1 CORINTIOS 3 - Nuevo Testamento en Quichua Cañar 1996

“Diospacta ruhuaccunami canchic” nishcamanta

1C'uyashca criccuna, Cristomanta ñuca huillashpaca, Diospac Espíritu yuyaita cushca gentecunaman shinaca mana huillarcanichu, ashtahuanpish huahuacuna shina manarac Cristota alli cric, cai pacha jucha munashcata ruhuac criccunamanmi huillarcani.

2Cancunaca sinchi yachaicunata manarac yachacuipac cacpimi, chuchucuc huahuacuna lechellahuan cashpa, manarac sinchi micuita micuc huahuacunaman yachachic shina, yachacuipaclla yachaicunata yachachircani. Cancunaca cunancamanmi, manarac sinchita micuccuna shina canguichic.

3Cancunaca cai pacha jucha munashca shina causacushcamantami, shuccuna ama charichun nishpa munanacunguichic, shinallatac p'iñanacunguichic. Chashna ruhuashpaca, chairac cai pacha jucha munashca shina causacushcamantami ruhuacunguichic.

4Shinashpami cancunapuramanta shucca: “Ñucaca Pablota c'aticmi cani”, cutin shucca: “Ñucaca Apolosta c'aticmi cani” nicunguichic. Chashna nishpaca, cai pacha jucha munashca shina causac gentecuna shinami yuyacunguichic.

5Ñucanchicca Pablo cashpa, Apolos cashpapish ima mana canchicchu, ashtahuanpish Apunchic Jesuspacta ruhuaccunallami canchic. Ñucanchic huillacpimi, cancunapish paita criccuna tucurcanguichic. Ñucanchicca Apunchic Jesús imata ruhuachun ricuchishcallata ruhuaccunami canchic.

6Shina cashpami ñucaca muyuta tarpuc shina, cutin Apolosca parcuc shina cancunamanca yachachircanchic. Shina cacpipish tarpushca muyuta huiñachicca Taita Diosmi can.

7Tarpucpish, parcucpish ima mana canchicchu, ashtahuanpish tarpushca muyuta huiñachicca Diosllatacmi can.

8Shina cashcamanta tarpucpish, parcucpish chai shinallatacmi canchic. Shina cacpipish quiquin imata ruhuashcata ricushpami, Taita Diosca cunga.

9Ñucanchicca ishcaitacmi Diospacta ruhuaccuna canchic. Cancunaca Dios tarpuna allpa shina, Dios huasichina huasi shinami canguichic.

10Ñucaca huasita ruhuac shina cachun, Taita Dios paipac c'uyaimanta c'ayacpimi, pircai callarircani. Callari pircata ñuca ruhuashca q'uipaca, shucmi pircata churashpa c'aticun. Shina cacpipish chai huasi pircata churaccunaca, tucuimi ima shina churacushcata ricuna canguichic.

11Huasita ruhuangapac callari pirca shinaca, Jesucristomi. Shina cashcamanta pi shuccunaca shuctac callari pircataca mana churai pudinchu.

12Ña cai callarishca pirca jahuapica curihuan, cullquihuan, sumac rumicunahuan, mana cashpaca caspihuan, ucshahuan, ima huamac-huan cashpapish huasichinallami.

13Shina cacpipish quiquin imahuan ruhuashca cashcataca, taripai punzhapimi Diosca ninahuan rupachishpa, ricungapac shamunga. Chai nina rupachicpimi, quiquin ima laya ruhuashcaca yacharinga.

14Chai callarishca jahuapi imata ruhuashca ima mana tucucpica, paica allitami japinga.

15Maijanpish rupanalla huasita shayachishca cashpaca, tucui rupacpi, paica ima japinata mana charingachu. Paipish ninamanta sajuaric shinallami quishpiringa.

16Cancunaca Dios causana huasi cashcata, shinallatac Diospac Espiritupish cancunapac shungupi causacushcataca, ¿manachu yachanguichic?

17Chaimanta Dios causana huasica paipacllami. Maijanpish Diospac huasita urmachictaca, paitapish Diosca urmachingami. Chai huasica cancunallatacmi canguichic.

18Maijanpish “ñucaca allimi cani” nishpaca, ama pandaringuichicchu. Cancunapuramanta maijanpish cai pacha gentecuna yuyashca shina “mai yachacmi cani” nishpa yuyacushpaca, imata mana yachac shinami tucuna canguichic. Chai shina tucushpami, mai yachaccunatac tucunguichic.

19Cai pacha gentecuna yachashcallaca, Diospac ñaupapica imata mana yachashca shinami. Dios quillcachishcapica: “Taita Diosca chai jatun yachaccunataca, paicunapac yachashcallahuantacmi tucllapi shina urmachin” ninmi.

20Shinallatacmi Mandac Diosca: “Jatun yachaccunapac yachaica mana yachashca shina cashcatami yachani” ninmi.

21Chaimantami maijanpish gentecuna yachachishcallapi shunguta churashpa c'aticushpaca, mana jatun tucunachu can. Tucui imapish cancunapacmi.

22Pablopish, Apolospish, Pedropish, cai pachapish, huañuipish, causaipish, cunan punzhapish, shamuc punzhapish tucuimi cancunapac can.

23Shinallatac cancunaca Cristopacmi canguichic. Cristoca Taita Diospacmi.