1Cunanca Dios mingashcata paillahuantac ruhuaccuna cashcamantami, ñucanchicca Dios mai c'uyashpa, cancunaman allicunata cushcataca ama yangalla cashcata yuyanguichicchu nishpa rimanchic.
2Dios quillcachishcapica:
“Cancunata ayudana punzhapimi uyarcani.
Quishpichina punzhapimi quishpichircani” ninmi.
¡Shina cashcamanta cunanmari Taita Dios ayudasha nicun! ¡Cunanmari Taita Dios quishpichisha nicun!
Pablo huillashpa, llaquita apashcamanta3Ñucanchic ima ruhuashcacuna pipacpish mana allichu nishca ama cachunca, pimanpish ima mana allita ruhuashpa mana ricuchicunchicchu.
4Chaipac randica tucui imata ruhuashpapish, Diospacta ruhuaccuna cashcatami ricuchicunchic. Chashnami llaquichicpipish, ima llaquihuan cashpapish, ima illaclla cashpapish, mana p'iñarishpa alli shunguhuan canchic.
5Shinami macacpipish, carcelpi churacpipish, tandanacushpa c'amicpipish, sinchi ruhuaipipish, mana suiñushpapish, shinallatac yarcaihuanpish carcanchic.
6Shinallatac pi mana juchanchipac, alli causac, imapish cashcata alli yachac, mana p'iñaric, llaquiccunami canchic. Diospac Espíritu ñucanchic shungupi cashcamantami, chuya shunguhuan c'uyaccuna cashcatapish ricuchinchic.
7Ñucanchic huillacushca chashnatac cashcamanta, shinallatac Taita Dios imatapish ruhuaclla cashcamantami, chashnaca causanchic. Chashnami ñucanchicca macanacungapacpish, misaringapacpish cashcata ruhuashpa causanchic.
8Maijan cutinca alli nishcami canchic. Maijan cutinca mana alli nishcami canchic. Shinallatac maijan cutinca “allicunami” nincunami. Maijan cutinca “mana allichu” nincunami. Cashcata nicucpipish, “llullaccunami canguichic” nincunami.
9Alli ricsishca cacpipish, mana ricsishca shinatami charincuna. Huañunalla cashpapish, causacunchicracmi. Yalli macashpapish, mana huañuchincunachu.
10Llaquilla cashpapish, punzhantami cushicunchic. Huacchacuna shina cashpapish, taucacunatami chayucyachinchic. Imata mana charic shina cashpapish, tucuitami charinchic.
11¡Corinto pueblopi causac criccunalla! Imatapish mana pacashpami, cancunamanca parlanchic. Ñucanchic shungupi imata yuyashcatapish, tucuitami ricuchinchic.
12Ñucanchicca cancunamanca tucui shungu yuyashcatami huillacunchic, ashtahuanpish cancunami pacashpa mana huillanguichic.
13Chashna cashcamantami shuc taita huahuacunata rimac shina, cancunamanca ñucanchic ima shina cashcata huillanchic. Chai shinallatac cancunapish imatapish mana pacashpa huillachunmi munanchic.
Dios causana huasi cashcamanta14Cancunaca mana criccunahuanca yugushca shinaca, ama tandanacuichicchu. Cashcata ruhuacca mana allita ruhuaccunahuanca, ¡maitatac apanacungayari! Shinallatac luzpish amsahuanca, ¡maitatac tandanacungayari!
15Cristohuan Satanashuanca*f**, ¡maitatac shuc yuyailla tucungayari! Shinallatac shuc cric-huan shuc mana cric-huanca, ¡maitatac shuc yuyailla tucungayari!
16Dios causana huasihuan ruhuashcalla dioscunata adorana huasihuanca, ¡maitatac shuc shinalla tucungayari! Ñucanchicmari causac Dios causana huasica canchic. Diosllatacmi:
“Ñucaca paicunahuanmi causasha,
paicunahuanmi purisha.
Ñucaca paicunapac Diosmi casha.
Shinallatac paicunaca
ñuca acllashcacunami canga” nishca.
17Shina cashcamantami Mandac Diosca:
“Paicunapuramanta llucshichic.
Paicunamanta ch'icanyarichic.
Ima millana mapayachic-huanca
ama chapurichicchu.
Shina cacpica ñucaca chasquishami” ninmi.
18Shinallatac tucui imatapish ruhuac Mandac Diosca:
“Cancunapac Taitami casha.
Cutin cancunaca ñuca churicuna,
ñuca ushicunami canguichic” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
