1 TESALONICENSES 3 - Nuevo Testamento en Quichua Cañar 1996

1Cancunata ricugrinata yallita munashpapish, mana chayai pudishpami, Atenas pueblollapi saquirinata yuyarinacushpa,

2Jesusmanta ñucanchic huauqui Timoteollata cancunapacman cacharcanchic. Paica Cristomanta alli huillaita huillashpa, Taita Diospacta ruhuacmi. Pai cancunapacman rishpa cunashpa, alli crina yuyaita cuchunmi, chashna cacharcanchic.

3Chashnaca cancuna llaquicunamanta “ña mana c'atishun” nishpa ama yuyachunmi, paitaca cacharcanchic. Chai shina llaquicunata apana cashcataca cancunallatac yachanguichicmi.

4Ñucanchic cancunahuan cashpaca: “Cai shina llaquicunataca apanallatacmi canchic” nishpami huillarcanchic. Chai shina llaquicunaca cancunaman huillashca shinallatacmi pactashca. Chaitaca ña yachanguichicmi.

5Chashna llaquicunahuanca, cancuna crinata saquishpa “ña mana c'aticungachu” yuyarcanimi. Chaimantami cancuna ima shina cashcata ricuchun, Timoteotaca cacharcani. Diablo cancunata millaiman pushacpi, ñucanchic ima ruhuashca yanga canatami ashtahuan mancharcani.

6Shina cacpipish cunanca Timoteo Tesalonicamanta cutimushpami, cancuna allita crishpa, c'uyanacushpa causacushcata huillashpa cushichirca. Ima shinami ñucanchic cancunata ricuna yuyailla canchic, chai shinallatacmi “paicunapish ñucanchicta mana cungarishpa, punzhanta c'uyaihuan ricuna yuyailla cancuna” nishpami, cancunamantaca huillarca.

7Chaimanta c'uyashca criccuna, cancuna crishpa, alli c'aticushcata yachashpami, cai tucui llaquicunahuan cashpapish mai cushicunchic.

8Cancuna Apunchic Jesusta alli c'aticushcata yachashpaca, cutin causaric shinami cushicunchic.

9Cancunamantaca Diospac ñaupapica yallitami cushicunchic. Chaimanta cancunamantaca, ¿ima shinatac Diostaca pagui nishunyari?

10Ñucanchicca cancunapacman rishpa, ñahui ñahui cancunata ricushpa, crina yuyaita cushpa, ashtahuan sinchiyachinatami munanchic. Chai munaicuna pactachunmi, tutapish punzhapish Taita Diosmanca mañacunchiclla.

11Cancunata ricugrichunca, ñucanchic Taita Diospish, Apunchic Jesuspish ayudachunmi munanchic.

12Ñucanchic cancunata c'uyac shinallatac, cancunamanpish caishuc-huan chaishuc-huan, shinallatac shuctaccunahuanpish c'uyanacuna yuyaita Apunchic Jesús ashtahuan cuchunmi munanchic.

13Shinallatac cancunata Taita Dios tucui shunguhuan cricta ruhuachunmi munanchic. Chashna cashpami Apunchic Jesús paipaclla caccunahuan tigramucpica, ñucanchic Taita Diospac ñaupapica Diospaclla tucushca, pi mana juchanchipac cashun.