ROMANOS 11 - Nuevo Testamento en Quichua Cañar 1996

Israelcunamantaca maijancunalla quishpirina cashcamanta

1¿Cunanca imatatac nishun? ¿Taita Diosca pai acllashca israelcunataca*f** p'iñashpachu shitashca canga? ¡Mana chashna yuyanachu canchic! Ñucallatacmi taita Abrahampac huahua huahuapura cashcamantaca, Benjaminpac aillu israel cani.

2Taita Diosca callarimanta pachami israelcunataca acllarca. Chaimanta cunanca mana shitashcachu. Dios quillcachishcapi Eliasmanta ima nishcataca, ¿manachu yachanguichic? Chaipica pai Diosman mañacushpaca israelcunata juchanchishpami cashna nirca:

3“Taita Dioslla, can cachashca huillaccunatapish cunanca huañuchishpa, cambac altarcunatapish urmachishpami chingachishcacuna. Ñucallami causacuni. Ñucatapish huañuchishun nincunami” nirca.

4Chashna mañacpi Taita Diosca: “Canchis huaranga gentecunatami ñucapaclla cachun acllarcani. Paicunaca mana ruhuashcalla Baal diospac ñaupapi cunguriccunami” nircami.

5Cunanpish chai shinallatacmi Taita Diosca paipac c'uyaillamanta maijancunataca acllashca.

6Paicunataca Taita Diosca paipac c'uyaillamantami acllarca. Mana ima allita ruhuashcamantachu paicunata acllarca. Paicuna allita ruhuashcamanta acllashca cacpica, Taita Diospac c'uyaica yangallami canman.

7Shinashpaca, ¿imatatac nishun? Israelcunaca paicuna japingapac munacushcataca mana japircacunachu. Shina cacpipish, Dios acllashcacunallami japircacuna. Shuccunaca rumi shungumi tucurcacuna.

8Dios quillcachishcapica:

“Diosmi paicunataca

sinchi shunguta ruhuashpa,

cunan punzhacaman ñahuita charishpapish

mana ricuc shina,

rinrita charishpapish

mana uyac shina cachun saquirca” ninmi.

9Mandac Davidpish:

“Paicuna llaqui tucuchunca,

jatun micuita micungapac

tiyarinapish mitcarishpa,

urmachic tuclla shina cachunmi mañani.

10Paicunapac ñahuicunapish

mana ricuc shina cachun,

paicunapac huasha tullucunapish

llaquihuan punzhanta

c'urcuyashca shina saquirichunmi mañani” nishcami.

Mana israelcunapish quishpirina cashcamanta

11¿Cunanca imatatac nishun? ¿Israelcuna*f** mitcarishpa urmashpaca, chingarishca cangachu? ¡Mana chashna yuyanachu canchic! Ashtahuanpish israelcuna mana cazushcamanta paicunallatac quishpirina yuyaita charichunmi, mana israelcunatapish*f** Taita Diosca quishpichirca.

12Chashna israelcuna pandarishpa mana cazushcamantami, tucui cai pachapi causaccunapac mana israel cacpipish, allipac cashca. Paicuna pandarishcapish mana israelcunapac allipac cacpimi, tucui israelcunata Dios quishpichicpicarin, ashtahuan alli cashcata yachanchic.

13Shina cacpipish cancuna mana israelcunamanca caitami nisha nini: Taita Diosca ñucataca mana israelcunaman huillachun cachashcamantami, ñuca imata ruhuashcacuna yalli alli cashcata yachani.

14Ñuca quiquin llacta aillucunallatac cancuna quishpirishpa alli c'aticushcata ricushpa, quishpirina munaita japishpa, maijancunallapish quishpirichunmi munani.

15Israelcunata Dios shitacpimi, tucui cai pachapi causaccunaca Diospacman cuchuyai pudircacuna. Shina tucucpica, israelcunata Dios chasquicpicarin, huañushcacuna causarishca shinami canga.

16Punta ruhuashca tanda Diosman cushca cacpica, tucui chapumi Diosman cushca canga. Shinallatac shuc yura sapi Diosman cushca cacpica, tucui ramacunami Diosman cushca canga.

17Maijan israelcunaca alli olivo yuramanta ramata p'itishca shinami. Shina cacpi can mana israelca, sachapi huiñashca olivo yuramanta ramata p'itishpa, alli olivo yurapi llutachishca shinami cangui. Shina cashpami, canca chai sapimanta huiñashca yura shina causaita japishcangui.

