HEBREOS 5 - Nuevo Testamento en Quichua Cañar 1996

1Tucui curacunata jatun mandac curacunami, gentecunapuramanta Diospacta ruhuachun Dios acllashca can. Paicunaca tucui gentecunapac juchacunamanta Diosman imallata cushcacunata chasquishpa cungapac, animalcunata huañuchishpa Diosman cungapacpish acllashcami can.

2Curacunapish juchapi urmanalla cashcamantami, caishuc mana yachac chingarishca shina gentecunamantaca llaquinga.

3Chai curacunaca quiquinpish urmanalla cashcamantami, paicunapac juchacunamanta, shinallatac tucui gentecunapac juchacunamanta animalcunata Diosman cushpa, rupachina can.

4Maijan cura cashpapish, pai quiquinllatacca jatun mandac cura cangapacca mana acllarinchu, ashtahuanpish Taita Dios Aaronta shina alli cachun acllashcacunallami, jatun mandac cura canga.

5Chai shinallatacmi Jesucristoca mana pai quiquinllatac jatun mandac cura tucurca. Ashtahuanpish Taita Diosmi paita alli cachun acllashpaca:

“Canca ñuca Churimi cangui,

cunanca ñuca Huahuatacmi cangui” nirca.

6Shinallatac Dios quillcachishcapi maipitapishcharica:

“Canca Melquisedec shinallatacmi,

huiñai huiñaipac cura cangui” ninmi.

7Apunchic Jesucristoca cai pachapi causacushparacmi, huañuimantapish quishpichic Taita Diosmanca caparishpa, huacashpa mañarca. Jesusca Pai mandashcata ruhuac cashcamantami, Taita Diosca uyarca.

8Apunchic Jesucristoca Diospac Churi cashpapish, llaquita apashpami pactachina cashcata yachacurca.

9Chai shina llaquita apashpa, Taita Dios ima nishcata tucui pactachishpami, maijanpish paita cazuccunapacca huiñaita Quishpichic tucurca.

10Melquisedecta shinami, Taita Diosca curacunata jatun mandac cura cachun paitaca churashca.

Crinata mana saquina cashcamanta

11Caicuna jahuaca achcatami rimana canchic. Shina cacpipish cancuna imapish mana utca entendiclla cashcamantami, cancunaman huillanaca sinchi can.

12Cancunaca cai tucui huatacunapica, ña yachachiccunami cana carcanguichic. Shina cashpapish cutin callarishpa, Diosmanta yachachinacunami tucushcanguichic. Cancunaca sinchi micuita micuc shina sinchiyanapac randica, huahuacuna lechellata micuc shinami huahuayashcanguichic.

13Pipish chuchucuc huahuacuna shina lechellahuan causacushpaca, imapish cashcata ruhuanataca mana yachanchu.

14Pipish sinchi micuita micucca ña yuyaita charishpami, imatapish taripashpa, allitapish, mana allitapish yachashpa causan.