2 CORINTIOS 3 - Nuevo Testamento en Quichua Cañar 1996

Mushuc ari ninacuita huillaccuna cashcamanta

1Chai shina nishpaca, ¿ñucanchicllatac allimi canchic nishpa cutin nicushcatachu yuyanguichic, imatacyari? ¿Ñucanchicca shuccuna shinachu ima shina cashcata ricuchic quillcata cancunamanca mañana canchic, mana cashpaca ricuchina canchic, imatacyari?

2Chaica cancunallatacmi ñucanchic shungupi imata ricuchic quillcashca quillca shinaca canguichic. Chai quillcatami tucui mashna ricushpa, ima shina cashcata yachancuna.

3Cancunataca Cristollatac quillcashca tucui gentecuna ricuna quillca shina cashcatami ricunchic. Chaitaca ñucanchicllatacmi cancunamanca curcanchic. Chai quillcaca mana tintahuan quillcashca shinachu, ashtahuanpish causac Diospac Espirituhuan quillcashcami. Chai quillcaca mana rumipi quillcashca shinallachu, ashtahuanpish cancunapac shungupimi quillcashca can.

4Cristomanta Taita Diospi shunguta churashpami, tucui caicunaca chashnatac cashcata yachanchic.

5Tucui cai ruhuanataca mana ñucanchic yachac cashcallamantachu ruhuanchic, ashtahuanpish Taita Diosmi ruhuachicun.

6Diosllatacmi paipac mushuc ari ninacuita huillachunca, yuyaita cushpa ñucanchicman yachachirca. Chaica mana Moisés mandashcapi quillcashca shinachu, ashtahuanpish Diospac Espíritu yachachishcami. Moisés mandashcaca chingarina cashcatami ricuchin, ashtahuanpish Diospac Espirituca causaitami cun.

7Chingarina cashcata ricuchic, tabla rumipi quillcashca mandashcata Taita Dios Moisesman cushpaca, pai sumaimana cashcahuanmi mai achicyachirca. Chashna achicyachicpimi, Moisespac ñahuipish llipiacurca. Chashna llipiacuc chingaricucpipish, israelcunaca*f** Moisespac ñahuitaca mana ricui pudircacunachu.

8Chashna cacpica, ¡Diospac Espiritumanta mushuc ari ninacuita huillashcacarin, chaita yallimi mai sumaimana canga!

9Chingarina cashcata ricuchic mandashcacuna sumaimana cacpica, ¡“Taita Dioshuan ña alli tucushcami cangui” nishpa huillashcacarin, chaita yallimi mai sumaimana canga!

10Ñaupaman Moisés mandashca mai sumaimana cacpipish, cai q'uipa sumaimana huillashcahuan ricucpica, imapish mana canchu.

11Chai tucurinalla huillashcata Moisés huillacpi sumaimana cashca cacpica, mana chingaric huillashcacarin, huiñai huiñaipacmi sumaimana canga.

12Chai sumaimana huillashca yuyailla cashpami, mana manchashpa tucuiman huillacunchic.

13Ñucanchicca mana Moisés paipac ñahuita pañuhuan pacashca shinachu canchic. Moisesca israelcuna chai llipiacuc chingaricucta ama ricuchun nishpami, chashnaca ruhuarca.

14Shina cacpipish israelcunaca mana entendircacunachu. Shinallatac ñaupaman Dios ari ninacushcataca cunan punzhacamanmi paicuna rizashpapish, paicunapac yuyai pañuhuan jarcashca shina cacpi, mana entendincuna. Chai jarcashca pañutaca Jesucristollami anchuchinga.

15Cunan punzhacamanmi Moisés mandashcacunata rizacucpipish, paicunapac yuyaitaca chai pañuca jarcacunrac.

16Shina cacpipish Mandac Diosman cutiricpica, chai jarcashca pañuca anchurinmi.

17“Mandac Dios” nishpaca, paipac Espiritutami ninchic. Maijanpish Mandac Diospac Espirituhuan cashpaca, huatashca shinamanta ña cacharirishcami can.

18Chaimanta tucui ñucanchicca ñaupaman ñahuita jarcacushca pañuta anchuchishca cashpami, cunanca Apunchic Jesús sumaimana cashcata espejo shina ricuchicunchic. Shinallatac punzhantami pai shinallatac sumaimana tucushpa c'aticunchic. Paipac Espiritullatacmi pai shinallatac sumaimana cachun, ashtahuan ashtahuan allita ruhuashpa c'aticun.