ROMANOS 14 - Nuevo Testamento en Quichua Cañar 1996

Shuctac criccunata mana juchanchina cashcamanta

1Manarac sinchi criccunataca mana caita chaita nishpami, alli chasquina canguichic.

2Maijan criccunaca: “Imatapish micunalla” nishpami yuyancuna. Cutin maijan manarac sinchi criccunaca: “Chagrapi p'ucushca llullu micunallatami micuna” nishpami yuyancuna.

3Shina cashcamanta tucuita micucca mana tucuita micuctaca mana p'iñanachu, shinallatac mana tucuita micucpish, tucuita micuctaca mana p'iñashpa rimanachu. Diosca ima shina cashcatapish chasquishcallami.

4Shina cacpica, ¿ima nishpatac canca shucpac servictaca juchanchishpa rimangui? Alli cachun, mana alli cachunpish paipac amollatacmi imatapish ninga. Apunchic Jesús imatapish ruhuaclla cashcamanta paita huacaichicpimi, alli nishca canga.

5Cutin maijan criccunaca: “Shuc punzhami caishuc punzhamanta ashtahuan alli” nincunami. Cutin maijan criccunaca: “Tucui punzhacunami chai shinallatac can” nincunami. Chashna cashcamantaca quiquin ima shina crishca shinami, alli crina canguichic.

6Maijanpish shuc punzhata Taita Diospac cachun ch'icanyachishpaca, Apunchic Jesusta alli ningapacmi ch'icanyachin. Maijanpish tucuita micucca, Apunchic Jesusta alli ningapacmi Diosta pagui nishpa micun. Shinallatac mana tucuita micucpish, Apunchic Jesusta alli ningapacllatacmi Diosta pagui nishpa, mana tucuita micun.

7Maijan ñucanchic causashpapish, mana quiquinpacllatacchu causanchic. Shinallatac maijan ñucanchic huañushpapish, mana quiquinpacllatacchu huañunchic.

8Chashna cashcamanta causashpapish, Apunchic Jesuspacmi causanchic. Huañushpapish, Apunchic Jesuspacllatacmi huañushun. Chashna cashcamantaca causashpapish, huañushpapish Apunchic Jesuspacmi canchic.

9Shina cachunmi Apunchic Jesusca huañushcacunapacpish, causaccunapacpish Mandac cangapac huañushpa causarirca.

10Shina cacpica, ¿ima nishpatac caishuc crictaca p'iñashpa rimangui? ¿Ima nishpatac caishuc crictaca p'iñangui? Tucuimi Diospac ñaupapica ricurigrishun. Paimi allitapish, mana allitapish ninga.

11Dios quillcachishcapica:

“Mandac Diosca:

‘Ñucaca causacucllami cani.

Chashna cashcamantami ñuca ñaupapica

tucui mashna cunguringacuna.

Tucuimi ñucataca

“canca Diosmi cangui” nishpa

alli ningacuna’ ” ninmi.

12Shina cashcamantaca ñucanchic quiquinllatacmi imata ruhuashcacunataca Taita Diosman ricuchigrina canchic.

Shuctac criccunata mana pandachinamanta

13Chaimanta ñucanchicca caishucta chaishucta mana allichu nishpaca, mana rimanachu canchic. Chaipac randica, shuctac criccuna pandarishpa ama urmachunca, ima millaita mana ruhuanatami yuyana canguichic.

14Imapish paillatac mana allica mana tiyanchu. Ñucaca Apunchic Jesusta cric cashcamantaca, chaitaca allimi yachani. Ashtahuanpish maijan ima mana alli canata yuyacpica, paimanmi mana alli canga.

15Shina cashpapish shuctac criccuna can micucta ricushpa, mana alli cashcata yuyashpa llaquiricpica, ña mana c'uyashcatami ricuchingui. Can imata micushcallamanta pacta shuctac criccuna chingarinaman rinman. Paicunamantapish Cristoca huañurcami.

16Cancuna allita causacushcataca pacta shuccuna mana alli nishpa rimanmancuna.

17Taita Dios mandacucpi causanaca mana ubianata, micunata yuyashpalla causanachu, ashtahuanpish cashcata ruhuashpa, mana p'iñanacushpa, Diospac Espíritu yuyaita cushca shina cushicushpa causanami can.

18Chai shina ruhuashpa, Cristopacta ruhuacmi Taita Diostapish cushichin, shinallatac runacunapacpish alli nishca can.

19Chashna cashcamanta caishuc chaishuc ima shina sumacta causanatapish, ima shina ashtahuan ayudanacunatapish munashunchic. Ayudanacushpa, Jesusta alli ningapacca imapipish mana p'iñanacunallata munashunchic.

20Taita Dios imata ruhuasha nicushcataca ama micushcallamanta chingachichu. Imapish micunaca micunallami, ashtahuanpish can micucta ricushpa shuctac criccuna juchapi urmaipac cacpica, ama micuichu.

21Shuctac criccuna ama pandarichunca aichatapish mana micushpa, vinotapish mana ubiashpa, shinallatac ima shuctaccunatapish mana ruhuashpami ashtahuan alli canman.

22Chashna cashcamanta can ima shina crishcataca canllatacmi Diospac ñaupapi charina cangui. Maijanpish paipac yuyaipi mana juchanchishca cashcamanta alli yuyacmanca, ¡mai cushicuimi can!

23Ashtahuanpish “¿cai micunaca allichu, mana allichu?” nishpa micucca, pai crishca shina mana micushcamantami juchayuc tucun. Imata ruhuashpapish crishca shina mana ruhuashpaca, juchayucmi tucun.