HEBREOS 6 - Nuevo Testamento en Quichua Cañar 1996

1Chaimanta utcaman Cristomanta callari yachanacunataca, ama chaillatatac, chaillatatac yachacucuichicchu, ashtahuanpish alli yachaccuna cangapac allita yachacushun. Diosman cutirina, shinallatac ima shina crina yuyaicunataca, ama chaillatatac, chaillatatac yachacuccuna tucushunchic. Huañuiman apacuc ima millaicunatapish, ama ruhuashunchic.

2Bautizarinamantapish, criccunapac uma jahuapi maquita churanamantapish, huañushcacuna causarinamantapish, huiñaita jatun llaquiman cachanamantapish ama cutinllatac yachacushunchic.

3Taita Dios munacpica, alli yachaccuna cangapac allita yachacushun.

4Maijanpish Taita Dios yuyaita achicyachicpi, mishquilliric shina Dios cushcacunata yachashpa, Diospac Espiritutapish chasquishpa,

5Diospac sumac rimashca shimitapish, shamuc punzhapi Taita Dios imata ruhuana cashcatapish yachac chayashca jahua,

6“ña mana c'atishachu” nishpaca, Taita Dioshuan alli tucungapac cutinca ña mana tigrari pudinchu. Chaicunamanca mana yachachinachu canchic, ashtahuanpish paicunallatacmi Diospac Churitaca tucuipac ñaupapi pucllashpa, cutin chacatacuc shina ruhuancuna.

7Allpa achca tamia urmacpi, yacuta sungashpa imatapish ruhuaccunaman alli granota p'ucuc shina cacpimi, Taita Dios cushca allicunataca japincuna.

8Ashtahuanpish cashallata, mana alli q'uihuallata p'ucushpaca, imapish mana alli allpa shina cashcatami ricuchin. Chaicunataca Dios p'iñarishpami ñalla tucuchinga.

Jesucristo yuyailla alli canamanta

9C'uyashca criccuna, cashna rimashpapish cancuna imatapish allita ruhuashpa, quishpirinaman pushac alli ñanta c'aticushcatami yachanchic.

10Cashcata ruhuac Taita Diosca cancuna imata ruhuashcatapish, paipaclla caccunatapish cunan ima shina ruhuacuc shinallatac c'uyaihuan servishpa causacuccunataca, manatac cungaringachu.

11Cancuna shuyacushcata Taita Dios tucui pactachingacaman, chashna alli c'aticushcata ricuchichunmi munanchic.

12Q'uillacuna tucuchunca mana munanchicchu, ashtahuanpish crishcamanta mana p'iñaric, alli shunguhuan Dios cusha nishcata japiccuna cachunmi munanchic.

13Taita Diosca paimanta yalli pi mana tiyacpimi, taita Abrahammanca paipac quiquin shimillahuantac cushami nishca.

14Paica: “Canmanca imatapish achca allicunatami cusha, shinallatac canmantami achcata mirachisha” nishcami.

15Abrahamca mana p'iñarishpa, alli shunguhuan shuyacushpallami, Taita Dios cushami nishcataca chasquirca.

16Gentecunaca maijan cashpapish, mana llullacushcata ricuchingapacca paicunamanta yalli jatunpac shutipimari nincuna. Shina ari nishca q'uipaca, imatapish cutinca ña mana nincunachu.

17Taita Diospish pai cushami nishcata japiccunamanca, imatapish mana shuctacyachishpa, pai cushami nishcataca paipac quiquin shimihuanmi pactachirca.

18Taita Diosca paipac shimihuan cushami nishcamanta, shinallatac Dios manatac llullac cashcamantaca, pai cushami nishcata tucui shunguhuan shuyashpa, pai huacaichichun munaccunaca cushicuitami japishcanchic.

19Cai shuyacushca yuyaica, barcota charic llashac fierro anclas shinami, ñucanchic almataca alli sinchita chariracun. Shinallatac cai shuyacushcami, jahua pacha Diosman mañana huasipi tiyac, lienso pañu jarcashca Diospaclla ucuman ñucanchictaca yaicuchin.

20Apunchic Jesusmi chai ucumanca ñucanchic yaicuchun, ñanta pascashpa yaicurca. Paica Melquisedec cura shinallatacmi, huiñaipac curacunata jatun mandac cura tucurca.