GÁLATAS 2 - Nuevo Testamento en Quichua Cañar 1996

Jesús acllashca caishuc huillaccunapish Pablota chasquishcamanta

1Chunga chuscu huata q'uipami Bernabehuan cutin Jerusalén puebloman ricushpaca, Titotapish apashpa rircani.

2Chaimanca Taita Dios “rinami cangui” nicpimi rircani. Chaiman chayashpaca, criccunata pushaccunallahuanmi tandanacurcani. Ñuca punta huillacushcapish, cunan huillacushcapish ama yanga cachunmi, mana israelcunaman*f** quishpirinamanta huillacushcataca allita yachachircani.

3Chashna yachachicpica ñucahuan shamuc Titotaca mana israel runa cacpipish, mana pi circuncisionta*f** ruhuachun mandarcachu.

4Ashtahuanpish mandashcacunamanta cacharirishpa, Jesucristohuan shuc shinalla tucushpa causacucta ricungapacllami, “cricmi canchic” nishpa maijancunaca pacalla yaicurcacuna. Paicunaca paicuna shina mandashcapi huatashca shina causachunmi munancuna. Chaimantami Titotaca circuncisionta ruhuachun nircacuna.

5Cashcata nic alli huillaita cancuna mana pandarishpa alli c'atichunmi, paicuna ima nishcataca ashallatapish mana uyashun nircanchic.

6Chai pushaccunaca alli nishca cashpapish, ima mushuc yachanacunataca mana yachachircacunachu. Taita Diosca mana ima shina cashcata ricushpallachu chasquin. Chaimantami paicuna utcaman c'atic cashcapish ñucamanca ima mana can.

7Mushuc yachanacunata cunapac randica, Taita Dios Pedrota israelcunaman huillachun cachashca shina, ñucatapish mana israelcunaman quishpirinamanta alli huillaita huillachun cachashcatami yachac chayarcacuna.

8Pedrota israelcunapacman Jesusmanta huillachun cachac Taita Diosllatacmi, ñucatapish mana israelcunaman Jesusmanta huillachun cacharca.

9Chaimantami criccuna alli nishca Pedropish, Jacobopish, Juanpish Taita Dios ñucata c'uyashpa, mana israelcunaman alli huillaita huillachun cachashcata yachac chayarcacuna. Ñucapish, Bernabepish paicuna shina alli huillaita huillac cashcata ricuchingapacmi maquita curcacuna. Shina maquita cushpami, ñucanchicca mana israelcunaman, paicunaca israelcunaman huillagrinaca allimi nircacuna.

10Paicunapurapi cac huacchacunatapish yuyarichunmi nircacuna. Chaimanta ashtahuanca mana imata nircachu. Chaitaca tucui shunguhuanmi pactachina yuyailla cani.

Antioquía pueblopi Pedrota Pablo sinchita rimashcamanta

11Antioquía puebloman Pedro chayacpica, pai mana allita ruhuacushcamantami sinchita ñahui ñahui rimarcani.

12Jacobo cachashcacuna manarac chayacpica, Pedroca mana israelcunahuanpish*f** micucllami carca. Shina cashpapish “circuncisionta*f** ruhuanaca allimi” niccuna chayacpica, paicunata manchashpa mana israelcunahuan micunata saquishpa raquirircallami.

13Pedro chashna mana shuc yuyailla tucushpa, mana allita ruhuacta ricushpaca, caishuc cric israelcunapish*f** chai shinallatacmi mana allita ruhuarcacuna. Shinallatac Bernabecamanmi pandarishpa mana allita ruhuarca.

14Chaimantami cashcata nic huillashca shina mana ruhuacushcamantaca, tucui tandanacushca criccunapac ñaupapi Pedrotaca: “Canca israel cashca jahuami, mana israel shina causacurcangui. ¿Chashna cashca jahuachu, mana israelcunataca israelcuna shina causachun ningui?” nircani.

Israelcunapish, mana israelcunapish crishpaca quishpirinamanta

15Ñucanchicca huacharishcamanta pachami israelcuna*f** canchic. Mana israelcuna*f** shina juchayucmi nishcaca mana canchicchu.

16Shina cacpipish Moisés mandashcacunata pactachishcallamantaca, Taita Diosca pitapish mana paihuan alli tucuchun chasquinchu, ashtahuanpish Jesucristota crishcallamantami paihuan alli tucuchun chasquin. Chaitaca yachanchicmi. Chaimantami ñucanchicpish mana Moisés mandashcacunata pactachishcallamanta, ashtahuanpish Jesucristota crishcallamanta Taita Dioshuan alli tucushca cangapac crishcanchic. Moisés mandashcacunata pactachishcallamantaca, Taita Diosca pitapish paihuan alli tucuchunca mana chasquinchu.

17Jesucristota crishcallamanta Taita Dioshuan alli tucunata munashpaca, ñucanchicpish juchayuc cashcatami ricuchinchic. Shina cacpica, ¿“Jesucristomi ñucanchicta juchata ruhuachicun” nishunchu? ¡Chashnaca mana ninachu canchic!

18Mandashcacunata pactachishpa Taita Dioshuan alli tucuna yuyaita saquishpa, cutinllatac chai yuyaita charishpaca, ñucallatacmi juchallini.

19Moisés mandashcacunallatacmi Diospacta ruhuashpa causachun, chai mandashcacunata pactachishpa causanamantaca anchuchirca. Chaimantami Moisés mandashcacunata pactachingapacca, huañushca shina cani.

20Ñucaca Jesucristohuanmi chacatashca shina cani. Chaimantami ña mana ñucalla causacuni, ashtahuanpish Cristomi ñucapica causacun. Shinallatac cunanca Diospac Churita crishcamantami causani. Paica ñucata c'uyashpami, ñucamanta huañurca.

21Chashna nishpaca, Taita Dios mai c'uyashcataca mana allichu ninataca mana munanichu. Mandashcacunata pactachishpa Taita Dioshuan alli tucunalla cacpica, Cristo huañushcaca yangamantami canman.