HEBREOS 9 - Nuevo Testamento en Quichua Cañar 1996

Diospac huasica jahua pachapipish, cai pachapipish tiyashcamanta

1Punta ari ninacushcaca, cai pachapi Diosman mañana carpa huasipi ima shina Diosman ruhuana cashcallatacmi huillacurca.

2Chai carpa huasica cai shinami carca: Chai callari yaicushcallapica, Diospaclla ucumi carca. Chaipica candeleropish, Diosman cushca tandata churana mizapish carcami.

3Chaipac q'uipa jarcachishca ucuca, Diospaclla ch'icanyachishca ucumi carca.

4Chai ucupica, inciensota rupachingapac curimanta ruhuashca shuc altarmi tiyarca. Ari ninacuita ricuchic, muyundicta curimanta ruhuashca cajonpish tiyarcami. Chai cajonpica maná shuti tandata huacaichishca, curimanta ruhuashca mangapish, Aaronpac cutin huiñacuc verdella taunapish tiyarcami. Ishcai tabla rumipi Dios mandashcacunata quillcashcapish tiyarcami.

5Chai cajón jahuapica, Dios chaipi cashcata ricuchic alasyuc querubincunami*f** shayacurca. Chaicunaca juchayuc cashcamanta yahuarta shiguana tapata alashuan pacashpami shayacurca. Cunanca caicunamanta yachachinataca, ashtahuan mana munanichu.

6Tucui allichishca cacpica, curacunaca Diosman mañangapac, carpa huasipi tiyac yaicushcalla ucumanca punzhanta ima ruhuana cashcata ruhuangapacmi yaicuccuna carca.

7Ashtahuanpish chai yaicushcalla ucumanta, q'uipa ucumanca curacunata jatun mandac curallami huatapi shuc cutinlla yaicuc carca. Chaiman yaicushpaca, pai quiquinpac juchamantapish, imatapish mana yachashpa gentecuna juchallishcamantapish, Diosman cungapac animalcunata huañuchishca yahuartami apashpa yaicuc carca.

8Chashna cacpica Diospac Espiritumi, carpa huasi yaicushcalla ucu tiyashpa c'aticpica, Diospaclla ch'icanyachishca ucuman yaicuna manarac tiyashcata ricuchicurca.

9Tucui caicunaca cunan punzhacunapi yuyaita japingapacllami. Juchacunamanta Diosman animalcunata cushpa huañuchishcapish, imata paiman cushcapish Diosta alli niccunataca mana juchanchipac, alli yuyaiyuctaca mana ruhuanchu.

10Shina cacpica micunapish, ubianapish, Diospac ñaupapi alli ricuringapac maillarinapish, jahualla imata ruhuana cashcata ricuchicllami. Chaicunaca Dios shuc layata ruhuangacamanllami alli carca.

11Chashna cacpipish Apunchic Jesusca ñamari shamurca. Cunanca tucui ima allicunata ricuc curacunata jatun mandac curami. Pai cura shina ruhuana, Taita Diospaclla ucuca, ñaupa ucuta yalli alli sumac ucumi. Chaica mana cai pachapi cashcamanta mana gentecuna ruhuashcachu.

12Jesucristoca ña mana chivocunapac, bizicunapac yahuarta Taita Diosman cungapacchu Diospaclla ch'icanyachishca ucuman yaicushca, ashtahuanpish paipac quiquin yahuarta Taita Diosman cushpami, ñucanchicta huiñai huiñaicaman juchapi huatashca shinamanta cacharichingapac shuc cutinlla yaicurca.

13Huagracunapac yahuarpish, chivocunapac yahuarpish, altarpi bizita rupachishca uchupapish millaita ruhuacpac jahuapi shiguacpica, jahuallata chuyayachishpa, Diospacllata ruhuanmi.

