac huahua huahuapuracunaca manarac huacharishpa, Abrahampac cuerpopirac cashcatami ninchic.

11Israelcunaca Levimanta cac curacunamantami Moisés mandashcacunataca chasquirca. Paicunaca Aaronpac huahua huahuacunapurami carca. Cai curacuna gentecunata allita allichina cashca cacpica, cutin shuc curaca mana ricurinachu carca. Chaica mana Aarón layachu cana carca, ashtahuanpish Melquisedec cura layami cana carca.

12Shuctac cura shamucpica, mandashcacunapish shuctacyarinmi.

13Chashna nishpaca, Apunchic Jesusmantami shina nicun. Paica mana Levipac huahua huahuapurachu carca. Paipac ñaupa taitacunaca jaicapi mana curacunachu cashca.

14Ashtahuanpish ñucanchic Apunchic Jesusca Judapac aillupuramantami carca. Shina cashpapish Moisesca cai aillupuramanta curacuna shamuna cashcataca, jaicapi imata mana nircachu.

15Cai ñucanchic nicushcaca, Melquisedec shina shuc mushuc cura ricuricpica, chashnatac cashcatami ashtahuan ricuchin.

16Mandashcapi nishca shinaca, “cai aillumanta, chai aillumanta shamunga” nishca curaca mana carcachu, ashtahuanpish imatapish ruhuaclla mana tucuric causaimantami carca.

17Shina cashcamantami Dios quillcachishcapica:

“Canca Melquisedec shinallatacmi,

huiñai huiñaipac cura cangui” nin.

18Shina cashcamantami ñaupa mandashcataca imapac mana alli cacpi, mana ruhuaipac cacpi anchuchishca carca.

19Moisés mandashcacunata pactachishpaca, mana pi allitacca tucurcachu. Chaipac randimi Taita Diospacman chayaringapacca, shuc sumac shuyana cashcata shuyacunchic.

20Taita Diosca Jesustaca: “Huiñaipac cura cachunmi nini” nishpaca, paipac shimihuantacmi nishca. Caishuc curacunataca mana chai shina nishcachu,

21ashtahuanpish Apunchic Jesusllatami Taita Diosca chashna nishca. Chaimantami Taita Dios Pai quillcachishcapica:

“Ñuca shimihuan pactachishatacmi

nishcataca mana shuctacyachisha.

‘Canca huiñai huiñaipacmi

cura cangui’ nini” nishca.

22Chashna cashcamantami punta ari ninacushcata atishpa, Jesusca Pai pactachishcamanta, mushuc ari ninacuica ashtahuan valishcata ricuchin.

23Caishuc curacuna causacuchunllaca, huañuica mana saquircachu. Chaimantami tauca curacuna tiyashca.

24Ashtahuanpish Apunchic Jesucristoca jaicapi mana huañunchu. Shinallatac paipac ruhuanapish, curacunapac ruhuana shinaca mana shuctacyanchu.

25Paimanta Taita Diosman cuchuyaccunataca, huiñai huiñaipacmi quishpichin. Paicunamanta mañangapacmi, paica huiñai huiñaita causacun.

26Ñucanchic charishun nishca shinami, Jesusca curacunata jatun mandac cura can. Paica jucha illac, ima mapa illac, ima millaita mana ruhuac, shinallatac juchayuccunamantapish anchurishcami can. Paitaca jahua cielomanta yalli jahuapimi Taita Diosca churashca.

27Jesusca mana caishuc curacuna shina puntaca paipac juchacunamanta, chai q'uipaca tucui gentecunapac juchacunamanta animalcunata Taita Diosman cushpa, rupachic cura shinachu, ashtahuanpish Apunchic Jesucristoca huiñaipac shuc cutinlla huañushpami, paillatac Taita Diosman curishpa huañurca.

28Moisés mandashcaca juchayuc runacunatami curacunata jatun mandac cura cachun nin, ashtahuanpish Taita Dios paipac shimihuantac ari nishpaca, Moisés mandashcacunamanta q'uipa cashpapish, huiñaita pactachic paipac Churitami curacunata jatun mandac cura cachun nin.