ROMANOS 10 - Nuevo Testamento en Quichua Cañar 1996

1C'uyashca criccuna, tucui shunguhuanmi israelcuna quishpirichun munani. Chaimantami Taita Diosmanca mañacuni.

2Paicunaca Taita Diospacta pactachina munaita yallita charishcataca yachanimi. Shina cashpapish ima shina pactachinataca mana yachancunachu.

3Paihuan alli tucuchun Taita Dios ima shina chasquicushcata mana entendishpami, paicunapac quiquin ruhuashcahuan alli ricurishun, Diosllatac paicunahuan alli tucuna cashcata mana chasquincuna.

4Maijanpish crishpalla Taita Dioshuan alli tucuchunca, Cristollami mandashcacunata pactachishpa, Taita Dioshuan alli tucuna cashcata pactachirca.

5Mandashcacunata pactachishpalla Taita Dioshuan alli tucunamanta Moisés quillcashpaca: “Maijanpish mandashcacunata pactachicca, pai pactachishcamantaca causangami” ninmi.

6Crishcallamanta Taita Dioshuan alli tucunamanta Moisés quillcashpaca: “ ‘Jahua pachamanca, ¿pitac huichicungayari?’ nishpa, cambac shungupica ama yuyaichu” ninmi. Chashna nishpaca, jahua pachaman rishpa Cristota uricuchic shinami nicungui.

7Shinallatac Moisesca: “ ‘¿Pitac ucu pachamanca yaicungayari?’ nishpaca, ama nichu” ninmi. Chashna nishpaca, Cristota huichaiman llucshimuchun nic shinami nicungui.

8Shina cacpica, ¿Diospac rimashca shimica imatatac nicunyari? “Dios rimashcaca cambac cuchupimi, cambac shimipimi, cambac shungupimi can” ninmi. Dios rimashca cai alli huillaitami crichun nishpa huillacunchic:

9-10Taita Dioshuan alli tucungapacca, tucui shunguhuanmi crina can. Shinallatac quishpiringapacca, quiquin shimihuanmi Jesusta crishcata huillana can. Chaimanta: “Jesusca ñucata Mandacmi” nishpa cambac shimihuan huillashpa, shinallatac huañushcacunapuramanta Taita Dios Jesusta causachishcata tucui shunguhuan crishpaca, quishpiringuimi.

11Dios quillcachishcapica: “Maijanpish paipi shunguta churacca mana pingaichishcachu canga” ninmi.

12Israelcunapish, mana israelcunapish chai shinallatac cacpimi, Apunchic Jesusca tucuipac Mandac can. Shina cashcamantami maijanpish mañaccunamanca imatapish yallita cun.

13Dios quillcachishcapica: “Maijanpish Mandac Diosman mañacca quishpiringami” ninmi.

14¿Ima shinatac Jesusta manarac cric cashpaca, paitaca mañangacunayari? Paimanta pipish mana huillacpica, ¿ima shinatac cringacunayari? Shinallatac pi mana huillacpica, ¿ima shinatac uyangacunayari?

15Shinallatac quishpirinamanta huillachun pipish mana cachacpica, ¿ima shinatac huillangacunayari? Dios quillcachishcapica: “Alli huillaita huillangapac chayaccunaca, ¡mai sumacmi can!” ninmi.

16Shina cacpipish mana tucuichu quishpirinamanta alli huillaitaca cazurcacuna. Chaimantami Isaiasca: “Mandac Dioslla, ¿ñucanchic huillashcataca pitac crishcayari?” nin.

17Shinashpaca huillashcata uyashcamantami crincuna. Chai uyashcaca Cristomanta huillashcami.

18Shina cacpipish: “Cristomanta huillashcataca, ¿manachu uyarcacuna?” nishpami tapuni. ¡Paicunaca uyarcacunami! Dios quillcachishcapica:

“Paicuna huillashcaca

tucui cai pachapimi uyarishca.

Shinallatac paicuna rimashcacunaca

allpa tucuricamanmi uyarishca” ninmi.

19Shinallatac: “Israelcunaca caicunataca, ¿manachu entendircacuna?” nishpami cutin tapuni. ¡Ari, entendircacunami! Chaimantami Diosmanta Moisés punta huillashpaca:

“Mana ñucapaclla caccunata acllashpami,

cancunataca ‘cambacllami canchic’ nichisha.

Imatapish mana yachaccunata acllashpami,

cancunataca p'iñachisha” ninmi.

20Diosmanta Isaías mana manchashpa q'uipaman huillashpaca:

“Mana mashcac gentecunami

ñucataca tarirca.

Ñucata mana tapuc gentecunamanmi

ñucaca ricurircani” ninmi.

21Diosmanta israelcunaman Isaías cutin rimashpaca:

“Ñucata mana cazuc,

p'iñac gentecunataca

tucui punzhacunami c'ayacurcanilla” ninmi.