14Shina cacpica, ¡Apunchic Jesuspac yahuarcarin, tucuimanta yalli valishcami! Paica huiñai huiñaita causacuc Diospac Espirituhuan cashpami, ima millaita mana ruhuac cashpapish, pai quiquinllatac Diosman curishpa huañurca. Paipac yahuarmi ñucanchic yuyaicunahuan mana allita ruhuashpa, huañuiman ricucpi p'ichashpa, causacuc Diosta servicta ruhuan.

15Dioshuanpish, gentecunahuanpish mushuc ari ninacuita pactachic Jesucristoca huañushpami, gentecuna puntaman ari ninacushcata mana pactachishpa, juchapi huatashca shinacunataca cacharichishca. Chai shinami Dios c'ayashcacuna pai cusha nishcata huiñai huiñaipac chasquichun ruhuarca.

16Imata cusha nishpa, quillcashca tiyacpica, chai cusha nishcata japingapacca, chai quillcata cuc huañuctaracmi shuyana can.

17Chai cushami nic manarac huañucpica, chai cushami nishca quillcaca mana valinchu, ashtahuanpish ña huañushca q'uipami, chai cusha nishcaca valin.

18Chaimanta ñaupa ari ninacushcapish, animalcunapac yahuarta jichashpami callarishca.

19Moisesmi tucui israelcunaman*f** Dios mandashcataca huillarca. Chai q'uipaca puca millmatapish, hisopo ramatapish, bizicunapac yahuarhuan, chivocunapac yahuarhuan, yacuhuanpish chapushpami, jucuchishpa Taita Dios mandashca quillcapi, tucui israelcunapac jahuapipish chiraparca.

20Chashna chirapashpami Moisesca: “Cai yahuarhuan Taita Dios cancunahuan ari ninacushcata ricuchishpa, ‘cazuichic’ ninmi” nirca.

21Moisesca carpa huasipipish, tucui chai ucupi Taita Diosta yuyaringapac cac imallacunapipish yahuartami chiraparca.

22Taita Dios ñaupaman quillcachishca shinaca, animalcunapac yahuarhuanmi juchacunata anchuchishca cana carca. Animalcunapac yahuarta jichashpallami, tucui imatapish chuyayachishca cana carca.

Cristo huañushpa, juchacunata anchuchishcamanta

23Taita Diosman cushpa, tucui cai ruhuanaca jahua pachapi cacman ricchacunata chuyayachingapacllami. Ashtahuanpish jahua pachapi tiyaccunamantacarin, animalcunata huañuchishca yahuartapish yallimi cuna can.

24Apunchic Jesusca jahua pachapi ima shina cacllata ricuchic, gentecunalla ruhuashca carpa huasimanca mana yaicurcachu, ashtahuanpish ñucanchicmanta Taita Diosman mañangapacmi, jahua pacha Diospac ñaupamantatac yaicurca.

25Curacunata jatun mandac curaca huatantami animalcunapac yahuarta Diosman cungapacca, Diospaclla ch'icanyachishca ucuman yaicun. Ashtahuanpish Jesusca mana cutin cutin yahuarta cungapac jahua pachamanca yaicurcachu.

26Chashna ruhuana cashca cacpica, Apunchic Jesusca Dios cai pachata ruhuashca punzhamanta pachaca, tauca cutinmi huañuna canman carca. Ashtahuanpish Apunchic Jesusca cunan punzhacunapica, huiñaipac shuc cutinlla ricurishpa, tucui gentecunapac juchacunata anchuchingapacmi, pai quiquinllatac Diosman curishpa huañurca.

27Shinallatac tucui mashnami shuc cutinlla huañuna canchic. Chai q'uipami Taita Dios taripana punzhaca shamunga.

28Shinallatacmi Apunchic Jesusca achca gentecunapac juchacunata p'ichangapacca, pai quiquinllatac curishpa huañurca. Q'uipataca ña mana juchacunata anchuchingapac shamungachu, ashtahuanpish paita shuyacuccunata quishpichingapacmi shamunga.