1 TESALONICENSES 1 - Nuevo Testamento en Quichua Cañar 1996

Pablo paihuan caccunandic quillcashcamanta

1Cai quillcataca Pablomi Silvanohuan, Timoteohuan tucushpa, Tesalónica pueblopi causac tandanacushca criccunaman quillcashpa cachanchic. Cancunaca Taita Dioshuanpish, Apunchic Jesucristohuanpish shuc shinallami canguichic. Cancunamanca Taita Dios mai c'uyashpa, cushi causaita cushca cachun ninchicmi.

Tesalónica pueblopi causac criccuna alli crishcata ricuchishcamanta

2Ñucanchic Taita Diosman mañacushpaca, tucui cancunata yuyarishpami, Taita Diostaca pagui nishpa mañacunchiclla.

3Cancuna tucui shunguhuan crishpa, Diosta c'uyashpa paipacta ruhuacushcamantapish, llaquita apacushpapish mana manchashpa, Apunchic Jesús cutimuna cashcata shuyacushcamantapish, ñucanchic Taita Diosman mañacushpaca, pagui nishpa yuyaricunchicllami.

4C'uyashca criccuna, Taita Diosllatac cancunata c'uyashpa acllashca cashcataca yachanchicmi.

5Ñucanchic cancunaman quishpirinamanta alli huillaita huillacushpaca, mana rimaillahuanchu yachachircanchic, ashtahuanpish Diospac Espíritu yachachicpimi, imatapish ruhuaclla Diosmanta allicunata ruhuashpa ricuchircanchic. Ñucanchic cancunaman alli huillaita huillacushcaca chashnatac cashcata alli yachashpa, cancunapac allipac ruhuashcataca yachanguichicmi.

6Cancuna quishpirinamanta alli huillaita chasquishpami, ñucanchic c'atic shinallatac Apunchic Jesustaca c'aticunguichic. Mai llaquihuan cashpapish, Diospac Espíritu cushichicpimi, cushilla canguichic.

7Chai shina cashpami, cancunaca Macedonia llactapi, Acaya llactapi causac tucui criccunamanca allita c'atinata ricuchircanguichic.

8Cancuna crishcataca mana Macedonia llactallapi, mana Acaya llactallapichu yachac chayashcacuna, ashtahuanpish tucui llactacunapimi cancunamanta uyashpaca, Diosmanta alli huillaitaca yachac chayashcacuna. Chaimantami cancuna alli crishcataca, ña mana huillana canchic.

9Chaipac randica, paicunallatacmi ñucanchic chayacpi cancuna ima shina chasquishcata, shinallatac ima shina ruhuashcalla dioscunata alli ninata saquishpa, causac Taita Diostatac servingapac tigrarishcata parlancuna.

10Shinallatac huañushcacunapuramanta Taita Dios causachishca, paipac Churi Jesucristo jahua pachamanta cutin shamunata shuyacushcatapish parlancunami. Taita Dios p'iñarishpa, shamuc punzhapi llaquichinamanta quishpichicca Jesucristomi.