ROMANOS 2 - Nuevo Testamento en Quichua Cañar 1996

Taita Diosca imata ruhuashcata ricushpa taripac cashcamanta

1Chaimanta can cashpapish, pi cashpapish shuccunata juchanchishpaca, mana perdonashcachu cangui. Shinallatac shuccunata juchanchishpaca, canllatacmi llaquichingapac nishca cangui. Canpish paicuna shinallatacmi ruhuacungui.

2Taita Diosca chashna ruhuaccunataca imata ruhuashcata ricushpa taripac cashcatami yachanchic.

3¿Canpish chashnallatac ruhuacushpa, shuccunata juchanchishpa rimashpaca, “Taita Dios llaquichina cashcamanta anchurishami” nishpa yuyanguichu?

4Taita Dios paipac c'uyaillamanta paipacman c'ayashcata mana yuyarishpaca, pai punzhanta llaquicushcatapish, mana p'iñarishpa shuyacushcatapish yangapimi churacungui.

5Ashtahuanpish canca sinchi shungu cashpami, Taita Diosman mana cutirisha ningui. Chaimantami Taita Dios imata ruhuashcata ricushpa taripana punzhapi llaquichishca cangapac, ashtahuan mana allita ruhuashpa c'aticungui.

6Taita Diosca tucuimanmi imata ruhuashcata ricushpa cunga.

7Maijanpish Taita Diospac alli nishca cangaraicu, huiñai causaita japingaraicu allita ruhuashpa causaccunamanca Taita Diosca huiñai causaitami cunga.

8Shina cacpica, maijanpish quiquin munashcata ruhuashpa, cashcata nic huillashcata mana cazushpa, mana allita ruhuaccunataca paipac p'iñaihuan Taita Diosca llaquichingami.

9Israelcunatapish,*f** mana israelcunatapish*f** paicuna mana allita ruhuashcamanta Taita Dios llaquichicpi, llaquita apangacunami.

10Shina cacpipish Taita Diosca israelcunamanpish, mana israelcunamanpish, tucui allita ruhuaccunamanca “allimi canguichic” nishpami, sumaimana canatapish, sumac causaitapish cunga.

11Taita Diosca pimanpish mana tucushpami, imata ruhuashcata ricushpa taripan.

12Moisés mandashcacunata mana yachashpa juchata ruhuaccunaca, chai mandashcacunata mana yachashpapish, huiñaitami chingaringacuna. Ashtahuanpish mandashcacunata yachashca jahua juchata ruhuaccunaca, mandashcapi nishca shinallatacmi taripashca canga.

13Mandashcacunata uyashcallamantaca pipish Taita Dioshuanca mana alli tucunchu, ashtahuanpish chai mandashcacunapi ima nishcata cazushpami Taita Dioshuanca alli tucun.

14Mana israelcunaca Moisés mandashcacunata mana yachashpapish, paicunapac munaimanta mandashcacunapi nishca shinallatac ruhuashpa, allita, mana allita yachac cashcatami ricuchincuna.

15Paicunaca paicunapac ruhuashcahuanmi, paicunapac shungupi mandashcacuna quillcashca shina cashcata ricuchicun. Paicunapac shungupi allita, mana allita yachashpami, paicunapac yuyai alli cacpica, alli ninga. Mana alli cacpica, mana alli ninga.

16Alli huillaita ñuca huillashca shina, tucui gentecuna pacalla ruhuashcata Taita Dios Jesucristomanta taripai punzhapimi chashnaca ricuringa.

Israelcunaman Moisés mandashcacuna imata nicushcamanta

17Israelcunapuramanta canca: “Israelmi*f** cani” nishpami, “Moisés mandashcacunallapi shunguta churashpa, Dioshuan allimi cani” nishpa puringui.

18Taita Diospac munaitapish, shinallatac pai mandashcacuna ima allita acllana cashcata yachachicushcatapish yachanguimi.

19Canca: “Ñahui mana ricuccunata pushangapacpish, amsapi puriccunata achicman apangapacpish allimi cani” nicunguimi.

20“Mana imata yachaccunata yachachingapac, huahua shinacunata alli pushangapacca allimi cani” nicunguimi. “Chashnaca mandashcacunami cashcata huillashpa, tucui ima ruhuana cashcata yachachicun” nishpami yuyangui.

21Shuccunata yachachishpaca, ¿ima nishpatac mana canllatac yachacunguiyari? “Mana shuhuanachu” nishpa yachachishpaca, ¿ima nishpatac shuhuanataca mana saquinguiyari?

22“Mana huacllirinachu” nishpa yachachishpapish, ¿ima nishpatac huaclliringuiyari? “Ruhuashcalla dioscunata p'iñanimi” nishpaca, ¿ima nishpatac paicunata adorana huasimantaca imapish allicunata shuhuanguiyari?

23Mandashcacunata charishcamanta jatun tucushpaca, ¿ima nishpatac canca chai mandashcacunata mana cazushpa, Taita Diostaca yangapi churanguiyari?

24Chashnaca allillatacmi Dios quillcachishcapica: “Cancunamantami mana israelcunaca*f** Diosta mana alli nishpa rimancuna” nin.

25Moisés mandashcacunata maijanpish pactachicpica, circuncisionta*f** ruhuashcaca allimi. Shina cacpipish Moisés mandashcacunata mana pactachicpica, circuncisionta ruhuashcaca yangallami.

26Maijanpish mana circuncisionta ruhuashca cashpapish, mandashcacunata pactachishpaca circuncisionta ruhuashca shinallatacmi can.

27Maijanpish paipac aichapi mana circuncisionta ruhuashca cashpapish mandashcacunata pactachiccunaca, circuncisionta ruhuashca jahua, mandashcacunata yachashca jahua mana pactachiccunataca juchanchingami.

28Gentecunapac ricuillapi israelcuna cashpapish, mana tucui israeltacchu can. Aichallapi circuncisionta ruhuashcaca mana circuncisionta ruhuashca shinami can.

29Israeltac canaca mana gentecunapac ricuillapichu, ashtahuanpish ucu yuyaimantami israel cana. Shinallatac circuncisionta ruhuashcapish shungumantami cana. Chai yuyaica mana imata ruhuachun nishpa quillcashcamantachu, ashtahuanpish Diospac Espiritumantami shamun. Chashna caccunataca mana gentecunachu alli nin, ashtahuanpish Taita Diosmi alli nin.