1 CORINTIOS 12 - Nuevo Testamento en Quichua Cañar 1996

Diospac Espirituca imata ruhuac cachun cuc cashcamanta

1C'uyashca criccuna, Diospac Espíritu imata ruhuac cachun cuc cashcatami yachachun munani.

2Cancuna manarac cric cashpaca, mana rimaric ruhuashcalla dioscuna umashcami carcanguichic. Chaitaca cancunallatac yachanguichicmi.

3Chashna cashcamanta Diospac Espíritu maijanta rimachicucpica: “Jesusca ima llaquipish tucushca canman” nishpaca, mana ninmanchu. Shinallatac maijanpish Diospac Espíritu mana rimachicucpica: “Jesusca Mandacmi” nishpaca, mana ninmanchu.

4Tandanacushca criccunapurapica, ch'ican ch'ican imata ruhuaccunami tiyan. Shina cacpipish chai ruhuanata cucca Diospac Espiritullami.

5Ch'ican ch'ican servinami tiyan. Shina cacpipish tucui chaicunataca Apunchic Jesusllami ruhuachicun.

6Ch'ican ch'ican imata ruhuaipaccunami tiyan. Shina cacpipish Taita Diosllatacmi tucuipi, tucui imatapish ruhuachicun.

7Tucuipac allipacmi, Taita Diosca tucui ñucanchicman allicunata ruhuachishpa, paipac Espíritu ñucanchic shungupi cashcata ricuchicun.

8Taita Dios paipac Espirituta cushpami, maijancunataca alli yuyaihuan rimachin. Cutin maijancunamanca chai Espiritullatacmi alli yachaicunata cun.

9Cutin maijancunaca chai Espiritullamantatacmi alli cric tucuncuna. Cutin maijancunaca ungushcacunata jambiccunami tucuncuna.

10Cutin maijancunaca pi mana ruhuaipacta ruhuaccunami tucuncuna. Cutin maijancunaca Dios ima nishcata huillaccuna tucuncuna. Cutin maijancunaca alli Espirituyuc cashcata, mana alli espirituyuc cashcata yachaccunami tucuncuna. Cutin maijancunaca jaicapi mana uyashca rimaicunata rimaccunami tucuncuna. Cutin maijancunaca chai rimai imata nisha nicushcata entendichiccunami tucuncuna.

11Ashtahuanpish tucui caicunataca imatapish ruhuac Diospac shuclla Espiritullatacmi, maijanman cusha nishca shina imata ruhuaccuna cachun cun.

Tandanacushca criccunaca shuc cuerpo shina cashcamanta

12Cuerpoca shuclla cashpapish, ch'ican ch'ican partecunatami charin. Chashna cashpapish shuc cuerpollami can. Chashnallatacmi Cristopac cuerpomanta nishpapish shuclla can.

13Chashna shuclla cuerpo tucungapacmi, tucui ñucanchicca israel*f** cashpa, mana israel cashpa, amopacta ruhuac cashpa, mana amopacta ruhuac cashpapish, Taita Diospac shuclla Espirituhuan bautizarishca canchic. Shinallatac Taita Diosca chai Espiritullatatacmi yacuta ubiachic shina, ñucanchicmanca curca.

14Cuerpoca mana shuc partellatachu charin, ashtahuanpish ch'ican ch'ican partecunatami charin.

15Chaquica: “Ñucaca mana maqui cashcamantaca, mana cuerpopacchu cani” nishpapish, cuerpopac canataca mana saquinchu.

16Rinripish: “Ñucaca mana ñahui cashcamantaca, mana cuerpopacchu cani” nishpapish, cuerpopac canataca mana saquinchu.

17Tucui cuerpo ñahuilla cacpica, ¿ima shinatac uyanchicman? Shinallatac tucui cuerpo rinrilla cacpica, ¿ima shinatac mutquinchicman?

18Ashtahuanpish Taita Diosca ch'ican ch'ican partecunatami, maipimi alli cana cacpi cuerpopica churashca.

19Tucui cuerpo shuc parte shinalla cacpica, ña mana cuerpo shina canmanchu.

20Chashna cuerpopi ch'ican ch'ican partecuna tiyacpipish, cuerpoca shucllami.

21Ñahuica maquitaca: “Cantaca mana ninichu” nishpaca, mana ninmanchu. Shinallatac umapish chaquitaca: “Cantaca mana ninichu” nishpaca, mana ninmanchu.

22Ashtahuanpish imapacpish mana valic partemi, cuerpopacca mai valic can.

23Maijanmi yangalla cac partetami ashtahuan cuidarishpa, alli churarinchic. Shinallatac maijanmi pinganayaclla cac partetami, tucuimanta yalli jarcarishpa churarinchic.

24Ashtahuanpish tucui mashna ricunalla partecunataca, mana jarcarishpa churarinachu. Taita Diosca yangalla cac parteta ashtahuan jarcarichunmi, cuerpotaca ruhuashca.

25Cuerpopi tiyac partecuna ama ch'icanyarinacushpa, caishuc chaishuc ayudanacuchunmi, chashnaca ruhuashca.

26Cuerpopi shuc parte llaqui tucucpica, caishuc partecunapish llaquirincunami. Shinallatac shuc parte allita japicpica, tucui partemi cushicuncuna.

27Cancunaca Cristopac cuerpo shina cashpami, ch'ican ch'ican partecuna canguichic.

28Taita Diosca tandanacushca criccunapurapica, puntaca Jesús acllashca huillaccuna tiyachun, q'uipaca Dios ima nishcata huillaccuna tiyachun, chaipac q'uipaca yachachiccuna tiyachunmi munan. Shinallatac pi mana ruhuaipacta ruhuaccuna, jambiccuna, ayudaccuna, pushaccuna, jaicapi mana uyashca rimaicunata rimaccuna tiyachunmi munan.

29Mana tucuichu Jesús acllashca huillaccuna, Dios ima nishcata huillaccuna, yachachiccuna, shinallatac pi mana ruhuaipacta ruhuaccuna can.

30Shinallatac mana tucuichu ungushcacunata jambiccuna, jaicapi mana uyashca rimaita rimaccuna, shinallatac chai rimashca imata nisha nicushcata entendichiccuna can.

31Tucui caicunamantaca, imapish ashtahuan valishca ruhuaicunatami ruhuanata munaichic. Shina cacpipish tucui caicunamanta yallica, ashtahuan alli causanatami ñucaca yachachigrini.