1 TIMOTEO 3 - Nuevo Testamento en Quichua Cañar 1996

Criccunata pushaccuna ima shina canamanta

1Maijanpish tandanacushca criccunata pushac casha nishpaca, allita ruhuanatami yuyan. Cai rimashcaca chashnatacmi can.

2Shina cashcamanta tandanacushca criccunata pushacca, pi mana juchanchishca alli causac, shuc huarmiyuclla, alli yuyaita charic, mana yalli pucllaric, mana maipish cachun causac, huasiman chayaccunatapish alli chasquic, yachachinatapish alli yachachicmi cana can.

3Shinallatac mana machac, p'iñanacunatapish mana munac cana can. Chaipac randica pitapish llaquic, ima p'iñanacui tiyacpipish allichic, cullquita charinata mana yalli munacmi cana can.

4Paipac huasipipish allita pushashpa causac, huahuacunatapish alli cazuchic, alli canata yachachicmi cana can.

5Maijanpish quiquin huasipi mana alli pushashpaca, ¿ima shinatac Taita Diospaclla tandanacushca criccunataca pushangayari?

6Chashna cashcamantaca chai pushacca unai cricmi cana can. Pacta jatun tucushpa diablo urmashca shina llaquichishca cangapac urmanman.

7Paita mana allimi nishpa juchanchicpi diablo ama urmachichunca, tucui gentecunapac alli nishcami cana can.

Criccunata ayudaccuna ima shina canamanta

8Shinallatac criccunata ayudaccuna cangapacca, mana machac, mana llullac, cullquita japingaraicu imapish millaita mana ruhuac, tucui gentecunapacpish alli nishcami cana can.

9Taita Diosmanta yachachishcacunataca, chashnatac cashcamanta mana caita chaita yuyashpa alli c'aticmi cana can.

10Criccunata ayudaccuna cachunca manarac churashpami, paicuna ima shina causacushcatarac ricuna can. Chaipi pi mana juchanchicpica, criccunata ayudac cachun churanallami can.

11Shinallatac huarmicunapish tucuipac alli nishca, pihuanpish mana huashalla parlaric, alli yuyaita charic, imapipish allita ruhuaccunami cana can.

12Criccunata ayudaccunaca shuc huarmiyuclla, shinallatac huahuacunatapish huasi ucupuratapish allita yachachicmi cana can.

13Criccunata ayudaccunaca chashna allita ruhuashpami, tucui criccunapacpish alli nishca canga. Chashna cashpami Apunchic Jesusta crishcatapish mana manchashpa huillangacuna.

Ñucanchic crishcaca tucuimanta yalli alli cashcamanta

14Canta ñalla ricugrina yuyailla cashpapish, caita quillcashpami cachani.

15Ñuca unaiyacpipish, canca Taita Diospaclla tandanacushca criccuna ima shina causana cashcata yachachunmi caitaca quillcani. Huiñaita causacuc Taita Diosta criccunaca alli huillai chashnatac cashcata crishpami, pilar charicuc shina sinchita c'aticunchic.

16Pi mana yachashca, Taita Dios llaquishpa huillashcata ñucanchic crishcaca, tucuimanta yalli allimi:

Apunchic Jesusca

aichayuc tucushpami ricurirca.

Diospac Espirituhuan cashcamanta

tucuitami misharca.

Shinallatac paitaca

angelcunapish ricurcami.

Mana israelcunamanpish*f** paillamantami

paita c'aticcunaca huillashcacuna.

Cai pachapica paitaca

achcacunami crishcacuna.

Jahua pachapipish paitaca

alli nishpami chasquishca carca.