1Ñaupa huiñai taitacunata rimashpaca, ama sinchita rimangui, ashtahuanpish sumacta quiquin taitata shina cunangui. Shinallatac q'uipa huiñaicunataca, quiquin huauquita shina sumacta rimangui.
2Ñaupa huiñai mamitacunataca quiquin mamata shina, shinallatac q'uipa huiñai solteracunataca quiquin panita shina chuya shunguhuan rimangui.
3Imatapish mana charic viuda huarmicunatapish ayudangui.
4Ashtahuanpish maijan viudapish huahuacunata, nietocunata charicpica, chai huahuacunatarac paicunata ima shina taita mama huiñachishcata yuyarishpa, mamata ayudachun nishpa yachachingui. Chaimi alli, shinallatac Taita Diospish chaitami munan.
5Imatapish mana charic viuda huarmica Taita Diospi shunguta churashpami, “paica cungallami” nishpa punzhapish, tutapish mañacunlla.
6Ashtahuanpish quiquin munaillata ruhuashpa causac viuda huarmica, causacushpapish huañushca shinami.
7Paicunata shuccuna ama juchanchichunmi, caicunata yachachishpa mandachun nini.
8Maijanpish quiquin aillucunapurata, ashtahuancarin quiquin huasi ucupi caccunata mana llaquicca, crishcata saquishpa, mana cric gentecunata yallimi tucun.
9Tandanacushca cric viudacunapac quillcanapica, shuc cusallahuan causashca sucta chunga yalli huatata charic viudacunapac shuticunallata quillcangui.
10Paicunaca paicunapac huahuacunata alli huiñachic, huasiman shamuccunatapish alli chasquic, llaquilla causaccunata cushichic, criccunapac chaquita jahuac, shinallatac imatapish allita ruhuaccunami cana can. Tucui cai allicunata ruhuashcamantami, tucuipac alli nishca cana can.
11Manarac sucta chunga huatata charic viudacunataca, tandanacushca cric viudacunapac quillcanapica ama quillcanguichu. Paicunaca mana alli yuyaicuna shamucpi Cristopacta ruhuanata saquishpa, cutin cazarasha ningacunami.
12Chashna cazarashpaca, paicuna Cristopacta ruhuanata mana pactachishcamantami llaquiman ringa.
13Shinallatac huasi huasi purishpami, yanga puric tucuncuna. Chashnallapish mana tucunchu, ashtahuanpish huashalla llulla parlocunahuan purishpami, tucuipi satirishpa manapish cashcata parlancuna.
14Chashna cashcamantami huambrarac viuda huarmicunataca cazarashpa, huahuacunata charishpa, quiquin huasipi sumacta causachun nini. Chashna causacpimi, criccunata p'iñaccunaca mana juchanchingacuna.
15Ñami maijan viuda huarmicunaca Cristota c'atinata saquishpa, Satanasta*f** c'atishca.
16Tandanacushca criccunaman ama yallimana ayudana cachunca, criccunapac familiapi viuda huarmi tiyacpica, paicunaracmi ayudana can. Chashna ayudacpimi, tandanacushca criccunamanca imatapish mana charic viudacunallaman ayudana tucunga.
17Tandanacushca criccunata allita pushaccunaca, tucuimanta yallitami japina can. Ashtahuancarin alli huillaita huillashpapish, yachachishpapish puriccunami yallita japina can.
18Dios quillcachishcapica: “Trillac huagrataca pacta shimita huatanguiman” ninmi. Shinallatac: “Imata ruhuashcamantaca, imata japinata charinmi” ninmi.
19Tandanacushca criccunata pushacta maijan shuclla juchanchicpica ama juchanchinguichu, ashtahuanpish ishcai, quimsa “chaica chashnatacmi” nicpi, canca juchanchingui.
20Shina cacpipish juchata ruhuashpa c'aticpica, tucui tandanacushca criccunapac ñaupapimi rimana cangui. Chashna ruhuacpimi, tucui mashna manchangacuna.
21Taita Diospac, Quishpichic Jesucristopac, shinallatac Diospac acllashca angelcunapac ñaupapimi, pimanpish mana tucushpa, imapish cashcallata ruhuachun nishpa caicunataca mingani.
22Maijanpish Taita Diospacta ruhuachun uma jahuapi churashpa Taita Diosman mañangapacpish, puntaca alli yuyarinami cangui. Pacta juchayuccunaman tucushpa, mana allita ruhuanguiman. Tucui imapish mana allimantaca huacaichiringui.
23Ama huicsa nanaihuan ungushcalla cangapacca, asha vinotapish ubiangui. Ama yacullata ubianguichu.
24Maijancunapac juchaca manapish pi tapucpi ricurinllami. Cutin maijancunapacca cunan mana ricurishpapish, Taita Diospac ñaupapica ricuringallami.
25Chashnallatacmi allita ruhuashcacunaca tigrai ricurinlla. Mana tigrai ricurishpapish, q'uipata ricuringallami.
Who We AreWhat We EelieveWhat We Do
2025 by iamachristian.org,Inc All rights reserved.
