ROMANOS 16 - Nuevo Testamento en Quichua Cañar 1996

Pablo paipac ricsishcacunata “allilla cashca cachun” nishcamanta

1Jesusmanta ñucanchic pani Febetami alli chasquichun nini. Paica Cencrea pueblopi tandanacushca criccunata ayudacmi.

2Shuccunatapish, ñucatapish ayudac cashcamantami, paiman ima illashcatapish cushpa, ñucanchic criccunapurapi chasquina cashca shinallatac Apunchic Jesuspac shutipi chasquichun nini.

3Ñucahuan Apunchic Jesuspacta ruhuaccunataca Priscilatapish, Aquilatapish “allilla cashca cachun” nichic.

4Paicunaca ñucata quishpichingaraicumi ashallamanta mana huañurcacuna. Chaimantaca mana ñucallachu pagui nini, ashtahuanpish caishuc cric mana israelcunapish*f** pagui nincunami.

5Shinallatac Priscilapac, Aquilapac huasipi tandanacuc criccunatapish “allilla cashca cachun” nichic. Asia llactapi causac ñucahuan mai apanacuc Epenetotapish “allilla cashca cachun” nichic. Paimi chai llactapica Jesucristota punta cric carca.

6Shinallatac cancunaman allita ruhuac Mariatapish “allilla cashca cachun” nichic.

7Ñuca llactamanta cac Andronicotapish, Juniastapish “allilla cashca cachun” nichic. Paicunami ñucahuan carcelpi huichcashca carcacuna. Jesús acllashca huillaccunapuramantapish alli nishcacunami can. Paicunaca ñucapac ñaupa criccunami.

8Jesusta cric cashcamanta ñucahuan mai apanacuc Ampliatotapish “allilla cashca cachun” nichic.

9Shinallatac ñucahuan Jesucristopacta ruhuac Urbanotapish “allilla cashca cachun” nichic. Ñucahuan mai apanacuc Estaquistapish “allilla cashca cachun” nichic.

10Shinallatac Cristota crishcamanta llaquita apac Apelestapish “allilla cashca cachun” nichic. Aristobulotapish paipac familiacunandic “allilla cashca cachun” nichic.

11Ñuca llactamanta cac Herodiontapish, Apunchic Jesusta cric Narcisotapish paipac familiacunandic “allilla cashca cachun” nichic.

12Apunchic Jesuspacta ruhuac Trifenatapish, Trifosatapish “allilla cashca cachun” nichic. Shinallatac ñucahuan mai apanacuc Persidepish cai tucuita Apunchic Jesuspacta ruhuac cashcamantaca, paitapish “allilla cashca cachun” nichic.

13Shinallatac Apunchic Jesusta cric alli nishca Rufotapish paipac mamandic “allilla cashca cachun” nichic. Paipac mamaca ñucapac quiquin mama shinami cashca.

14Asincritotapish, Flegontetapish, Hermestapish, Patrobastapish, Hermastapish shinallatac paicunahuan cac tucui criccunatapish “allilla cashca cachun” nichic.

15Filologotapish, Juliatapish, Olimpastapish, Nereotapish paipac panindic, shinallatac paicunahuan cac tucui criccunatapish “allilla cashca cachun” nichic.

16Chuya shunguhuan muchashpa, caishuc chaishuc “allilla cashca cachun” ninacuichic. Cristota cric tucui tandanacushca criccunapish “allilla cashca cachun” nishpami cachancuna.

17C'uyashca criccuna, pandachishpa ch'icanyarinapi churaccunamantaca cancunallatac huacaichirichic, ninimi. Chaicunaca cancuna yachacushcacunata mana cazushpami, chashnaca ruhuancuna. Paicunamantaca ch'icanyarichic.

18Chashna ruhuaccunaca paicunapac munaicunallata ruhuashpami, Apunchic Jesuspactaca mana ruhuancuna. Paicunaca mishquilla, shinallatac uyanalla rimaicunata rimashpami, manarac alli yachac gentecunataca pandachincuna.

19Cancuna alli huillaita cazuccuna cashcataca tucuimi yachancuna. Chaimantami cushicuni. Shinallatac cancuna yachac cashcata ricuchingapacca, millaita mana ruhuashpa ashtahuanpish allita ruhuashpa ricuchichunmi munani.

20Chashnami sumac cushicui causaita cuc Taita Diosca Satanastaca*f** cancunapac chaqui sarunapi ñalla churanga. Ñucanchic Apunchic Jesusca cancunata mai c'uyashpa allicunata cushca cachun.

21Ñucahuan Diospacta ruhuac Timoteopish “allilla cashca cachun” nishpami cachan. Ñuca llactamanta cac Luciopish, Jasonpish, Sosipaterpish “allilla cashca cachun” nishpami cachancuna.

22Cai quillcapi Pablo imalla nishcata quillcac Terciopish, Apunchic Jesusta cric cashcamanta “allilla cashca cachun” nishpami cachani.

23Shinallatac ñucatapish, tandanacushca criccunatapish pozachic Gayopish “allilla cashca cachun” nishpami cachan. Cai pueblopac cullquita tandachic Erastopish, Jesusmanta huauqui Cuartopish “allilla cashca cachun” nishpami cachancuna.Tucuchingapac Taita Diosman mañashcamanta

25¡Alli huillaita ñuca huillashca shina, shinallatac Jesucristomanta yachachishca shina cancunata alli c'aticta ruhuac Taita Diostaca alli nishunchic! Pai chashna ruhuashpaca, cai pachata manarac ruhuashca punzhamanta pacha pacashca tiyacushcatami ricuchin.

26Huiñaita causacuc Taita Dios mandashca shinami, cunanca chai pacashcataca ñaupa huillaccuna quillcashca shina ricuchin. Cai pacashcataca tucui cai pachapi causaccuna crishpa cazuchunmi ricuchishca.

27¡Tucuita yachac, shuclla Taita Diosca Jesucristomanta huiñai huiñaita sumacyachishca cachun! Chashna cachun.