ROMANOS 3 - Nuevo Testamento en Quichua Cañar 1996

1Shina cacpica israel canaca, shinallatac circuncisionta ruhuashca canaca, ¿imapactac alli cangayari?

2Tucui chaicunaca imapacpish allimi can. Chaita ricuchingapacmi, puntaca Taita Diosca israelcunaman pai rimashca shimitaca cushca.

3Shina cacpica, paicunapuramanta maijancuna mana cazushpaca, ¿imashi tucunga? Paicuna chashna mana cazushcamantaca Diosca pai nishcataca, ¿manachu pactachinga?

4¡Chaica mana chashnachu! Tucui gentecuna llullac cacpipish, Taita Diosca ima nishcata pactachic cashcamantaca pactachingami. Dios quillcachishcapica: “Can imata nishcapish allillatacmi canga. Canman imata tapucpipish, mana juchanchishcachu llucshingui” ninmi.

5Cunanca gentecuna yuyashca shinami ñuca yuyaillamanta rimagrini: Ñucanchic mana allita ruhuashcacunallatac Taita Diosca cashcata ruhuac cashcata ricuchicpica, ¿imatatac nishun? ¿“Taita Dios llaquichicpica, millaimantami llaquichin” nishunchu?

6¡Chaica mana chashnachu! Shina cacpica, ¿ima shinatac Taita Diosca cai pachapi causaccunataca taripangayari?

7¿“Ñuca llullashcacunami Taita Dios sumac cashcata, shinallatac mana llullac cashcata ricuchin” ninachu cani? Shina cacpica, ¿ima nishpatac paica juchayucta shina llaquichinyari?

8Chashna cacpica Taita Dios sumacyachishca cachunca, ¿mana allicunata ruhuashpa c'atishunchu? Chai shinami maijancunaca, ñucata llaquichingaraicu “paica chashnami yachachin” nincuna. Ashtahuanpish chashna niccunataca llaquichina cashca shinallatacmi Taita Diosca llaquichinga.

Tucui mashna juchayuc cashcamanta

9Shina cacpica, ¿“ñucanchic israelcunaca*f** shuccunata atishpami allicuna canchic” nishunchu? ¡Chaica mana chashnachu! Israelcuna cashpapish, mana israelcuna*f** cashpapish, tucui mashna juchapi huatashca shina cashcataca ñami ricuchircani.

10Dios quillcachishcapica:

“Cashcata ruhuacca

shucllapish mana tiyanchu.

11Alli yuyaita charicpish,

pi mana tiyanchu.

Diosmanta yachasha nicpish,

pi mana tiyanchu.

12Tucuimi Diosmanta caruyashpa,

mana alliman tigrashcacuna.

Allita ruhuacca

shucllapish mana tiyanchu.

13Paicunapac shimi rimashcapish

sepulturata pascashca shinami.

Paicunapac c'allupish

llulla c'allumi.

Paicunapac parlanacushcapish

culebrapac veneno shinami huañuchin.

14Paicunaca pitapish ima llaquicuna

tucuchun munashpami rimarinacuncuna.

15Huañuchingapac callpana cacpipish,

paicunapac chaquicunaca utcami callpan.

16Paicuna maita purishpapish,

llaquichina yuyaillami purincuna.

17Pihuanpish sumacta causanataca

mana yachancunachu.

18Diosta manchana yuyaica

paicunapac yuyaipica mana tiyanchu” ninmi.

19Taita Dios taripana punzhapi tucui mashna imata mana nishpa upalla saquirichunmi, tucui Moisés mandashcacunaca chai mandashcacunata cazuccunaman huillacun. Chaitaca yachanchicmi.

20Taita Diosca mandashcacunata pactachishcallamantaca pitapish paihuan alli tucuchunca mana chasquingachu. Chai mandashcacunaca ñucanchic juchayuccuna cashcata ricuchingapacllami can.

Jesucristota crishpalla quishpirina cashcamanta

21Ashtahuanpish cunanca Taita Diosca mandashcacunata pactachishcallamantaca pitapish paihuan alli tucuchun mana chasquic cashpapish, ima shina paihuan alli tucuna cashcatami ricuchishca. Chaitaca Moisés mandashcacunapish, ñaupa huillaccunapish allimi huillan.

22Taita Diosca Jesucristota crishcamantami, tucui criccunata paihuan alli tucuchun chasquin. Taita Diospac ñaupapica tucui gentecunami chashnallatac can.

23Taita Dios quishpichisha nicucpipish, tucui mashna juchayuc cashcamantami paimanta caruyashpa causacushcanchic.

24Ashtahuanpish Taita Diosca Jesucristo juchapi huatashca shinamanta cacharichicpimi, c'uyashcallamanta paihuan alli tucuchun chasquin.

25Taita Diosca Jesucristotaca paipac yahuarta jichashpa, juchacunamanta quishpichichunmi cacharca. Quishpirinataca Jesucristota crishpallami chasquinchic. Chashnami Taita Diosca ñucanchic ñaupa juchacunata perdonashpa, ima shina paihuan alli tucuna cashcata ricuchisha nishca. Chashnaca pai mana p'iñaric cashcamantami ruhuarca.

26Taita Diosca cunanpish paihuan ima shina alli tucuna cashcata ricuchinmi. Chaimantami Jesusta criccunataca pai cashcata ruhuac cashca shinallatac, paicunatapish paihuan alli tucuchun chasquin.

27Shina cacpica, shuc runaca pai ruhuashcallahuanca Taita Diospac ñaupapica, ¡maitatac jatun tucungayari! ¿Imamantatac chashnaca canga? Chashna tucunaca mana mandashcacunata pactachishcamantachu, ashtahuanpish crishcamantami chashnaca tucun.

28Tucui caicunamanta yuyarishpaca, Taita Diosca mana mandashcacunata pactachishcamanta, ashtahuanpish Jesusta crishcamanta gentecunataca paihuan alli tucuchun chasquic cashcatami yachanchic.

29¿Taita Diosca israelcunapaclla Dioschu? ¿Manachu tucui gentecunapac Dios canga? Ari, shinami can. Taita Diosca tucuipac Diosmi can.

30Taita Diosca shucllami tiyan. Paimi circuncisionta*f** ruhuashca cacpi, mana ruhuashca cacpipish, Jesusta crishcallamanta pitapish paihuan alli tucuchun chasquin.

31Shina cacpica Jesusta crishcamantaca, ¿Moisés mandashcacunataca yangapi churanchicchu? ¡Mana chashnachu! Ashtahuanpish chai mandashcacuna alli cashcatami ricuchinchic.