SANTIAGO 1 - Nuevo Testamento en Quichua Cañar 1996

“Allillachu canguichic” nishpa, Santiago quillcashcamanta

1Ñucaca Diospacta, Apunchic Jesuspacta ruhuac Santiagomi cani. Israelpac*f** chunga ishcai aillucuna shiguarishpa, caipi chaipi causac criccunata “allillachu canguichic” nishpami, cai quillcata cachani.

Llaquicuna japicpipish cushicuna cashcamanta

2Ñuca c'uyashca criccuna, cancunata ima llaquicuna japicpipish, cushicuita cuna cashcatami yuyana canguichic.

3Cancuna cric cashcamanta ima llaqui japicpica, mana p'iñarishpa, alli shunguhuan llaquicunata apana cashcatami yachacunguichic. Chaitaca ña yachanguichicmi.

4Ashtahuanpish tucuimanta yallica mana p'iñarishpa, alli shunguyuc canata yuyaichic. Chashna cashpami alli sinchiyashpa, imapish mana illac, pipish mana juchanchipac, alli criccuna canguichic.

5Cancunapuramanta maijanpish yachaita mana charishpaca, Diosman mañaichic, paica cungallami. Diosca pimanpish mana misarishpami, tucui mañaccunamanca achcata cunga.

6Ashtahuanpish cancuna Diosman mañashpaca, tucui shunguhuan crishpami, japina yuyailla mañana canguichic. Maijanpish jahua shungullahuan mañacca, cucha yacu huairahuan caiman chaiman cuyucuc shinallami can.

7Maijanpish chashna mañacca Mandac Diosmanta imatapish japina cashcata ama yuyachun.

8Chashna mana shuc yuyailla cashpami, cunanca cai shina yuyan, cutin cayandicca shuc layata yuyan. Chashna cashpaca, tucui causaipimi mana alli causan.

9Maijan cric imata mana charishpapish, Dios jatunyachina cashcamantaca cushillami cana can.

10Shinallatac chayucpish pai charishca ima mana cashcata Dios ricuchicpi, cushillami cana can. Chayucca q'uihua sisa shina tucuriclla cashcamantaca, chingarinallami can.

11Sisaca inti llucshishpa, sinchita rupacyachishpa, q'uihuata chaquichicpica urmanllami. Chaipimi pai sumac cashcaca chingarin. Chai shinallatacmi chayucpish, paipac randina, c'atuna cashcata saquishpa chingaringalla.

Mana alli munaicuna shamucpi, mishana cashcamanta

12Imapish mana alli munaicuna shamucpi, chaita mishacmanca mai cushicuimi canga. Chashna mishacmi Dios paita c'uyaccunaman cusha nishca huiñai causai coronataca japinga.

13Maijantapish mana alli ruhuana munaicuna japicpica, “Diosmi chai munaitaca cun” nishpa, ama yuyachun. Diosca jaicapi ima mana allita mana ruhuanchu. Chashna cashcamanta Dios mana allita ruhuachicushcataca ama yuyachun.

14Ashtahuanpish quiquinllapitac mana alli munaicuna tiyashcamantami, chai mana alli munaicunaca mishquilliric shina, mana allita ruhuanaman pushan.

15Chai shina mana alli munaicuna tiyashcamantami, juchaca huacharic shina ricurin. Chai jucha ricurishpa miramushpaca, huañuimanmi apan.

16Ñuca c'uyashca criccuna, ama pandarichicchu.

17Jahua pachapi imalla tiyashcatapish ruhuac Diosmantami, ima allita ruhuana yuyaipish, cashcata ruhuana yuyaipish shamun. Diosca huiñai huiñaicamanmi Paillatac can. Paica mana shuctacyashpa, huiñaitami achicyachicungalla.

18Diosca chai shina munashcamantami, cashcata nic alli huillaita huillashpa, ñucanchicmanca causaita curca. Tucui pai ruhuashcacunamanta ñucanchic punta cachunmi, chashnaca ruhuarca.

Alli huillaita huillashcata pactachina cashcamanta

19Ñuca c'uyashca criccuna, imapish uyanallataca alli uyaichic. Shinallatac rimaringapacpish, p'iñaringapacpish jarcariccuna caichic. Chaitaca alli yuyarichic.

20Pipish p'iñaricca, Dios munashcataca mana ruhuanchu.

21Chashna cashcamanta imapish mana alli mapa causacushcamanta, shinallatac tucui mana allicunamantapish anchurichic. Cancunapac shungupi tarpushca alli huillaitaca c'uyac shunguhuan chasquichic. Chai alli huillaimi cancunataca quishpichinata pudin.

22Ashtahuanpish cai alli huillaitaca ama uyaccunalla caichicchu, pactachiccunatac caichic. Chashna uyaccunalla cashpaca, cancunallatacmi mana allita ruhuashpa pandaringuichic.

23Maijanpish quishpirinamanta alli huillaita uyashpa mana pactachicca, paipac ñahuita espejopi ricuric shinallami.

24Espejopi pai ricurishpapish, ña shuc ladoman tigrarishpaca, pai ima shina cashcataca cungarinmi.

25Ashtahuanpish huatashca shina cashcamanta cacharichic, Dios mandashpa rimashca shimita uyashpa, mana cungarishpa, shungupi huacaichicca imata ruhuashpapish cushicungami.

26Maijanpish “ñucaca alli cricmi cani” nishpapish, paipac c'alluta mana jarcaricca paillatacmi pandaricun. Shinallatac pai “alli cricmi cani” nishcapish, yangallami can.

27Maijanpish Taita Diospac ñaupapi Diosta tucui shunguhuan alli cricca, llaquilla cac viuda huarmicunatapish, taita mamata mana charic llaquilla cac huahuacunatapish ayudanami can. Shinallatac cai pachapi tiyac imapish juchallinacunamantaca huacaichirinami can.