2 CORINTIOS 2 - Nuevo Testamento en Quichua Cañar 1996

1Chashna cashcamantami cancunata ñuca mana llaquichingaraicu, cutin rinataca mana munarcani.

2Ñuca ricungapac rishpa cancunata llaquichicpica, tucui cancunami llaquilla tucunguichicman. Shina cacpica, ¿pitac ñucataca cushichingayari?

3Chaimantami ñuca cancunapacman ricpi, ama llaquichichun nishpa chai quillcataca quillcarcani. Llaquichinapac randica, ñucataca cushichinami canguichic. Ñuca cushilla cacpica, cancunapish cushillami canguichic.

4Cancunaman chai quillcata quillcashpaca, yallita llaquirishpami, huacashpa, huiqui ñahuilla quillcarcani. Shina cashpapish mana cancunata llaquichingapacchu chashnaca quillcarcani, ashtahuanpish cancunata yallita c'uyac cashcata cancuna yachachunmi, chashnaca quillcarcani.

Paita p'iñacta Pablo perdonashcamanta

5Chai llaquichic runa ñucata llaquichishpaca, mana ñucallatachu llaquichirca, ashtahuanpish tucui cancunatami maipica llaquichirca. “Maipica cancunatapish llaquichircami” nishpaca, chai runata mana yalli llaquichingapacmi chashnaca nini.

6Chai llaquichic runataca cancunapuramantaca taucacunami ña llaquichishcanguichic. Chaimanta ña chailla allimi.

7Cunanca pai chaita ruhuashcamantaca perdonashpa, cushichinami canguichic. Mana chai shina ruhuacpica, paica caita chaita yuyashpami, yalli llaqui tucunga.

8Chaimanta cutinllatac paita c'uyaccuna cashcata ricuchichic nini.

9Ñaupamanmi cai jahuaca ña quillcarcani. Chai shina quillcashpaca, ñuca ima nishcata cancuna pactachic cashcata, mana pactachic cashcata ricungapacmi, chashnaca quillcarcani.

10Maijanta cancuna perdonacpica, ñucapish perdonanimi. Imapish mana perdonashca cacpica, cancunata llaquishcamantami Cristopac ñaupapi chai shinaca ña perdonarcani.

11Chai shina ruhuacpimi, Satanasca*f** mana ñucanchictaca pandachinga. Pai ima shinapish pandachisha nicushcataca allimi yachanchic.

Troas pueblopi Pablo mana cushilla cashcamanta

12Troas pueblopi Cristomanta alli huillaita huillangapac chayacpica, Apunchic Jesusllatacmi imatapish huillachunca pungu pascashca shinata ruhuarca.

13Shina cacpipish Jesusmanta ñuca huauqui Tito mana tupashcamantaca, mai llaquillami carcani. Chaimantami paicunataca “caya minchacaman” nishpa, Macedonia llactaman rircanilla.

Cristohuan mishaccuna cashcamanta

14Cristohuan ñucanchic mishaccuna cashcata ricuchingapacmi, Taita Diosca tucuipac ñaupapi millaita mishashpa pushacun. Shinallatac mai llactapipish mishquilla ashnacuc shina Cristopac alli huillai ñucanchicmanta huillarichunmi, tucuipi pushacun. Chashna cashcamantami Taita Diostaca pagui nicunalla canchic.

15Taita Diosmanca ñucanchicca Cristomantami mishquilla ashnacuc incienso shina canchic. Chai mishquilla ashnacucmi quishpirinaman riccunapurapipish, chingarinaman riccunapurapipish ashnacun.

16Chingarinaman riccunataca cai mishquilla ashnacuc shina alli huillaica huañuimanmi pushacun, ashtahuanpish quishpirinaman riccunataca cai mishquilla ashnacuc shina alli huillaica causaimanmi apacun. Shina cacpica, ¿pitac cai alli huillaitaca huillai pudingayari?

17Ñucanchicca mana caishuccuna shina imata japingaraiculla Diosmanta alli huillaitaca chagrushpa huillacunchicchu, ashtahuanpish mana llullashpami Diospac ñaupapi paillatac cachashcacuna cashcamanta, Cristomantaca huillacunchic.