APOCALIPSIS 1 - Nuevo Testamento en Quichua Cañar 1996

Q'uipa punzha imalla tucunata Jesucristo Juanman ricuchishcamanta

1Cai ricuchinataca Jesucristo paipacta ruhuaccunaman utca ima tucuna cashcata huillachunmi, Taita Diosca curca. Jesucristoca angelta paipacta ruhuac Juanpacman cachashpami caicunataca ricuchirca.

2Taita Dios ima nishcataca Jesucristo ñucaman huillacpi, chaita allita ricushpa huillac Juanmi cani.

3Cai huillashcacuna pactana punzhaca ñami chayamucun. Chaimanta maijanpish cai huillashcata rizacman, shinallatac cai rizashcata uyashpa cazucmanca, mai cushicuimi canga.

Canchis pueblopi causac criccunaman Juan quillcashcamanta

4Ñucaca Juanmi cani. Ñucami Asia llactapi cac canchis pueblopi tandanacushca criccunaman quillcani. Taita Dios cancunata mai c'uyashpa sumac causaita cuchunmi munani. Paica sarunpish, cunanpish, shinallatac shamucpish paillatacmi can. Shinallatac Diospac mandashpa tiyarina ñaupapi cac canchis Espiritupish allicunata cancunaman cuchunmi munani.

5Shinallatac cai pachapi tiyac jatun mandaccunata Mandac, huañushcacunapuramanta punta causaric Jesucristo cancunaman sumac causaita cuchunmi munani. Paica Diosmanta allita huillacmi. Jesucristoca c'uyac cashpami paipac yahuarta jichashpa, juchapi huatashca shina causacucpi ñucanchictaca cacharichirca.

6Shinallatac paimi ñucanchictaca paihuan mandaccuna cachun, paipac Taita Diospacta ruhuac curacuna cachunpish ruhuarca. ¡Jesucristotaca tucui mashna huiñaita “Jatun Mandacmi cangui, allimari cangui” nichun! Chashna cachun.

7¡Cristoca ñallami p'uyupi shamunga! Paitaca tucuimi ricunga. Shinallatac paita chacatashpa huañuchiccunapish ricungami. Tucui cai pachapi causac gentecunapish ricushpaca, shungupi huactarishpami paimanta huacangacuna. ¡Chaica chashnatacmi canga! Chashna cachun.

8Sarunpish, cunanpish, shinallatac shamucpish tucui imatapish ruhuac Mandac Diosca: “Ñucami callari A shina, tucuri Z shina tucuita callarichicpish, tucuchicpish cani” ninmi.

Sumaimana achicyachicuc Cristota Juan ricushcamanta

9Ñucaca Jesucristomanta cancunapac huauqui Juanmi cani. Ñucaca Jesucristohuan shuc shinalla cashpami, cancunahuan pacta Dios mandacucpi cashpa, llaquita apashpa c'uyac shunguhuan ima llaquitapish apana yuyailla cani. Taita Dios Jesusman huillachishcata ñuca huillashcamantami, yacu chaupipi cac Patmos llactapi prezu carcani.

10Chaica domingo punzhapi Diospac Espíritu japicpimi, ñuca huashamantaca shuc cornetapi tocac shina sinchita rimashca uyarishpaca:

11—Cai can ima ricushcataca shuc libropi quillcashpa, Asia llactapi tiyac canchis pueblopi causac tandanacushca criccunaman cachai. Chaicunaca Efeso pueblo, Esmirna pueblo, Pérgamo pueblo, Tiatira pueblo, Sardis pueblo, Filadelfia pueblo, shinallatac Laodicea pueblomi— nirca.

12Shina nicta uyashpami ñuca ricungapac tigrarishpaca, canchis curi candelerocunata ricurcani.

13Chai canchis candelerocunapac chaupipica, Runa Tucungapac shamushcaman*f** ricchatami ricurcani. Paica chaqui pambacaman churanata churashca, shinallatac curimanta ruhuashca chumbita pechopi churashcami carca.

14Paipac uma acchapish yuraclla millma shina, mana cashpaca yuraclla rasu shinami carca. Shinallatac paipac ñahui murucunapish nina jagan nicuc shinami carca.

15Paipac chaquicunapish bronceta ninapi rupachishpa llambushca shinami jagan nicurca. Shinallatac paipac rimashcaca yacucuna huactarishpa huaj nicuc shinami carca.

16Paipac alli maquipica canchis lucerocunatami charicurca. Paipac shimimantaca ishcai filoyuc puntasapa espadami llucshicurca. Shinallatac paipac ñahuica inti tucuita achicyachicuc shinami carca.

17Chaita ricushpaca, huañushca shinami paipac chaqui pambaman urmarcani. Shina cacpipish paipac alli maquita ñuca jahuapi churashpaca, cashnami nirca:

—Ama mancharichu. Ñucami tucuita callarichicpish, tucuchicpish cani.

18Ñucaca huañushpapish causacunimi. Cunanca huiñaipacmi causacuni. Ñucami huañuipacpish, ucu pachapacpish llavecunata charicuni.

19Can imata ricushcatapish, cunan ima tucushcatapish, shinallatac q'uipaman imalla tucuna cashcatapish quillcai.

20Ñuca alli maquipi canchis lucerocunata charicushcaca, shinallatac canchis candelerocunata can ricushcaca caitami nisha nin: Canchis lucerocunaca, canchis pueblocunapi cac tandanacushca criccunapac angelcunami. Shinallatac canchis candelerocunaca, canchis pueblopi cac tandanacushca criccunami.