2 TIMOTEO 2 - Nuevo Testamento en Quichua Cañar 1996

Jesucristopac alli soldado shina canamanta

1Ñuca c'uyashca huahua shina Timoteo, canca Jesucristohuan shuc shinalla cashcamanta, Dios c'uyashpa allicunata cushcahuanca ashtahuan sinchi tucuiyari.

2Tauca gentecunapac ñaupapimi ñuca ima yachachishcataca uyarcangui. Chaitaca yachachinata pudic alli criccunaman, paicunapish shuccunaman yachachichun mingai.

3Canca Jesucristopac alli soldado shina, ñuca shina llaquicunataca apanguilla.

4Maijanpish soldado cashpaca, paipac ima ruhuanatapish saquishpami, paita mandac imata nishcallata ruhuan.

5Chashnallatac maijan pucllacpish, pucllana cashca shina mana pucllashpaca, chai japina cashcataca mana japinchu.

6Maijan tarpuc runa cashpapish, pai yallita trabajacushcamantaca pairacmi japinata charin.

7Cai ñuca nishcacunata alli yuyaricpica, Apunchic Jesucristollatacmi tucui imapish alli yuyaicunataca cunga.

8Mandac Davidpac aillupuramanta cac, shinallatac huañushcacunapuramanta causarishca Jesucristotami yuyarina cangui. Quishpirinamanta huillashpaca, chaitami huillani.

9Chaita huillacushcallamantami huañuchicta shina cadenahuan huatashca llaquita apacuni. Shina cacpipish Diosmanta huillanaca mana huatashcachu.

10Chaimantami Taita Dios tucui acllashcacuna Jesucristohuan shuc shinalla tucushpa, sumaimana huiñai causaita paicunapish japichun nishpa cai llaquicunataca apacuni.

11Cai nishcaca chashnatacmi can:

“Jesucristohuan huañushca cashpaca,

paillahuantacmi causashun.

12Llaquicunata apashpaca,

paihuanmi mandashun.

Pingashpa ‘mana paipacchu cani’ nicpica,

paipish ‘mana ñucapacchu cangui’ ningami.

13Ñucanchic pai ima nishcacunata

mana pactachicpipish,

paica imatapish pactachishpa c'atinmi.

Paica pai ima shina cashcataca

mana yanga ninllachu” nishcami.

Diospacta ruhuaccuna ima shina alli canamanta

14Tandanacushca criccunapurapi “caica chashnami, chaica chashnami” ninacushpa ama p'iñanacui tiyachunca, Diospac ñaupapi cunashpa caicunata yachachingui. Chashna rimanacuicunaca imapacpish mana allichu, ashtahuanpish uyaccunata pandachinmi.

15Diospac ñaupapi alli ricuringapacca, shuc alli servic runa shina imatapish allita ruhuana yuyailla caiyari. Chashna allita ruhuashpami imamanta mana pingaichishca cangui, shinallatac alli huillaitaca allita yachachingui.

16Imapish yanga rimanacuicunamantaca anchuringui. Chai rimaicuna mirarishpaca, ashtahuan ashtahuan p'iñanacuipi churashpami, Diosmanta caruyachinga.

17Chai rimanacuicunami sisu ung:ui shina mirarishpa c'atinlla. Chai shina rimaccunaca Himeneopish, Filetopish carcacunami.

18Paicunaca chashna tucushpami cashcata nic yachachishcata saquishpa, “huañushcacunaca ñami causarishca” nishpa tauca criccunata pandachishpa puricuncuna.

19Shina cacpipish Taita Diosca huasita ruhuangapac callaripi churashca rumi shinatami, paipac rimashcataca churashca. Chai rimashcaca: “Taita Dios pai acllashcacunataca ricsinmi. Shinallatac Diosta criccunaca tucui millaimanta anchurinami can” nishcami.

20Shuc jatun huasi ucupica mana curimanta, cullquimanta ruhuashcacunallachu tiyan, ashtahuanpish caspimanta, turumanta ruhuashca imacunapish tiyanmi. Chashnami maijancunaca allita ruhuangapac alli, cutin maijancunaca yangallata ruhuangapac alli can.

21Chashnallatacmi maijanpish Diospaclla tucushpa Apunchic Jesuspacta allita ruhuangapacca, tucui mana allicunamanta anchurina can. Shina cashpami imapish allita ruhuangapacca alli canga.

22Huambracunapac yuyaita saquishpa, imapish cashcallata ruhuashpa, alli crishpa, tucui shungumanta Taita Diosman mañaccunahuan tandarishpa, c'uyaihuan apanacushpa sumacllata causangui.

23Imapish yanga parlocunataca ama uyanguichu. Chaicuna p'iñanacuipi churac cashcataca canllatac yachanguimi.

24Maijanpish Apunchic Jesusta servicca mana pihuanpish p'iñanacushpachu purina, ashtahuanpish tucuihuan apanacucmi cana can. Shinallatac mana p'iñaricpish, alli yachachicpish canami can.

25P'iñaccunatapish c'uyai shunguhuanmi yachachina can. Chashna yachachicpi Taita Dios paiman cutirina yuyaita cucpi, cashcata nic huillashcata cringapishchari.

26Chashna crishpami diablo huatashpa, tucllapi shina pai munashcata ruhuachishpa causacushcamantaca, yuyarishpa llucshinga.