18Shina cashpapish canca: “P'itishca ramata atishpa allimi cani” ama nichu. Canca mana yurata charicuc sapi shina cashcatachu yuyana cangui, ashtahuanpish sapi canta charicushcatami yuyana cangui.

19Canca: “Chai ramataca ñucata llutachingapacmi, chai olivopac ramacunataca p'itirca” nishpa yuyanguichari.

20Chaica chashnami can. Shina cashpapish chai israelcunaca mana crishcamantami, p'itishca shina tucurcacuna. Ashtahuanpish canca crishcallamantami chai yurapi churashca cangui. Chaimanta ama canllatac “allimi cani” nirichu, ashtahuanpish Taita Diosta manchai.

21Taita Diosca chai yurapi huiñashca ramacunatapish p'itishpaca, cantacarin llutachishcalla rama cacpica, ¿ima nishpatac mana p'itingayari?

22Taita Diosca llaquic cashcata, shinallatac imamanta llaquichina cacpica llaquichiclla cashcata yachanami cangui. Taita Diosca mana cazuccunata llaquichicushpapish, cantaca mana llaquichishcami. Shina cacpica, Diospac c'uyaita mana cungarishpami causana cangui. Mana shina cacpica, cantapish anchuchingami.

23Shina cashpapish israelcuna sinchi canata saquishpa cri callaricpica, Diosca chai yurapi churaclla cashcamantaca cutin churangallami.

24Canca mana israel cashpapish, sachapi huiñashca olivo yuramanta p'itishpa, alli olivo yurapi churashpa, huiñachishca shinami cangui. Israelcunacarin alli olivo yurapac ramacuna shina cashcamantaca, paicunapac quiquin yurallapitacmi Taita Diosca churanga.

Israelcunapish quishpirina cashcamanta

25Ñuca c'uyashca criccuna, cancuna ama yachac tucushca cachunmi, manarac piman Dios yachachishcata huillani: Mashnalla crina cac mana israelcuna cringacamanmi, maijan israelcunaca*f** sinchi shungu tucushca.

26Chashna mana israelcunapish*f** cricpica, tucui israelcunapish quishpiringami. Dios quillcachishcapica:

“Sión*f** pueblomanta

Quishpichic shamushpami,

Jacobopac huahua huahuacunapac

juchacunataca anchuchinga.

27Taita Diosca: ‘Paicunapac

juchacunata anchuchishpami,

ñuca ari nishcataca

pactachisha’ ” ninmi.

28Cancuna mana israelcuna quishpirichunmi, israelcunaca quishpirinamanta alli huillaita mana cazushpa, Dios p'iñashca tucushcacuna. Shina cacpipish Taita Diosca paicunapac ñaupa taitacunata acllashcamantami, paicunataca c'uyacun.

29Taita Diosca cushpapish mana quichunchu. Shinallatac pai c'ayashpapish, “mana c'ayashcanica” nishpaca mana ninchu.

30Ñaupa punzhacunapica Taita Diostaca mana cazuccunami carcanguichic. Shina cacpipish israelcuna cunan Taita Diosta mana cazushcamantami, cancunataca Diosca llaquicun.

31Chai shinallatacmi israelcunaca cancunata Taita Dios llaquishca shina paicunatapish Dios llaquichun, Diostaca mana cazuncuna.

32Taita Diosca tucui gentecunata chai shinallatac llaquingapacmi, paita mana cazuchun saquirca.

33Taita Diospac c'uyaica tucuita yalli sumacmi. Paica tucui imatapish yachanmi. Pai imata yuyacushcata, shinallatac pai imata ruhuasha nicushcatapish pipish mana yachanchu.

34Dios quillcachishcapica: “Mandac Diospac yuyaitaca, ¿pitac ricsingayari? ¿Pitac paitaca cashnami, chashnami nishpa yachachingayari?

35Pai cutin cuchunca, ¿pitac imata Taita Diosmanca cushcayari?” ninmi.

36Tucui imapish Diosmantami shamun, shinallatac paimantami tiyan. Tucui imapish paipacmi. ¡Chaimanta Taita Diostaca huiñai huiñaita alli nishca cachun! Chashna cachun.