2 TIMOTEO 4 - Nuevo Testamento en Quichua Cañar 1996

1Canmanca Taita Diospac ñaupapi, shinallatac huañushcacunatapish, causaccunatapish Jatun Mandac shina taripangapac shamuc Apunchic Jesucristopac ñaupapimi caitaca mingani:

2Alli huillaitaca uyasha nicpi, mana uyasha nicpipish huillacunguilla. Mana p'iñarishpa alli yachachishpa rimacuilla, cunacuilla nishpami mingani.

3Cashcata nic huillashcata mana uyashun nina punzhacuna chayamungami. Gentecunaca paicuna munashca shinata yachachichunmi, shuctac shuctac yachachiccunata mashcanga.

4Shinallatac cashcata nic huillashcataca manatac uyashun nishpami, imapish yanga parlocunallata uyangacuna.

5Chashna cacpipish canca llaquita apashpa, cambac ruhuana cashcata pactachinguilla. Ashtahuan alli yuyaihuan quishpirinamanta alli huillaitaca huillanguilla.

6Ñucaca ñami Taita Diosman cushpa huañuchina shinalla cani. Ñuca huañuna punzhaca ñami chayamucun.

7Ñucaca Jesusta crinata mana saquishpami, callpaipi mishac shina chai chayana cashcaman ña chayashcani.

8Cunan punzhamanta pachami cashcata ricuchic, ñucaman cuna cashca coronata Taita Diosca charicun. Chaitaca cashcata ruhuashpa taripac Apunchic Jesucristomi, taripana punzhapica cunga. Mana ñucallamanchu cunga, ashtahuanpish tucui pai cutimuna punzhata c'uyaihuan shuyaccunamanpish cungami.

Timoteo imata ruhuachun Pablo yachachishcamanta

9Ñucata ricungapac ima shinapish utca shamuiyari.

10Demas runaca cai pachapi imalla tiyaccunapi shunguta churashpami, ñucata shitashpa Tesalónica puebloman rirca. Shinallatac Crescente runaca Galacia llactamanmi rirca. Cutin Tito runaca Dalmacia llactamanmi rirca.

11Lucas runallami ñucahuan caipi saquirca. Chaimanta Marcos runata mashcashpa pushamui. Paica ima ruhuanapipish ñucataca ayudangami.

12Tíquico runataca Efeso pueblomanmi cacharcani.

13Can shamushpaca, Troas pueblopi causac Carpo runapac huasipi ñuca saquimushca churanatapish, librocunatapish apamungui. Ashtahuancarin quillcana caracunata apamungui ninimi.

14Fierrocunata allichishpa causac Alejandro runaca ñucata mana allita ruhuashpami llaquichirca. Pai chashna ruhuashcamantaca, Taita Diosmi paitapish llaquichinga.

15Paica ñucanchic huillashcata mana cazushpami, ñucanchichuanca yallita p'iñarirca. Chaimanta canpish paimanta cuidaringui ninimi.

16Juezcunapac ñaupapi punta ñuca rimaricucpica, pi ñucamanta mana rimashpami ñucallata tucui shitashpa rircacuna. Paicuna chashna ruhuashcataca Taita Dios ama yuyarishca canman ninimi.

17Chashna cacpipish Apunchic Jesusca mana ñucallata saquishpami sinchiyachirca. Chaimantami quishpirinamanta alli huillaita allita huillashpaca, tucui mana israelcunapish*f** uyachun huillarcani. Chashnami Apunchic Jesusca ñucataca, huañuchiccunamantaca p'iña leonpac shimimanta shina anchuchirca.

18Chashnallatacmi tucui mana allicunamanta anchuchishpa, pai mandacuc jahua pachaman chayangacaman ñucataca huacaichinga. ¡Paitaca tucui mashna huiñai huiñaita “sumaimanami cangui” nishunchic! Chashna cachun.

Tucuchingapac Pablo “allilla cashca cachun” nishcamanta

19Onesiforo runatapish, tucui paipac huasi ucupi causaccunatapish, shinallatac Priscila huarmitapish, Aquila runatapish “allilla cashca cachun” ninimi.

20Erasto runaca Corinto pueblopimi saquirirca. Trófimo runataca ungushcatami Mileto pueblopi saquimurcani.

21Tamia punzhacuna manarac chayamucpi, ima shinapish shamui. Eubulopish, Pudentepish, Linopish, Claudiapish shinallatac tucui criccunami “allilla cashca cachun” nishpa cachancuna.

22Apunchic Jesucristo canhuan cachun. Shinallatac Taita Diosca paipac sumaimana c'uyaita tucui cancunaman cushca cachun ninimi.