HEBREOS 11 - Nuevo Testamento en Quichua Cañar 1996

Ñaupa taitacuna crishcamanta

1Crinaca “imatapish japishatacmi” nishpa, chai yuyailla shuyanami. Manarac ricushca cashpapish, “chai shinatacmi canga” nishpa, chai yuyailla canami.

2Ñucanchic ñaupa taitacunataca, paicuna crishcamantami Taita Diosca chasquirca.

3Taita Diosca cai pachatapish, jahua pachatapish pai rimashcallahuanmi ruhuarca. Chaitaca crishcamantami yachanchic. Cunan ricushcata imapish mana ricuricmantami ruhuashca.

4Crishcamantami Abelpish Cainta atishpa, allicunata Diosman cushpa rupachirca. Chaimantami Taita Diosca Abeltaca cashcata ruhuac nishpa, paiman cushcatapish chasquirca. Abel huañushca cacpipish, pai crishcamantaca cunan punzhacaman huillacuncuna.

5Crishcamantami Enoctapish ama huañuita ricuchun nishpa, causacta jahua pachaman apashca carca. Shina cacpimi paitaca mashcashpapish mana tarircacuna. Dios quillcachishcapica, Enoc manarac jahua pachaman apashca cashpaca, Taita Dios munashcatami ruhuashpa causarca ninmi.

6Taita Diosman cuchuyangapacca, pai tiyashcatapish, paiman mañaccunaman pai imallata cuna cashcatapish crinami can. Mana crishpaca, Taita Diospac munaitaca ima shina mana ruhuaipacmi.

7Crishcamantami Noepish manarac ima tucushcata ricushpa, Dios mandashcata cazushpa, paipac aillu quishpirichun huambuc huasita ruhuarca. Pai crishcamantami, cai pachapi causac millai gentecunatapish llaquiman cacharca. Pai crishcamantami, Diosca paihuan alli tucuchun chasquirca.

8Crishcamantami Abrahamca Dios c'ayacpica, paita cazushpa Taita Dios cushami nishca llactaman ringapac, maiman ricushcata mana yachashpapish llucshircalla.

9Pai crishcamantami, Dios cushami nishca llactapica caru llactamanta cac shina causarca. Paica Isaac shina, Jacobo shinami carpamanta ruhuashca huasicunallapi causarca. Paicunapish Dios cushami nishcataca chasquircacunami.

10Ashtahuanpish Abrahamca maita mana chingaripac puebloman yaicusha nishpa shuyarca. Chai pueblotaca Diosllatacmi alli yuyarishpa shayachirca.

11Crishcamantami Abrahamca paipac huarmi Sara mana huachac ña yuyac cacpipish, huahuata charirca. Dios imatapish pactachic cashcata crishcamantami, Abrahamman shuc c'ari huahuata Diosca curca.

12Shinami Abraham ña huañunalla cashpapish, mama cucha yacu patapi tiyac t'iyu shina, shinallatac jahua cielopi tiyac lucerocuna shina, mana yupaipac huahua huahuacuna paimantaca mirarirca.

13Tucui chai gentecunami Dios cushami nishcacunata manarac chasquishpa huañurcacuna. Shina cashpapish paicuna crishcamantami, carullamanta alabaduc shina ricurcacuna. Chashnami shuctac llactamanta caccuna shina cashcatapish, shinallatac cai pachapi puriccunalla shina cashcatapish paicunallatac huillarcacuna.

14Chai shina niccunaca, chairac quiquin llactata shuctac llactata mashcacushcallatami ricuchincuna.

15Paicuna llucshimushca llactallatatac yuyacushca cashca cashpaca, chaillamantacmi cutinmancuna carca.

16Ashtahuanpish paicunaca shuc sumac llactatami munarcacuna. Chai llactaca jahua pachami can. Shina cashcamantami “paicunapac Diosmi cani” ninataca, Taita Diosca mana pingan. Paicunamanca shuc alli pueblotami Taita Diosca allichishpa charicun.

17Abrahampish crishcamantami, Taita Dios ima shina cric cashcata ricusha nicpi, paipac shuclla churi Isaacta Diosman cushpa, huañuchingapac aparca. Taita Dios “Isaacmantami huahua huahuacunata charingui” nishca jahuapish, Abrahamca paipac churitaca Diosman cunatami munarca.

18Taita Diosca ñaupamanca: “Isaacmantami, huahua huahuacunata achcata charingui” nishcami.

19Abrahamca Taita Dios imatapish ruhuaclla cashcahuan, huañushcacunatapish causachic cashcata crishpami huañuchigrircalla. Shina crishcamantami, cutin causarishcata shina paipac churitaca chasquirca.

20Crishcamantami Isaacpish Jacoboman, Esauman shamuc punzhacunapi Taita Dios bendiciachun nishpa, paiman mañarca.

