TITO 2 - Nuevo Testamento en Quichua Cañar 1996

Cashcallatac yachachinamanta

1Can yachachicushpaca, Diosmanta yachachishca shinata c'atishpa yachachingui.

2Ñaupa huiñai taitacunataca mana p'iñaric, mana pucllaric, alli yuyaiyuc, alli cric, c'uyac, mana p'iñarishpa llaquita apac cachun yachachingui.

3Shinallatac ñaupa huiñai huarmicunataca criccuna ima shinami causana shinallatac causashpa, mana huashalla parlaric, mana machac, ashtahuanpish allita yachachishpa causachun yachachingui.

4Ñaupa huiñai huarmicunaca chashna causashpami, q'uipa huiñai huarmicunataca cusata c'uyanatapish, huahuacunata c'uyanatapish yachachina can.

5Shina yachachicpimi, paicunapish alli yuyaihuan purishpa quiquinllatac huacaichirinatapish, cusata cazunatapish, shinallatac huasipi ima tiyashcata allita ricunatapish yachacunga. Shina cacpimi, Diosmanta huillashcataca pipish mana allichu nishpa mana rimangacuna.

6Shinallatac q'uipa huiñai mosocunatapish alli yuyaihuan purichun yachachingui.

7Ima ruhuaipipish canrac allita ruhuashpa ricuchingui. Yachachicushpapish ama pucllarishpa, ama nic tucushpalla yachachingui.

8Shinallatac ama pi juchanchichunca, rimana cashcallata rimangui. Shina rimacpimi, maijanpish ñucanchicta p'iñaccunaca pingashpa, mana imata ni pudingacuna.

9Amocunata serviccunataca amocunata cazuchun, shinallatac amocunahuan mana churarishpa, amo tucui munashcata ruhuachun yachachingui.

10Ñucanchicta Quishpichic Diosmanta yachachishca sumac ricurichunca, ama pipacta shuhuashpa, ashtahuanpish ima ruhuanapipish alli nishca cachun yachachingui.

11Taita Dios tucui gentecunata quishpichisha nishpa, mai c'uyac cashcata ricuchishcamantami, chashnaca yachachina cangui.

12Chai c'uyaimi mana allita ruhuanatapish, mana alli munaicunatapish saquinata yachachishpa, cai pachapica alli yuyaihuan allillata ruhuashpa, Diosta cazushpa causanata yachachicun.

13Shinallatac chai c'uyaimi, ñucanchicta Mandac Dios Quishpichic Jesucristo sumaimana cashcahuan, cutimuna cushicui punzha pactanata shuyanata yachachicun.

14Paica juchacunata anchuchishpa tucui millaimanta quishpichingapac, shinallatac paipaclla cashpa imapish allita ruhuaccuna cachunmi, ñucanchicmanta llaquita apashpa huañurca.

15Cai ñuca nishcacunata yachachicushpaca, cunashpa shinallatac mana allita ruhuaccunataca canllatac rimashpa cazunata yachachingui. Ama pi canta mana alli nishpa rimachun saquinguichu.