2 SAN PEDRO 2 - Nuevo Testamento en Quichua Cañar 1996

Llullashpa yachachiccunamanta

1Israelcunapurapica*f** “Diosmantami huillacuni” nishpa, ñaupa llullac huillaccunapish tiyashcami. Chashnallatacmi cancunapurapipish llullashpa yachachiccuna tiyanga. Chashnami paicunata Quishpichic Apunchic Jesusta “mana ricsinichu” nishpa, cancunamanca allita yachachicuc shinalla llaquiman pushac yuyaicunata yachachinga. Chashna yachachishpaca, paicunallatacmi utca llaqui tucugricuncuna.

2Taucacunami paicuna mana alli causacuc shinallatac causangacuna. Chaimantami cashcata nic huillashcata c'atinatapish mana allichu nishpa c'amingacuna.

3Paicunaca cullquita japingaraicullami, cancunamanca paicunapac yuyaillamanta yachachishpa chayucyangacuna. Paicunataca ña utcamanta pachami, “llaquimanmi ringuichic” nishpa Diosca shuyacun. Chai llaquimantaca manatac quishpiringacunachu.

4Diosca paipac angelcuna cacpipish juchallicpica, mana perdonarcachu, ashtahuanpish ucu pacha amsapimi shitarca. Chaipimi paicunaca Dios taripashpa llaquichina punzhacaman cadenahuan huatashca shuyacun.

5Ñaupa punzhacunapi causaccunatapish shina juchallicpica, Diosca mana perdonarcachu, ashtahuanpish yacu juizhuhuanmi millai gentecunataca tucuchirca. Shina cashpapish Dios munashca shina causachun nishpa, huillac Noellatami paihuan cac canchiscunandic quishpichirca.

6Chashnallatac Diosca Sodoma pueblopi, Gomorra pueblopi causac millai gentecunataca uchupayangacamanmi rupachirca. Chashna ruhuashpaca, q'uipaman causac millai gentecuna chashnallatac tucuna cashcata ricuchingapacmi, chashnaca ruhuarca.

7Shina cashpapish Lotllatami quishpichirca. Lotca millaita ruhuashpa causac gentecunata ricushpaca, llaquirishpami cashcata ruhuashpa causac carca.

8Cashcata ruhuac Lotca millai gentecunapac chaupipi causashpami, punzhanta chai mana allicunata ricushpa, uyashpa, paipac alli shungupica llaquiric carca.

9Chashnami Mandac Diosca paipaclla causaccunataca imapish llaquicunamanta quishpichin. Shinallatac millai gentecunataca pai taripashpa, llaquichina punzhacamanmi llaquichishpa charicun.

10Tucuimanta yallica, Mandac Diosca pai Mandac cachun mana chasquiccunatapish, mana alli munaihuan c'atic imapish mapa mana allita ruhuaccunatapish llaquichingami. Paicunaca mana cazuccunami, imapipish c'ariyaccunami, shinallatac imatapish ruhuaclla jahua pachamanta mandaccunatapish mana manchashpa c'amiccunami.

11Ashtahuanpish angelcunaca paicunata atishpa mandaccuna cashpapish, imatapish ruhuacllacuna cashpapish, Diospac ñaupapica jahua pachamanta mandaccunataca mana juchanchishpa c'amincunachu.

12Chai pandata yachachiccunaca animalcuna shinami. Chashna cashpami, imatapish mana entendishpa, ima shinapish causashpa, japishpa huañuchina animalcuna shina causancuna. Paicunaca manapish entendishpami, mana allichu nishpa rimancuna. Chashna mana allita ruhuashcamantami, animalcuna shina huañungacuna.

13Chashnami shuccunata llaquichishcamantaca, paicunapish llaquita apangacuna. Paicuna imapish mapa, mana allicunata punzha pacha ruhuashpaca, “allitami ruhuanchic” nishpami cushicuncuna. Cancunahuan cangapac tandanacuicunaman rishpaca, imapish quiquin munashcata ruhuashpami, pingaipac mapata ruhuancuna. Chai shina ruhuashpaca, cancunata umashpami cushicuc tucuncuna.

14Maijan huarmita ricushpapish, huacllirina yuyaillami cancuna. Chashna cashcamanta juchallinataca manatac shaicuncunachu. Manarac sinchi criccunataca pandachincunallami. Paicunaca tucuita atishpa imatapish charinallatac munaccunami, shinallatac Dios mana ricunachishca gentecunami.

15Paicunaca cashcata ruhuashpa causanata saquishpami, pandarishpa puricuncuna. Chashna ruhuashpaca, Bosorpac churi ñaupa huillac Balaam ruhuashca shinami ruhuancuna. Balaamca millaita ruhuashpallami, cullquita japinata munac carca.

16Pai chashna mana allita ruhuagricucpimi, shuc burroca gente shina “canca mana allitachu ruhuacungui” nishpa rimacpi, chai juizhu illac shina yuyacushcataca saquirca.

17Chai pandata yachachiccunaca yacu illac jundu shinacunami. P'uyuta huaira apashca shinacunami. Shina cashpami, paicunaca huiñaicaman jatun amsapi shitashca cangacuna.

18Paicunaca yanga mapa rimaicunallatac sinchita rimashpami, “allimi canchic” nincuna. Chashnami quiquin munashca mapacunata ruhuashpa, mana alli causaccunapuramanta cunanlla anchurishcacunatapish cutin pandachincuna.

19Paicunallatac mana alli causaipi huatashca shina cashpapish, shuccunata huatashca shina causaimanta cacharichishun nincunami. Maijanpish paipac mapa munaicuna aticpica, chai munaipi huatashca shinami tucun.

20Maijanpish ñucanchicta Mandac Quishpichic Jesusta crishpa, chai mana alli causaimanta anchurishcacunami. Chashna anchurishca cashpa, cutin chai mana alli causaiman tigrarishpaca, ñaupa ima shina causacushcatapish ashtahuan yallimi tucun.

21Taita Dios cushca alli huillaita uyashca jahua cutinllatac saquinapac randica, Dios munashca shina causanata mana ricsishca cashpachari, ashtahuan alli canman carca.

22Ashtahuanpish paicuna chashna tucucpimi: “Allcupish pai ungushcallatatacmi cutin tigrachishpa micun. Cuchipish armarishca q'uipaca, cutinmi turupi singun” nishcaca pactashca.