1 SAN PEDRO 2 - Nuevo Testamento en Quichua Cañar 1996

1Shina cashcamanta tucui laya millaicunatapish, llullashpa crichinatapish, shuccuna ama charichun munanatapish, mishqui shimi canatapish, shinallatac tucui laya mana allita parlanacunatapish saquichic.

2Dios rimashca shimita yachashpa, huiñashpa quishpiringapacca, cunanlla huacharishca huahuacuna lechellata munac shina, imahuanpish mana chapushca, Dios rimashca shimillata yachanata munaichic.

3Apunchic Jesús mai c'uyac cashcata ña yachashcamantami, chaita ruhuana canguichic.

Cristoca causac rumi shina cashcamanta

4Apunchic Jesusman chayarichic, paica causac rumi shinami. Paitami gentecunaca mana valichishpa shitashca. Shina mana valichishca cacpipish, Taita Diosmanca achca valic acllashca rumimi can.

5Chashna chayaricpimi, Taita Dios causana huasipica causac rumicuna shinata, shinallatac Diospaclla cac curacunata Diosca ruhuanga. Jesucristomantami Diospac Espíritu yuyaita cucpi cancuna cushcaca, mishquilla ashnacuc shina cachun chashnaca ruhuanga.

6Shina cashcamantami Dios quillcachishcapica:

“Tucuimanta yalli

huasita callaringapac acllashca,

mai valishca Rumitami

Sión*f** pueblopi churani.

Maijanpish chai Rumipi shunguta churacca,

mana pingaichishcachu canga” ninmi.

7Cancuna Cristota criccunamanca, paica mai valishcami can. Ashtahuanpish chaita mana criccunamanca, Dios quillcachishcapi nishca shinami pactashca. Dios quillcachishcapica:

“Huasita ruhuaccuna

mana nishca,

shitashca rumillatacmi,

huasita callaringapac

tucuimanta yalli

alli Rumica tucushca” ninmi.

8Shinallatac:

“Cai rumipimi

mitcarishpa urmangacuna” nishcapish pactarcami.

Paicunaca Dios rimashca shimita mana cazushcamantami mitcarincuna. Paicunataca ñaupamanmi Diosca chashna tucuchun nishca.

Dios acllashcacuna cashcamanta

9Ashtahuanpish cancunaca Dios acllashpa ch'icanyachishcacuna, Jatun Mandacpacta ruhuac curacuna, jucha illaccuna cachun acllashcacuna, shinallatac Dios munashpa paipacllatac ruhuashcacunami canguichic. Amsamanta sumac achic luz shina causaiman llucchic Dios ruhuashca sumaimanacunata huillachunmi, chashnaca ruhuashca.

10Cancunaca ñaupaca Diospac huahuacunallapish mana carcanguichic. Ashtahuanpish cunanca Diospac huahuacunami tucushcanguichic. Ñaupaca Dios mana llaquishcami carcanguichic. Shina cashpapish cunanca Dios llaquishcami canguichic.

Diospacta ruhuaccuna shina causanamanta

11C'uyashca criccuna, cancunaca caru llactamanta shamushpa, causac shinallami cai pachapica canguichic. Cai pacha jucha munaicunaca cancunapac almahuanca macanacucunmi. Shina cashcamanta chai munaicunamanta huacaichirichun ninimi.

12Diosta mana cazuccunapac ñaupapica allita ruhuashpa causaichic. Shina causacpimi, cancunata cunan “millaita ruhuaccuna” nishpa juchanchishpapish, cancuna allita ruhuacushcata ricushpaca, Dios taripana punzhapica Taita Diosta “allimari cangui” ningacuna.

13Apunchic Jesucristomanta cai pacha tucui mandaccunatapish cazuichic. Llactacunata jatun mandactapish tucuita yalli jatun mandac cashcamanta,

14shinallatac pai churashca mandaccunatapish cazuichic. Paicunatami mana allita ruhuaccunataca llaquichichun, shinallatac allita ruhuaccunataca “allimi cangui” nichun churarca.

15Imata mana yachac upacuna cancunata ama juchanchichunca, allita ruhuachunmi Taita Diosca munan.

16Huatashca shinamanta cacharichishcami canguichic. Shina cashpapish “cacharishcami canchic” nishpaca, ima millaitapish ama ruhuaichicchu. Chaipac randica Diospacta ruhuaccuna shina causaichic.

17Tucuihuan alli caichic, criccunata c'uyaichic, Diostaca manchaichic, shinallatac llactacunata jatun mandac-huanpish alli caichic.

Serviccuna imata ruhuana cashcamanta

18Serviccunaca, cancunapac amocunata tucui imapipish cazuichic. Ama c'uyac, llaquic amocunallata cazuichicchu, ashtahuanpish mana alli amocunatapish cazunami canguichic.

19Dios munashca shina causacushpa, manapish llaquichina cacpi llaquichishca cashpaca, Taita Diospac ñaupapica allitami ruhuanguichic.

20Cancuna ima mana allita ruhuashcamanta llaquichicpi, mana p'iñarishpa, llaquita apashpaca, ¿ima allitatac japinguichicyari? Allita ruhuashcamanta llaquichicpi, mana p'iñarishpa, llaquita apashpami, Diostaca cushichinguichic.

21Chai shina causachunmi Taita Diosca c'ayarca. Cristoca pai llaquita apashca shinallatac cancunapish llaquita apachunmi, cancunamanta llaquita aparca.

22Cristoca ima juchata jaicapi mana ruhuarcachu, shinallatac pitapish llullashpaca mana crichircachu.

23Paita c'amicpipish, mana chashnallatac c'amishpa cutichircachu. Llaquichicpipish, “cantapish llaquichishami” nishpaca mana nircachu. Chaipac randica cashcata ricushpa, taripac Diosllatac llaquichichunmi saquirca.

24Ñucanchic juchata mana ruhuangapac huañushca shina tucushpa, cashcata ruhuashpa causachunmi, Cristollatac paipac cuerpopi ñucanchic juchacunata apashpa, cruzpi huañurca. Cancuna alliyachunmi, Cristoca chugririshca carca.

25Cancunaca chingarishca ovejacuna shinami ñaupaca puricurcanguichic. Shina cashpapish cunanca cancunata cuidashpa Michic Cristopacmanmi tigrarishcanguichic.