2 CORINTIOS 9 - Nuevo Testamento en Quichua Cañar 1996

Diospaclla cac criccunaman cungapac cullquita tandanamanta

1Diospaclla cac criccunaman cullquita cushpa ayudachun nishpaca, ña mana cancunaman quillcashpa c'atinachu cani.

2Cancuna cushicushpa, tucui shunguhuan cuna cashcata yachashpami, chashnaca nini. Yalli huatamanta pachami, cancuna Acaya llacta criccuna tucui shunguhuan ayudanata munashcataca, Macedonia llacta criccunamanca cushicushpa huillacunilla. Cancuna chashna c'uyaihuan ayudac cashcata yachashpaca, Macedoniapi causac achca criccunapish cushicushpami, ayudanata munancuna.

3Shina cashpapish, ñuca cancunamanta “allicunami” nishpa rimashca ama yanga cachunmi, cai huauquicunataca ñaupachishpa, cancuna allichirishca cachun cachani.

4Maijan Macedonia criccuna ñucahuan ricpi, pactarac cancunaca mana allichirishpa shuyacunguichicman. Chashna cancuna mana allichirishpa shuyacucpica, ñucanchic cancunamanta “allicunami” nishcaca yangami canga, shinallatac pingaimi canga. Ñuca pingaipi tariricpica, ¿manachu cancunamanpish pingai canga?

5Chashna cacpimi cai huauquicunarac ricungapac rishpa, cancuna alli shunguhuan ñaupaman ayudasha nicushcata tandachinacuchun, cachana alli caipac cacpi ñaupachishpa cachani. Chashna ruhuacpimi mana ñucanchic nishcallamanta, ashtahuanpish cancuna cuna munaihuan cushcaca yacharinga.

6Ashallata tarpucca ashallatami tandanga. Shinallatac achcata tarpucca achcatami tandanga. Chaitaca alli yuyarichic.

7Mana misarishpa, shinallatac mana mandashcallamantachu cuna, ashtahuanpish tucui shunguhuanmi cuna can. Chashna cushicuihuan cuctami Taita Diosca c'uyan.

8Taita Diosca imatapish ruhuaclla cashpami, cancunapac imalla illashcata punzhanta charichunca, tucui laya allicunata cunga. Chashna charishpaca, tucui laya alli ruhuaicunata ruhuangapacmi, yalli yalli charinguichic.

9Dios quillcachishcapica:

“Cashcata ruhuacca huacchacunamanca,

achcatami caran.

Pai allita ruhuashcacunataca,

Diosca manatac cungaringachu” ninmi.

10Muyutapish tarpuchun cuc, micunatapish carac Taita Diosllatacmi cancunamanca muyuta tarpuc shina, shuccunaman cuchunpish ima illashcataca cunga. Shinallatac cancuna tucui shunguhuan shuccunaman carashcamantaca, muyuta huiñachishpa, alli granota cuc shinami, Taita Diosca allicunata cunga.

11Chashna Taita Dios cucpimi, cancunaca tucui laya allicunata chasquishpa, mana misarishpa, tucui shunguhuan cungapac charinguichic. Cancuna ayudashpa imallata tandachishpa cachacpica, chaita chasquic criccunaca ñucanchic chashna ruhuashcamantami Taita Diostaca pagui ningacuna.

12Cancuna ayudashpa cushpaca, mana paicunapac ima illashcatachu cunguichic, ashtahuanpish paicunamanca Taita Diosta pagui nina yuyaitapish cunguichicmi.

13Cancuna Cristomanta huillacushca alli huillaita cazushcamanta ayudacushcata yachashpami, paicunamanpish shinallatac shuccunamanpish tucui shunguhuan ayudashcamantaca, paicunaca Taita Diostaca “allimari cangui” ningacuna.

14Taita Dios mai c'uyac cashcata cancuna ricuchishcamantami, tucui c'uyaihuan cancunamantaca Taita Diosman mañangacuna.

15¡Ima shina mana pagui nipac allicunata Dios cushcamanta, paitaca pagui nicushunchiclla!