SANTIAGO 5 - Nuevo Testamento en Quichua Cañar 1996

Llaquichishpa causac chayuccunata llaqui japina cashcamanta

1Chayuccuna, caita uyaichic: ¡Cancunataca jatun llaquicunami japinga! ¡Chaimanta caparishpa huacaichic!

2Cancuna yallita charishcaca ismungami. Cancunapac churanacunatapish polilla c'urucuna micungami.

3Cancuna charishca curipish, cullquipish mujusyangami. Chai mujusyashcallatacmi, cancuna mana alli cashcataca ricuchishpa, nina shina llaquichinga. Cancunaca cai tucuri punzhacunapica, charinacunataca yallitami tandachishcanguichic.

4Cancunapac allpapi granota tandashcamanta, tandaccuna japina cashcataca mana cushcanguichicchu. Paicunaca cancunataca ñacacuncunami. Chai ñacashcacunataca, imatapish ruhuaclla Taita Diosca uyashcami.

5Cancunaca cai pachapi causacushpaca, imatapish randishpa cushicushcanguichicmi. Shinallatac sumac micunacunata micushpaca, huañuchina punzha chayacpi, huañuchina huagracuna shinami huirayashcanguichic.

6Mana juchanchipac gentecunatami, cancunaca juchanchishpa huañuchishcanguichic. Paicunaca mana c'ariyarcachu.

Japina yuyaihuan shuyanamantapish, Diosman mañanamantapish

7C'uyashca criccuna, japina yuyaihuan Apunchic Jesús cutimungacaman shuyaichiclla. Allpapi tarpuc runaca sumac granota tandangapacca, japina yuyaihuanmi tamia punzha chayangacaman shuyacunlla.

8Apunchic Jesucristo cutimuna ña pungullapi cashcamantaca, cancunapish chai shinallatac japina yuyaihuan c'aticuichiclla.

9C'uyashca criccuna, mana juchanchishca cangapacca, ama caishuc chaishuc imatapish juchanchinacuichicchu. Taripacca ña pungullapimi.

10C'uyashca criccuna, Diosmanta ñaupa huillaccuna Dios ima nishcata huillashpa, alli shunguhuan mana p'iñarishpa llaquita apashcata yuyarishpa, chai shina ruhuaichic.

11Chai shina mana p'iñarishpa, llaquita apaccunamanca mai cushicuimi canga, ninchicmi. Cancunaca ñaupa taita Job mana p'iñarishpa llaquita apashcatapish, shinallatac q'uipaman Mandac Dios paiman ima allicunata cushcatapish yachanguichicmi. Taita Diosca yallita c'uyac, llaquic Diosmi.

12Ñuca c'uyashca criccuna, tucuimanta yallica caitami nini: Imata ruhuangapacca jahua pachamantapish, cai pachamantapish, shinallatac ima tiyashcamantapish ama nichicchu. Dios ama juchanchichunca, pactachingapac cashpaca “ari” nichic, mana pactachingapac cashpaca “mana” nichic.

13Cancunapuramanta maijanpish llaquilla cashpaca, Taita Diosman mañachun. Maijanpish cushilla cashpaca, Taita Diosta alli nishpa cantachun.

14Maijanpish ungushca cashpaca, Apunchic Jesuspac shutipi aceiteta churashpa Diosman mañachun, tandanacushca criccunata pushaccunata c'ayac cachachun.

15Allichina cashcata crishpa mañacpica, chai ungushcataca Apunchic Jesusca alliyachishpa jatarichingami, shinallatac juchacunatapish perdonangami.

16Chaimanta alliyashca cangapacca, ima mana allita ruhuashcacunatapish caishuc chaishuc ama pacashpa huillanacuichic. Taita Dios alliyachichunpish, caishuc chaishucmanta Diosman mañaichic. Taita Diosman cashcata ruhuac mañacpica, imatapish pactachingallami.

17Diosmanta ñaupa huillac Eliasca ñucanchic shinallatacmi carca. Pai ama tamiachun nishpa, Diosman mañaracpica, quimsa huata chaupitami mana tamiarca.

18Chaipac q'uipa tamiachun nishpa, cutinllatac Diosman mañacpica, tamiai callarircallami. Shina tamiacpica, cutinmi allpapi imapish p'ucui callarirca.

19Ñuca c'uyashca criccuna, cancunapuramanta maijanpish cashcata nic huillashcata saquishpa, pandarishpa puricucpi, maijan cunashpa, Diosman tigrachishpaca,

20chai pandarishpa causacuc juchayucpac almata huañuimanta quishpichinmi. Shinallatac Taita Diosca achca juchacunatapish perdonangami. Chaitaca yuyarinami canguichic.