1 CORINTIOS 7 - Nuevo Testamento en Quichua Cañar 1996

Cazarashcacuna ima shina causanamanta

1Cunanca cancuna quillcashpa, tapushcatami huillagrini. Mana cazarashpa causanaca allica, allimi canman.

2Chashna cacpipish huacllirina munai tiyashcamantaca, c'aripish quiquin huarmillata, huarmipish quiquin cusallata charichun ninimi.

3Shinallatac cusapish quiquin huarmiman cuna cashcata cuchun, huarmipish quiquin cusaman cuna cashcata cuchun ninimi.

4Huarmipac cuerpoca mana pai quiquinpacchu, ashtahuanpish cusapacmi. Cusapac cuerpopish mana pai quiquinpacchu, ashtahuanpish huarmipacmi.

5Chaimanta caishucpish, chaishucpish ama misarinacuichicchu. Shina cashpapish Diosman tucui shunguhuan mañangapacca, ishcaindicta yuyarinacushpami, asha punzhacunacaman chayarinataca saquina canguichic. Chai q'uipaca Satanás*f** huacllirina yuyaita ama cuchun tandaringuichiclla.

6Tucui caicunataca “chashnatami ruhuana canguichic” nishpaca, mana mandanichu, ashtahuanpish yuyaita cunillami.

7Ñucamanta nishpaca, tucui c'aricuna ñuca shina causachunmi munani. Shina cacpipish mana tucuimanchu Taita Diosca chai shina canata cushca, ashtahuanpish shucmanca shuctac laya canata, caishucmanca shuctac laya canatami cushca.

8Mosocunapish, viuda huarmicunapish ñuca shina mana cazarashpaca, allimi canguichicman ninimi.

9Shina cacpipish mana jarcari pudishpaca, cazarachunlla. Chai munailla purinapac randica, cazaranami ashtahuan alli.

10Ña cazarashcacunataca, huarmica cusata ama shitachun nishpami mandani. Caitaca mana ñucachu nini, ashtahuanpish Apunchic Jesusmi mandan.

11Cusata huarmi shitashpapish, ama shuc-huan cazarachun, mana cashpaca cusallahuantac cutin alli tucuchun, shinallatac cusapish huarmitaca ama shitachun ninimi.

12Caishuccunamanta nishpaca, mana Apunchic Jesuschu nin, ashtahuanpish ñucami cashna nini: Maijan cric huauquipac huarmi mana cric cashpapish, paihuan alli cacpica, ama shitashpa, pushashpa causachunlla ninimi.

13Shinallatac maijan cric panipac cusa mana cric cashpapish, paihuan alli cacpica, ama shitashpa, paihuan causachunlla ninimi.

14Chai shina cashpami, cusaca huarmi cric cashcamanta Diospaclla tucunga. Shinallatac mana cric huarmipish, cusa cric cashcamanta paihuan tandanacushcamantami Diospaclla tucunga. Mana shina cashpaca, paicunapac huahuacunaca mana cricpac huahuacuna shinallatacmi cangacuna. Chai shina cashpapish, paicunaca Diospaclla causaccunapurami tucushcacuna.

15Shina cashpapish cusa cashpa, huarmi cashpa, mana cric cashcamanta shitasha nishpaca, shitachunlla. Shina cashpaca, maijan cric huauqui, maijan cric pani cashpapish shitai pudinmi. Taita Diosca ñucanchictaca sumacta causachunmi c'ayarca.

16Can huarmica, ¿cambac cusa canmanta quishpirina cashcata, mana quishpirina cashcataca yachanguichu? ¿Can cusapish cambac huarmi canmanta quishpirina cashcata, mana quishpirina cashcataca yachanguichu?

17Ashtahuanpish Apunchic Jesucristo cancunaman imata ruhuachun yuyaita cushca shina, Dios cancunata acllai punzha ima shinami carcanguichic, chai shinallatac causanguichic ninimi. Tandanacushca criccunataca maipipish chai shinallatacmi mandani.

18Maijan c'ari cashpapish Dios c'ayacpica, circuncisionta*f** ruhuashca cashpapish, circuncisionta ama pacachun. Shinallatac mana circuncisionta ruhuashca cashpapish, Dios c'ayacpica, ama circuncisionta ruhuachun ninimi.

19Taita Diosmanca circuncisionta ruhuashcapish, mana ruhuashcapish mana ima canchu, ashtahuancarin pai mandashcacunata cazunami ashtahuan alli.

