HEBREOS 1 - Nuevo Testamento en Quichua Cañar 1996

Taita Diosca paipac Churita cachashpa huillachishcamanta

1Ñaupa huatacunapica ñucanchic taitacunamanca, tauca cutinmi ima shinapish paimanta huillaccunata cachashpa, Taita Diosca huillachirca.

2Shina cacpipish cunan tucuri punzhacunapica, paipac Churitami ñucanchicmanca huillachirca. Taita Diosca Paillahuantacmi, cai pachatapish ruhuarca. Shinallatac tucui ima tiyashcatapish, Paillamantacmi cushca.

3Diospac Churica Dios ima shina sumaimana achiclla cashcatami ricuchicun. Diosca Pai shinallatacmi can. Diospac Churica tucui ima tiyashcatapish, paipac imatapish ruhuaclla cashca rimashcahuanmi mandacun. Paica ñucanchic juchata p'ichashca q'uipami, jahua pacha Taita Dios maipi mandacucpi alli maquiman tiyarigrirca.

Diospac Churica angelcunata yalli cashcamanta

4Taita Diospac Churica pai japinata charishcamantami, angelcunata yalli imatapish mandanata chasquishca. Chaimantami angelcunata yalli tucushca.

5Taita Diosca maijan angelcunatapish:

“Canca ñuca Churimi cangui,

cunanca ñuca Huahuatacmi cangui”

nishpaca, jaicapi mana nishcachu.

Shinallatac maijan angelmantapish:

“Ñucaca paipac Taitami cani,

paica ñuca Churimi can”

nishpaca, jaicapi mana nishcachu.

6Ashtahuanpish Dios quillcachishcapi Taita Dios paipac shuclla Churita cai pachaman cachasha nishpaca:

“Tucui ñuca angelcuna

paita alli ninguichic” ninmi.

7Taita Diosca angelcunamanta nishpaca:

“Ñuca angelcunaca

huaira shina cachun,

shinallatac ñucata servic

paicunaca nina japirishpa,

c'unyacuc shina cachun” ninmi.

8Ashtahuanpish paipac Churimanta nishpaca:

“Canca huiñai huiñaita

Mandac Diosmi cangui.

Shinallatac can mandashpaca,

imapish cashcata ruhuashpami mandangui.

9Canca allita ruhuanataca c'uyashcanguimi.

Mana allita ruhuanataca p'iñashcanguimi.

Chaimantami cambac Taita Diosca,

caishuccunamanta yalli

canman cushicuita cungapac

canta acllashcani” ninmi.

10Shinallatac Taita Diosca:

“¡Mandac Dioslla!

Canllatacmi cai allpatapish,

maipi ima manarac tiyacpi ruhuarcangui.

Canllatacmi jahua pachatapish ruhuarcangui.

11Tucui chaicunaca tucuringami,

ashtahuanpish Canca causacunguillami.

Tucui chaicunaca churana

tucuric shinami tucuringa.

12Canca churanata pataric shinami,

chaicunataca pataringui.

Shuctac churanata churachic shinami,

shuctacyachingui.

Shina tucucpipish Canca

Canllatacmi cangui,

shinallatac huiñaita causacunguillami” ninmi.

13Taita Diosca maijan angeltapish:

“Ñuca canta p'iñaccunata

cambac chaqui sarunapi churangacaman,

ñuca alli maquiman tiyacuilla”

nishpaca, jaicapi mana nishcachu.

14Shina cacpica angelcunaca, ¿imatac canga? Angelcunaca Diospacta ruhuachun churashca espiritucunallami, shinallatac quishpirinata chasquiccunata ayudachun cachashcacunallami.