HEBREOS 3 - Nuevo Testamento en Quichua Cañar 1996

Jesusca Moisestapish yalli cashcamanta

1C'uyashca criccuna, cancunaca Diospaclla causachun c'ayashcacunami canguichic. Chashna cashcamanta ñucanchic crishca shina, Jesucristotaca Diosmanta huillac cashcata, shinallatac curacunata jatun mandac cura cashcata yuyashunchic.

2Ima shinami Jesusca Dios ruhuachun nishcata alli pactachic carca, chai shinallatacmi Moisespish Diospac huasipica, tucui imalla ruhuana cashcata pactachirca.

3Shina cashpapish Jesusca Moisesta yalli alli nishcami cana can. Chai shinami huasita ruhuacca chai ruhuashca huasita yalli alli nishca cana can.

4Tucui huasicunami pi cashpapish ruhuashca cana can, ashtahuanpish tucui ima tiyashcatapish Diosmi ruhuashca.

5Ima shinami Moisesca Diospac huasipi Diospacta ruhuac carca, shinallatacmi chai shina ruhuashpa, Taita Dios ima shina q'uipaman huillana cashcata ricuchicurca.

6Ashtahuanpish Diospac Churi cashpami, Jesucristoca Diospac huasipica imatapish allita ruhuacun. Mana caita chaita yuyashpa, cushicushpa shuyacushpaca, ñucanchicmi chai huasica canchic.

Diospac huahuacuna samarina cashcamanta

7Chaimantami Dios quillcachishcapi Diospac Espirituca:

“Dios ima nishcata

cunan cancuna uyashpaca,

8chai shitashca pambapi Taita Diosta

ima ruhuacta ricushun nishpa,

chai mana cazuccuna shina

ama shunguta sinchiyachichicchu.

9Chaipimi cancunapac

ñaupa taitacunaca,

chuscu chunga huatata

imallata ruhuashcata ricushpapish,

cutin ricushun nishpa

ñucataca p'iñachircacuna.

10Chaimantami chai gentecunahuan

ñuca p'iñarishpaca:

‘Paicunapac yuyaipi

ñucata mana cazushpami,

chingarishca shina cashpa,

ñuca ricuchishca ñantaca

mana ricsinata munarcacuna’ nircani.

11Chaimantami ñuca p'iñarishpaca:

‘Ñucahuan samaringapacca

manatac yaicungacunachu’ nircani” ninmi.

12C'uyashca criccuna, cancunapuramanta shucllapish millai yuyaihuan mana crisha nishpa, pacta causac Diosmanta caruyanguichicman.

13Chaipac randica Dios quillcachishcapi nishca shina, cunan causacushparac punzhanta caishuc chaishuc yuyachinacushpa, cancunapac shungu rumiyashca shina tucuchunpish, juchapi pandarichunpish ama saquinguichicchu.

14Ñucanchic callaripi c'aticushca shina, Cristopi shunguta churashpa tucuringacaman c'aticushpaca, Cristo japishca shinallatacmi ñucanchicpish japishun.

15Chaimanta Dios quillcachishcapica:

“Dios ima nishcata

cunan cancuna uyashpaca,

chai mana cazuccuna shina

ama shunguta sinchiyachichicchu” ninmi.

16Taita Dios ima nishcata uyashca q'uipa, ¿paita mana cazuccunaca picunatac carca? Chaicunaca Egipto llactamanta Moisés llucchishca tucui israelcunami*f** carca.

17Shinallatac chai chuscu chunga huatacunataca Taita Diosca, ¿picunahuantac p'iñarishca carca? Chai shitashca pambapi juchallishpa huañuccunahuanmi p'iñarishca carca.

18Shinallatac Taita Diosca, ¿picunatatac “ñucahuan samaringapacca, manatac yaicungacunachu” nirca? Chai mana cazuccunatami chashna nirca.

19Shina cacpica, paicuna mana crishcamantami, chai samarinamanca mana yaicui pudishcata yachanchic.