1Cancunaman ñucanchic nicushcamanta ashtahuan yallica, curacunata jatun mandac curatami charinchic. Paica jahua pachaman rishpami, Taita Dios maipi mandacucpi alli maquiman tiyacun.
2Paica cura shinami, Diospaclla cac huasipi curacuna ruhuana cashcata ruhuacun. Chai huasica mana gentecuna ruhuashca shinallachu, ashtahuanpish Mandac Diosllatac ruhuashcami can.
3Tucui curacunata jatun mandac curacunami, Diosman imallata cushcacunata chasquishpa cungapac, animalcunata huañuchishpa Diosman cungapacpish acllashca can. Shina cashcamantami Apunchic Jesucristopish Diosmanca imallatapish cuna can.
4Cai pachapi Moisés mandashcata ruhuashpa, Diosman cushpa, rupachic curacuna tiyashcarac cacpica, paica cai pachapi cashpaca, curallapish mana canmanchu carca.
5Diosman mañana carpa huasita Moisés ruhuagricucpimi, Taita Dios rimashpaca: “Riqui, urcupi ima shina ruhuana cashcata canman ricuchishca shina, chai huasita ruhuangui” nirca. Shina cashcamantami cai pachapi cac curacuna imallata Diosman ruhuashpaca, jahua pachapi imalla tiyashcata ricuchic llandu shinalla ruhuacuncuna.
6Ashtahuanpish curacunata jatun mandac ñucanchic curaca, Apunchic Jesucristomi. Paica caishuc curacuna ruhuana cashcata atishpami, ruhuangapac chasquishca. Paica tucuimanta yalli valishca Dios cushcacunahuanmi Taita Dioshuanpish, gentecunahuanpish mushuc ari ninacuita pactachirca.
7Punta ari ninacui alli cashca cacpica, q'uipa ari ninacuica mana tiyanmanchu carca.
8Shina cacpipish gentecuna mana alli pactachic cashcata ricushpami, Mandac Diosca:
“Israel*f** gentecunahuan,
Judá gentecunahuan
mushuc ari ninacuita ruhuana
punzhacunaca pactamungami.
9Cai ari ninacuica,
mana paicunapac ñaupa taitacunahuan
ari ninacushca shinachu canga.
Paicunataca ñuca maquihuanmi,
Egipto llactamanta llucchircani.
Shina cashpapish chai ari ninacushcata
mana pactachishcamantaca saquircanillami.
10Chai punzhacuna q'uipaca
israelcunahuan ari ninacushpaca,
ñuca mandashcacunataca
paicunapac yuyaipimi
yuyarichun churasha.
Shinallatac paicunapac shungupipish,
quillcashca shina cachunmi churasha.
Ñucaca paicunapac Diosmi casha,
shinallatac paicunaca
ñuca huahuacunami canga.
11Chashna cacpica pipish
paipac ricsishcacunaman
shinallatac paipac aillucunamanpish
‘Mandac Diostaca ricsiyari’
nishpaca, ña mana ningachu,
ashtahuanpish uchillacunamanta
pacha callarishpa, jatuncunacamanmi
tucui mashna ñucataca
ricsic chayangacuna.
12Ñucaca tucui paicuna
mana alli ruhuashcacunatami perdonasha,
shinallatac paicunapac juchacunatapish
ña mana ashtahuan yuyarishachu” ninmi.
13Mushuc ari ninacuimanta Taita Dios rimashpaca, ñaupa ari ninacushcaca ña mauca cashcatami ricuchin. Chai maucayashcaca ña tucurimugricuc shinami can.
Who We AreWhat We EelieveWhat We Do
2025 by iamachristian.org,Inc All rights reserved.
