1 SAN JUAN 2 - Nuevo Testamento en Quichua Cañar 1996

Cristoca ñucanchicmanta rimac cashcamanta

1Ñuca c'uyashca huahuacuna, cancuna ama juchallichunmi caicunataca quillcani. Shina cacpipish maijan juchallishpaca, Taita Dioshuan rimactami charinchic. Paica imatapish cashcata ruhuac Jesucristomi.

2Jesucristoca Taita Dios ñucanchic juchacunata perdonachunmi, ñucanchicpac randi huañurca. Shina huañushpaca mana ñucanchic juchacunallamantachu huañurca, ashtahuanpish tucui cai pachapi causaccunapac juchata perdonachunmi huañurca.

3Taita Diospac mandashcacunata pactachishpaca, paita ricsishcatami yachanchic.

4Maijanpish “ñucaca paita ricsinimi” nishpapish, Dios mandashcacunata mana pactachishpaca llullanllami. Shina cacpimi paipac shungupica imatapish cashcata ruhuashpa causana yuyaica mana tiyan.

5Shina cacpipish Taita Dios rimashca shimita maijanpish cazucca, Dios c'uyac shinallatacmi mai c'uyac cashcata ricuchin. Chashna cashpami paihuan shuc shinalla cashcata yachanchic.

6Maijanpish “Taita Dioshuan shuc shinallami cani” nishpaca, Jesucristo causashca shinallatacmi causana can.

Mushucta mandashcamanta

7C'uyashca criccuna, mana mushuc mandashcatachu quillcani, ashtahuanpish ñaupaman cancuna chasquishca mandashcallatatacmi quillcani. Cai mandashcatami cancunaca crishcamanta pacha uyashpa ña chasquircanguichic.

8Shina cacpipish mushuc mandashcata quillcac shinallatacmi quillcani. Cai mandashca mana llulla cashcataca Jesucristomi ricuchirca, shinallatac cancunapish ricuchicunguichicmi. Imatapish cashcata ruhuac luz achicyachicucpimi, amsaca chingarishpa c'aticun.

9Maijanpish “ñucaca achic luzpimi cani” nishpapish criccunata p'iñashpaca, amsapimi causacun.

10Maijanpish criccunata c'uyacca achicyachic luzpimi causacun. Chashna cashcamantaca ima juchapish paitaca mana urmachingachu.

11Ashtahuanpish criccunata maijanpish p'iñacca amsapimi puricun, shinallatac amsallapitacmi causacun. Chashna cashcamantami chai amsallatac ñahuita mana ricucta ruhuacpi, maiman ricushcatapish mana yachashpa causacun.

12C'uyashca huahuacuna, cancunapac juchacunataca Jesucristomanta Taita Dios ña perdonashca cashcamantami, cancunamanca quillcani.

13Taitacuna, ima manarac tiyacpi Pai ña tiyashcata cancuna ricsishcamantami, cancunamanca quillcani. Q'uipa huiñaicuna, diablota mishashcamantami cancunamanpish quillcani.

14Taitacuna, ima manarac tiyacpi Pai ña tiyashcata cancuna ricsishcamantami, cancunamanca quillcani. Q'uipa huiñaicuna, cancuna sinchi cashcamanta Dios rimashca shimita chasquishpa shungupi huacaichishcamanta, shinallatac diablota mishashcamantami, cancunamanca quillcani. Huahuacuna, Taita Diosta ricsishcamantami cancunamanpish quillcani.

15Cai pachatapish, cai pachapi ima tiyashcacunatapish ama c'uyaichicchu. Maijanpish cai pachapaclla caccunata c'uyacca, Taita Diostaca mana c'uyanchu.

16Tucui cai pachapi tiyac millai munaicunapish, tucui ricushcata charina munaicunapish, charishcacunahuan jatun tucuna munaicunapish mana Taita Diosmantachu shamun, ashtahuanpish cai pachallami chai munaicunataca cun.

17Cai pachaca tucui ima tiyashca millai munaicunandicmi chingaringa, ashtahuanpish Dios munashcata ruhuacca huiñaitami causanga.

“Cristomi cani” nishpa llullaccuna tiyanamanta

18C'uyashca huahuacuna, tucuri punzhacunaca ñami chayamushca. Cancunaman “shuc llullashpa huillac, Cristota p'iñac runa shamungami” nishcataca uyashcanguichicmi. Chai shinallatacmi Cristota p'iñaccunaca ña taucacuna ricurimushca. Chaimantami tucuri punzhacuna ña chayamushcataca yachanchic.

19Chaicunaca ñucanchicpuramanta llucshishca cashpapish, mana ñucanchicpuratachu carcacuna. Ñucanchicpura cashca cashpaca, ñucanchicmantaca mana llucshinmanchu carcacuna. Chaicunaca mana ñucanchicpura cashcata ricuchunmi, chashnaca llucshirca.

20Cristo cancunaman Diospac Espirituta cushcamantami, cashcata nic huillashcataca tucui cancuna yachanguichic.

21Chashna cashcata nic huillashcata ña cancuna yachacpimi quillcani. Mana yachacpica, mana quillcaimanchu carcani. Chashna cashcata nic huillashcapi ima llulla mana tiyashcataca, cancunallatac yachanguichicmi.

22Maijanpish “Jesusca mana Quishpichic Cristochu” nicmi, llullashpalla huillacca. Taita Diostapish Diospac Churitapish mana cricmi, Cristota p'iñacca.

23Maijanpish “Cristoca mana Diospac Churichu” nicca mana Taita Dioshuanchu, ashtahuanpish “Jesusca Diospac Churimi” nishpa huillacmi, Taita Dioshuanca.

24Shina cashcamanta cancunaca callarimanta pacha uyashcataca shungupimi huacaichina canguichic. Callarimanta pacha uyashcata shungupi huacaichishpaca, Diospac Churihuanpish, Taita Dioshuanpish shucllami canguichic.

25Jesucristoca huiñai causaitami ñucanchicmanca cusha nishca.

26Cancunamanca llullashpa huillaccuna ima shina cana cashcamantami quillcacuni.

27Jesucristo cushca Diospac Espirituca cancunapimi causacun. Diospac chai Espiritullatacmi tucui imatapish yachachicun. Pai yachachishpaca, mana llullashpa chashna cashcatatacmi huillan. Chaimanta pi yachachictaca mana mashcanachu canguichic. Diospac Espíritu yachachishca shina, Jesucristohuan shuc shinalla causaichic.

28C'uyashca huahuacuna, shinashpaca Jesucristo ricuricpi mana manchashpa ñahui ñahui ricuringapacca, paihuan shuc shinalla causaichic. Chashna causashpami pai cutin shamucpica, paipac ñaupapi mana pingashpa tupashun.

29Jesucristo imatapish cashcata ruhuac cashcataca yachanguichicmi. Chashna yachashpaca, maijanpish cashcata ruhuacca Diospac huahua cashcatami yachanguichic.