2 TESALONICENSES 1 - Nuevo Testamento en Quichua Cañar 1996

Pablo paihuan caccunandic quillcashcamanta

1Cai quillcataca Pablomi Silvanohuan, Timoteohuan tucushpa, Tesalónica pueblopi causac tandanacushca criccunaman quillcashpa cachanchic. Cancunaca ñucanchic Taita Dioshuanpish, Apunchic Jesucristohuanpish shuc shinallami canguichic.

2Ñucanchic Taita Diospish, Apunchic Jesucristopish mai c'uyashpa, cushi causaita cancunamanca cushca cachun ninchicmi.

Cristo cutimucpi ima juchatapish Taita Dios taripana cashcamanta

3C'uyashca criccuna, cancuna crishpa, ashtahuan sinchiyashpa c'aticushcamanta, shinallatac caishuc chaishuchuan ashtahuan c'uyanacushpa causacushcamantaca, Taita Diostaca pagui nina cacpitacmi pagui nicunchic.

4Cancunata llaquichicucpipish, p'iñacucpipish alli crishpa, sinchita c'aticushcataca, tandanacushca criccunamanca cushicushpami parlanchic.

5Chai shina cancuna llaquita apachun Taita Dios saquishpaca, pai imapish cashcatatac ruhuashpa taripac cashcatami ricuchicun. Taita Dios maipi mandacucman yaicuchunmi, chai shina llaquita apachun saquishca.

6Maijanpish cancunata llaquichiccunataca, cashcata ruhuac Taita Diosca llaquichina cashca shinallatacmi llaquichinga.

7Shinallatac cancuna llaquita apacuccunatapish, ñucanchicta samachic shinallatac samachingami. Chashnaca, Apunchic Jesús paipac imatapish ruhuaclla angelcunahuan jahua pachamanta shamushpami samachinga.

8Ñucanchic Apunchic Jesusmanta alli huillaita maijanpish mana cazuccunata, shinallatac Diosta mana ricsinata munaccunata llaquichingapacca, nina culun nicuc chaupitami shamunga.

9Paicunaca huiñaicamanmi llaquichishpa, chingachishca cangacuna. Shinallatac imatapish ruhuaclla Apunchic Jesuspac sumaimana ñaupamantapish, caruman shitashcami cangacuna.

10Shamuc punzhapi Apunchic Jesucristo cutimushpaca, tucui paipaclla cac criccuna paita alli nishpa, mana amirichunmari shamunga. Chaipica cancunapish ñucanchic huillashcata crishcamantaca canguichic.

11Imatapish ruhuaclla ñucanchic Diosllatac cancunata c'ayashcamanta, cancuna pai munashca shina causachunmi, cancunamanta punzhanta mañacunchic. Shinallatac cancuna crishcamanta alli ruhuaicunatapish, alli yuyaicunatapish pai munashca shina pactachinata ayudachunmi, cancunamanta mañacunchic.

12Chai shinami ñucanchic Apunchic Jesustaca cancunamanta alli ningacuna, shinallatac cancunatapish paillatac alli ningami. Chashnaca ñucanchic Taita Diospish, Apunchic Jesucristopish mai c'uyashcamantami alli ninga.