21Crishcamantami Jacobopish ña huañugricushpaca, taunahuan taunallishpa, Josepac tucui huahuacunaman Taita Dios bendiciachun, Taita Diosta “allimari cangui” nishpa mañarca.

22Crishcamantami Josepish ña huañugricushpaca, q'uipaman Egipto llactamanta israelcuna*f** llucshina cashcata huillarca. Pai huillashpaca: “Egipto llactamanta llucshishpaca, ñuca tullucunatapish apashpa ringuichic” nishcami.

23Crishcamantami Moisespac taita mama alaja huahua cashcata ricushpa, quimsa quillata Moisés huacharicpica, pacashpa churarcacuna. Shinallatac jatun mandac tucui huahuacunata huañuchinami nicpipish, mana mancharcacunachu.

24Crishcamantami Moisespish ña jatun cashpaca, Egipto llactata mandac Faraonpac*f** ushipac huahua nishca canataca mana munarca.

25Juchata ruhuashpa, ashacamanlla cushicunapac randica, Diospac huahuacunahuan llaquita apanatami munarca.

26Egipto llactapi achcata charic canatapish saquishpami, Cristohuan pacta llaquita apashca canata munarca. Chaitaca Dios cuna cashcata japina yuyailla shina cashpami acllarca.

27Crishcamantami Moisesca jatun mandac Faraón p'iñarinatapish mana manchashpa, Egipto llactamanta llucshircalla. Pipish mana ricushca Diosta ricushca shina crishpami, chai yuyailla carca.

28Crishcamantami Moisés pascuata*f** ruhuashpaca, israelcunapuramanta punta huahuataca huañuchic ángel ama huañuchichun, tucui pungucunata yahuarhuan c'ahuichun mandarca.

29Crishcamantami israelcuna chaquishca allpata shina, Puca Cuchata chimbarcacuna. Egipto gentecunaca chai shinallatac chimbashun nishpapish, tucuimi yacupi aguarircacuna.

30Crishcamantami israelcunaca canchis punzhata Jericó pueblota purishpa muyushpa, chai pueblota jarcashca pircacunata urmachirca.

31Crishcamantami huacllirishpa causac Rahab huarmipish, israelcuna pacalla chai llactata ricuchun cachashcacunata sumacta chasquishpa pacarca. Chaimantami chai pueblopi Diosta mana cazuccunahuan pactaca mana huañurca.

32Ashtahuanca, ¿imatatac nisha? Gedeonmantapish, Baracmantapish, Sansonmantapish, Jeftemantapish, Davidmantapish, Samuelmantapish shinallatac Diosmanta ñaupa huillaccunamantapish mana tucui parlai pudinichu.

33Crishcamantami llactata mandaccunahuan macanacushpa mishashpa, paicunaca cashcata ruhuac mandaccunapish tucurcacuna. Dios cushami nishca allicunatapish japircacunami. Shinallatac leoncunapac shimicunatapish, ama imata ruhuachun huichcarcacunami.

34Shinallatac manchanayaipac nina japiricuctapish huañuchircacunami. Espadahuan huañuchinamantapish atircacunami. Ima fuerza illac cashpapish, fuerzayuc tucurcacunami. Jatun macanacuicunapipish mana manchashpa, shuctac llactamanta paicunata p'iñac gentecunatapish atircacunami.

35Crishcamantami huarmicunapish, paicunapac aillupuramanta huañushca cashpapish, causarishcata chasquircacuna.

Cutin shuccunaca causarina punzhapi sumac causaita japingapacmi, cacharishun nicucpipish mana uyashpa, huañunalla llaquita apashpa huañurcacunalla.

36Cutin shuccunaca burlashpa asishcapish, macashcapish, cadenahuan huatashcapish shinallatac carcelpipish carcacunami.

37Cutin shuccunaca rumihuan shitashpa huañuchishcapish, shuccunaca serruchuhuan p'itishpa huañuchishcapish, shuccunaca espadahuan huañuchishcapish carcami. Cutin shuccunaca oveja cara, chivo cara churarishcallami huacchayashpa, caiman chaiman purircacuna. Chashnami manchaihuan llaquilla carcacuna.

38Chai gentecunaca mai allicunami carca. Chaimantami cai allpa pachaca paicuna causangapacpish mana alli carca. Paicunaca shitashca pambacunapi, urcucunapi, machaicunapi, ucuta jutcushcacunapimi llaquinayaita causarcacuna.

39Chashna jatun llaquita apaccunaca crishcamanta Taita Dios alli nishca cashpapish, Dios cushami nishcataca mana chasquircacunachu.

40Paicuna alli cacpipish, Taita Diosca ñucanchicta yuyarishpami, paicunapish ñucanchichuan pacta ama juchanchishca cachun, ashtahuan allita ruhuashca.