1 CORINTIOS 14 - Nuevo Testamento en Quichua Cañar 1996

Jaicapi mana uyashca rimaicunata rimanamanta

1Tucuimanta yallica, c'uyaita charinata yuyaichic. Shinallatac Diospac Espíritu imata ruhuac cachun cushcacunata yallita munaichic. Yallicarin Taita Dios ima nishcata huillac canata munaichic.

2Maijanpish jaicapi mana uyashca rimaicunata rimacca mana gentecunamanchu riman, ashtahuanpish Taita Diosmanmi riman. Chaitaca pi mana entendinchu. Shina rimashpaca, Diospac Espíritu rimachicllapimi, pi mana entendipacllata riman.

3Shina cacpipish Dios ima nishcata huillacca tandanacuipi caccuna ashtahuan allita yuyarishpa, sinchiyashpa, cushicushpa c'atina yuyaita charichunmi, chashnaca huillan.

4Jaicapi mana uyashca rimaita rimacca paipac allipacllatacmi riman, ashtahuanpish Dios ima nishcata huillacca tandanacushca criccuna alli c'atichunmi, chashnaca huillan.

5Ñucaca tucui cancuna jaicapi mana uyashca rimaicunata rimaccuna cachunmi munaiman. Shina cacpipish Dios ima nishcata huillaccuna cachunmi, ashtahuanca munani. Chashna cashpami, jaicapi mana uyashca rimaicunata rimactapish atishpa, ashtahuan alli canguichic. Jaicapi mana uyashca rimaicunata rimacpish, tandanacushca criccuna entendichun chai rimashca imata nisha nicushcata huillashpaca, Dios ima nishcata huillac shinallatacmi.

6C'uyashca criccuna, ñuca cancunapacman rishpa, Dios ima nishcata huillanapac randi, ima alli yachaicunata yachachinapac randi, cashcata yachachinapac randi, imatapish shuctac allita pushanapac randica, jaicapi mana uyashca rimaicunata rimacucpica, ¿ima allitac cangayari?

7Flautapish, arpapish chai shinallatac huacacpica, imapi tocacushcapish mana yacharinmanchu.

8Shinallatac macanacuipac c'ayashca tonopi corneta mana uyaricpica, ¿pitac macanacungapacca allichiringayari?

9Chashnallatacmi cancunapish tucunguichic. Cancuna mana entendinalla rimaita rimacpica, ¿pitac cancuna imata nisha nicushcataca entendingayari? Chashna rimashpaca, yangallami rimanguichicman.

10Cai pachapica achca rimaicunami tiyan. Chashna cacpipish chai rimaita rimaccunapuraca entendinacuncunami.

11Ashtahuanpish shuctac rimaita mana entendishpaca, chai rimaita rimacmanca mai caru llactamanta shinami cani, shinallatac chai rimaita rimacpish ñucamanca mai carumanta shinami.

12Diospac Espíritu imata ruhuac cachun cushcacunata charisha nicushpaca, tandanacushca criccuna alli c'atichunmi, ayudanata ashtahuan munana canguichic.

13Shina cashcamanta jaicapi mana uyashca rimaita rimacca, chai rimai imata nisha nicushcata entendingapacmi, Taita Diosman mañana can.

14Jaicapi mana uyashca rimaipi Taita Diosman ñuca mañashpaca, ñuca espirituhuan mañacushcatami yachani. Shina cacpipish ñuca yuyaipica, imata mana entendinichu.

15Shinashpaca, ¿imata ruhuasha? Ñucaca espirituhuanpish, yuyaihuanpish mañanami cani. Shinallatac espirituhuanpish, yuyaihuanpish cantanami cani.

16Canca cambac espiritullahuan Diosta pagui nicpica, ¿ima shinatac shuc manarac yachacca entendingayari? Chashna mana entendishpaca, ¿ima shinatac canhuan pacta Diosta pagui ningayari?

17Diosta pagui nishpa, can mañashca mai alli cacpipish, caishucmanca imapish mana alli cangachu.

18Ñuca tucui cancunata atishpa, jaicapi mana uyashca rimaicunata rimac cashcamantaca, Diosta pagui ninimi.

19Shina cashpapish chunga huaranga rimaita jaicapi mana uyashca rimaipi rimanapac randica, tandanacushca criccunata yachachingapacca entendinalla pichca rimaicunallatami rimasha nini.

20C'uyashca criccuna, ama huahuacuna shina imatapish yuyaichicchu. Mana allita ama ruhuangapacca, llullu huahuacuna shinami cana canguichic. Ashtahuanpish allita yuyaringapacca, ña yuyaccuna shinami cana canguichic.