20Dios cancunata acllai punzha ima shinami carcanguichic, chai shinallatac caichiclla.

21Amoyuc cashca cashpapish, canta Dios acllacpica, ama llaquiringuichu. Shina cashpapish ima punzha amopacmanta llucshinalla cacpica, llucshinguillami.

22Maijan amoyuc cashca cashpapish, Apunchic Jesusta crishpaca, ña mana amoyucchu can, cunanca Apunchic Jesuspacta ruhuachun acllashcami. Shinallatac maijanpish mana amoyuc cashca cashpapish, cunanca Apunchic Jesuspacta ruhuachun c'ayashcami.

23Taita Diosca tucuimanta yalli valic-huanmi, cancunataca paipacta ruhuachun randirca. Shina cashcamanta ama runacunapacllata ruhuashpa, huatashca shina causaichicchu.

24Shina cashcamanta c'uyashca criccuna, Dios cancunata acllai punzha ima shinami carcanguichic, chai shinallatac paipac ñaupapica c'aticunguichiclla.

25Manarac cazarashcacunata yachachingapacca, Apunchic Jesús mandashcataca mana charinichu. Shina cashpapish Apunchic Jesús c'uyashpa, paita alli c'aticta ruhuashcamantami, ñuca yuyaimanta cai shina nini:

26Ñuca yuyaipica llaqui punzhacunapi causacushcamantaca, manarac cazarashcacunaca ima shina cashca shinallatac causacuchunlla ninimi.

27Chaimanta can cazarashca cashpapish, ama huarmita shitaichu. Mana huarmita charishpapish, ama cazaraichu.

28Cazarashpapish mana juchallinguichu. Shinallatac soltera cazarashpapish mana juchallinchu. Shina cacpipish cazaraccunaca llaquitami cai pachapi apancuna. Chai llaquicunata charichunca, ñucaca mana munanichu.

29C'uyashca criccuna, ñucaca caitami nisha nini: Cai pachapica mana unai huatacunatachu causashun. Chashna cashcamanta huarmiyuc c'aricunaca, mana huarmiyuc cashca shina causachun.

30Llaquilla caccunaca, mana llaquilla cashca shina cachun. Shinallatac cushilla caccunapish, mana cushilla cashca shina cachun. Chashnallatac ima randishcata charishpapish, imata mana charishca shina cachun.

31Cai pachapi ima tiyashcallahuan cushicucpish, ama cushicuchun. Cai pacha ima tiyashcacunaca chingarinallami.

32Cancuna llaquilla causachunca mana munanichu. Mosoca Apunchic Jesuspacta ruhuana yuyailla cashpami, Apunchic Jesusllata cushichinata munan.

33Ashtahuanpish cazarashca runaca huarmita cushichingapacmi, cai pachapi ima tiyashcallata yuyashpa causan.

34Chashnami paicuna ishcai layata yuyan. Solterapish, ña mana cusayuc huarmipish paipac cuerpohuan, espirituhuan Diospaclla ch'icanyarishpami, Apunchic Jesuspacta ruhuana yuyailla can. Ashtahuanpish cazarashca huarmica cusata cushichingapacmi, cai pachapi ima tiyashcallata yuyashpa causan.

35Tucui caicunata nishpaca, mana cancunata jarcasha ninichu, ashtahuanpish cancunapac allipacmi, tucui shunguhuan Apunchic Jesuspacta ruhuashpa, ima shina causana cashca shina causachun chashnaca nini.

36Maijan taitapish paipac ushi cazarana tiyashca jahua, mana cazarashpa juizhuyana mana alli caipac cacpica, cazarachichunlla. Cazaranaca mana juchachu.

37Shina cashpapish paipac shungu munashca shina, paipac ushi mana cazaranaca allimi canga nishpa yuyashpaca, allillatatacmi ruhuan.

38Shinashpaca maijanpish paipac ushita cazarachishpaca, allitami ruhuan. Mana cazarachishpacarin, ashtahuan allitamari ruhuan.

39Cusayuc huarmica cusa causacucpica, mandashcapi nishca shinaca maita mana ch'icanyaipacmi, ashtahuanpish cusa huañucpica, Apunchic Jesusta cric-huanca pihuan cashpapish cazaranallami.

40Chashna cacpipish ñuca yuyaipica mana cutin cazarashpami, ashtahuan cushi causanman yuyanimi. Caitaca Diospac Espíritu ñucamanpish yuyaita cushcamantami nicuni.