SANTIAGO 3 - Nuevo Testamento en Quichua Cañar 1996

Maipish cachun mana rimanamanta

1Ñuca c'uyashca criccuna, ñucanchic yachachiccunaca shamuc punzhapica ashtahuanmi taripashca cashun. Chaitaca ña yachanguichicmi. Chaimanta ama taucacuna Diosmanta yachachiccuna tucuichicchu.

2Tucuillatacmi tauca cutin imapipish pandarinchic. Maijan imata rimashpapish mana pandaricca, mana juchanchipac alli runami. Chashna alli cashcamantaca, paipac cuerpotapish ima mana allimantaca jarcarinmi.

3Chai shinallatac caballopi maiman ringapacca, shimipimi frenota churanchic. Chai shina churashpaca, ñucanchic maiman risha nicushcamanmi apanchiclla.

4Chashnallatac shuc barcota ricushpa yuyarichic. Barco jatun cacpipish, huaira yallita jatarishpaca, maiman cashpapish apanllami. Chashna cacpipish barcota purichic runaca, shuc uchilla caspillahuanmi barcotaca maiman cashpapish apanlla.

5Chai shinallatacmi c'alluca ñucanchic cuerpopi uchilla cashpapish, imatapish rimashpaca, yallita llaquichinlla. Shinallatac ninapish p'itillamanta mirarishpaca, mashna jatun sachacunatapish tucui rupachinllami.

6C'alluca shuc nina shinami. C'alluca ñucanchic cuerpopica, imapish millaita callarichicmi. Chai shina cashpami, tucui ñucanchic cuerpota mapayachin. C'alluca ucu pacha nina rupacuc shinami, tucui causaipi mana allita ruhuachishpa rupachic shina llaquichicun.

7Gentecunaca sachapi tiyac quita animalcunatapish, volashpa puric animalcunatapish, allpata aisarishpa puric animalcunatapish, yacupi tiyac animalcunatapish mansoyachi pudinmi. Chashna cashpami mansoyachishca.

8Shina cashpapish c'allutaca pipish mana jarcai pudishcachu. C'alluca pipish mana jarcaipac millai cashpami, veneno shina huañuchic can.

9Chai c'allullahuantacmi Taita Diostapish “allimari cangui” ninchic, shinallatac Dios pai shina cachun ruhuashca gentecunatapish, “imapish tucushca canman” ninchic.

10Chai shimillahuantacmi alli ninchic, shinallatac “imapish tucushca canman” ninchic. Ñuca c'uyashca criccuna, chaica mana chashnachu cana can.

11Mishqui yacupish, jayac yacupish chaillamantatacca mana tucyanchu.

12Ñuca c'uyashca criccuna, chai shinallatac higo yurapish olivos p'ucuna murutaca mana p'ucunchu. Shinallatac uvas yurapish higotaca mana p'ucunchu. Chashnallatac cachi yacupish, mishqui yacupish chaillamantatacca mana tucyanchu.

Dios alli yuyaita cuc cashcamanta

13Cancunapuramanta maijan alli yachac, yuyaisapa cashpaca, imatapish allita ruhuashpa, mana p'iñaric alli shungu tucushpa, yachac cashcataca ricuchichun.

14Shina cashpapish shuccuna ama charichun nishpa shungupi p'iñanacushpaca, “yachacmi cani” nishpaca, mana jatun tucunachu canguichic. Chashna ruhuashpaca, cashcata nic huillashcata mana cazunguichicchu.

15Chai shina yachac tucushca canataca Diosca mana cunchu, ashtahuanpish chai yuyaica cai pacha gentecuna yuyashcallami. Chai yuyaitaca diablollatacmi cun.

16Chai shina shuccuna ama charichun munashpa p'iñashpaca, mana shuc yuyailla tucushpami, imatapish mana allicunata ruhuashpalla causan.

17Ashtahuanpish Dios cushca yuyaita chariccunaca, puntaca chuya shungu causanatami munancuna, shinallatac sumactami causancuna. Paicunaca alli shungucunami, imamantapish mana p'iñariccunachu, llaquiccunami, pimanpish mana tucuccunachu, imatapish mana huashalla rimaccunachu.

18Maijanpish sumac causaita causachun munaccunaca, allita tarpushpa tandac shinami, cashcata ruhuashpa sumacta causancuna.