21Dios quillcachishcapi Mandac Diosca:

“Cai llactapi causaccunamanca

jaicapi mana uyashca rimaicunahuan,

shinallatac shuctac llactamanta cac

rimaicunahuanmi rimachisha.

Chashna rimacpipish,

manatac cazungacunachu” ninmi.

22Chashna cashcamanta jaicapi mana uyashca rimaicunata rimashpaca, mana criccunamanmi Diospac Espíritu rimachicushcata ricuchin. Cutin criccunamanca mana ima canchu. Shina cashpapish Dios ima nishcata huillashpaca, criccunamanmi Diospac Espíritu huillacushcata ricuchin. Cutin mana criccunamanca mana ima canchu.

23Tandanacushca criccuna tandanacuipi paicunapura jaicapi mana uyashca rimaicunata rimanacucucpi, maijan chaita manarac yachac, mana cashpaca manarac cric yaicushpaca, “caicunaca mana juizhuhuanchu” ningami.

24Ashtahuanpish tucui mashna Dios ima nishcata huillacucpi, shuc manarac yachac, mana cashpaca manarac cric yaicushpaca, paillatacmi tucui ima nicushcata uyashpa, “juchayucmi cashcani” nishpa yuyaringa.

25Chashna cacpimi paipac shungu ucupi tucui ima yuyacushcatapish mana pacashpa huillanga. Chashnami Taita Dios cancunahuan cashcatatac yachashpa, cungurishpa, Taita Diosta “allimari cangui” ninga.

“Ruhuana cashca shina, imatapish ruhuaichic” nishcamanta

26C'uyashca criccuna, tucui caicunamanta nishpaca, cancuna tandanacushpaca, shuccunaca salmocunata cantanguichicmi, shuccunaca yachachinguichicmi, shuccunaca Dios ima nishcata huillanguichicmi, shuccunaca jaicapi mana uyashca rimaicunata rimanguichicmi, shuccunaca chai rimai imata nisha nicushcata huillanguichicmi. Shina cashpapish criccuna ashtahuan Jesusta c'atishpa sinchiyachunmi, tucui caicunata ruhuana canguichic.

27Maijan cashpapish jaicapi mana uyashca rimaita rimashpaca, ishcai cashpa, mana cashpaca quimsa cashpapish, shuyanacushpa rimaichic. Shinallatac chai rimaicuna imata nisha nicushcatapish maijan shucca huillanami can.

28Ashtahuanpish tandanacushca criccunapurapi jaicapi mana uyashca rimaita rimacpi, imata nisha nicushcata pi mana huillac tiyacpica, ama rimachun. Chaitaca paillaman shinallatac Diosllaman rimachun ninimi.

29Shinallatac Dios ima nishcata huillaccuna tiyashpaca, ishcai cashpa, quimsa cashpa huillachun. Shuccunaca chai huillashca alli cashcata, mana alli cashcata yuyarichun ninimi.

30Shina cacpipish maijan chaipi tiyacucman imata huillana cashcata Dios ricuchicpica, chai puntaman huillacca upallachun.

31Chashnami tucui mashna yachacushpa, alli yuyaita japichunca, tucuillatac Dios ima nishcataca shuyanacushpa huillana canguichic.

32Dios ima nishcata huillaccunaca quiquin munaita jarcarishpa huillachun.

33Taita Diosca maipish cachun ruhuachunca mana munanchu. Paica sumac causaita cuc Diosmi.

Diospaclla cac tandanacushca criccuna imata ruhuac cashca shinallatacmi,

34huarmicunaca criccunapac tandanacuipica upalla cana can. Chaipica mana rimanachu. Moisés mandashcacunapi nishca shinami, huarmicunaca cusapac mandashca cana can.

35Criccunapac tandanacuipi huarmicuna rimana mana alli cashcamantaca, imata yachasha nishpaca, huasipi paipac cusaman tapuchun.

36Dios rimashca shimita huillanaca mana cancunapurapichu callarishca, shinallatac mana cancunallamanchu chayamushca. Chaitaca cancunallatac alli yuyarichic.

37Maijanpish “Dios ima nishcata huillacmi cani” nicca, mana cashpaca “Diospac Espíritu yuyaita cucpimi, imatapish nicuni” nicca, cai ñuca quillcashcataca Apunchic Jesús mandashca cashcatami yachanga.

38Ashtahuanpish cai mandashcata mana allichu nictaca, paitapish Apunchic Jesusca mana allichu ningami.

39Shinashpaca c'uyashca criccuna, Dios ima nishcata huillac canata yallita munaichic. Jaicapi mana uyashca rimaicunata rimanatapish ama jarcaichicchu.

40Ashtahuanpish imata ruhuashpapish, ruhuana cashca shinallatac allita ruhuaichic. Maipish cachunca ama ruhuaichicchu.